السلام عليكم ورحمة الله وبركاته ....
مساكم الله بالخير
هذه رديه بيني وبين راكان بن متروك
يقول راكان بن متروك,,,,,,,
ياهاجسي دوك القلم وانظم أبيات
وصل سلامي يم خالد وقله .
مدامني ماصرت من ضمن الاموات .
منساه لو حاربني الكون كله .
وان جاني اللي جيته لتشمات .
والله لامشيه درب المذله .
سوالفه عندي لاراحت ولا جات .
ياالله عسى التلال عني يتله .
غلاه ياخالد تمركز على الذات .
وحلياه كنه مزنتن مستهله .
دارن تضمه تهتني بالمسرات .
بلعون ماقالو عربها ممله .
جعل المزون اللي رعدها مغيرات .
تردف على داره وتروي محله .
امر داره واعطي العين نظرات .
واشوف زولن ضامري مستحله .
وماخذ اشوي الا وانا اهل عبرات .
مدري وش اللي جاب دمعي وهله .
الله يوفقله جميع المسارات .
وجعل الفرح قربه كما قرب ظله .
رد الشاعر خالد بن متروك
يامرحبا بأعداد وبل المخيلات
وأعداد ماهلت علينا الأهله
بالصاحب اللي حاضر كل الأوقات
محشوم ياراكان عن كل زله
لاتشتكي للناس عن كل مافات
وأصبر عسى فالأمرخير من الله
بعطيك قصه وأستمع للذي آت
من عاشق يحكيلك الي حصله
جربت طعم الحب مره ومرات
قصه غرام بين خل وخله
ترتاح لامن جاك منهم رسالات
ولاغاب تونس داخل القلب غله
لقيتها ياخوك غدر وحيلات
عشرت مصالح مع هموم وعله
أحشم جنابك عن علوم رديات
للدين والعادات دايم مخله
وأحفظ طريق المرجله والمروات
وللطيب والنوماس درب(ن)تدله
وإختامها مني سلام وتحيات
للصاحب اللي من تضايق زبن له
وسلامتكم ,,,,,,,,,,,,,,,,,,,,,,.