راحت وراح الزمان اللي عليه الحسوف=
راحت ولاباقي إلا ذكرها يصطفق
راحت عساها من أصداف الدهر ماتشوف=
راحت وخلت خفوقي عقبها يحترق
ومن يوم راحت وأنا مابين هم وخوف=
هم المفارق وخوف من الزمان وقلق
صحيح كل بهالدنيا يعيش ويشوف=
لكن طعم المفارق مر مثل العلق
من دونها وقف الحظ الردي والظروف=
وحكم علينا الزمن بإنا غصب نفترق
أحير في وصفها لامن ذكرت الوصوف=
مع الخصال الجميله كأنها تتفق
فيها شجاعه وطيب وكبرياء وأنوف=
وفيها أنوثه أرق من الحرير وأرق
سبحان رب خلقها بين كل الألوف=
وسبحان رب بدع فيها الجمال وخلق
لامن تذكرتها قلبي يحن ويروف=
وأحس كني من الضيقه بديت أختنق
وأحس في وسط جوفي مثل ضرب السيوف=
شي يقطع عروقي عرق يتبع عرق
يالله يااللي لك المسلم يحج ويطوف=
يامالك الملك يارب البشر والفلق
تعفو عن اللي مضى يارب وأنت الرؤوف=
وفي جنة الخلد تجعلني مع اللي رزق
وتثبت أقدامنا لا جا نهار الوقوف=
وتستر علينا من الدنيا وشر الخلق