يامل عين من الهوجاس سهرانه=
والموق عيا يهاب السهر ويعيفه
بيت قريته لسالم وسط ديوانه=
وتهيض القلب من فرقا مواليفه
ثم قلت ياعين لاتبكين غلطانه=
أنسيه حتى لو إنه رافقك طيفه
مادام باع المحبه بأرخص أثمانه=
خليه يقفي مع الوقت وتصاريفه
هذي دروب الهوى من ماضي أزمانه=
نظره ولفته وضحكة سن تزييفه
وعقب المحبه يخون الخل خلانه=
ويبدأ يدور حبيب له على كيفه
ومن يوم شفت المحبه مالها خانه=
خلصت دام الهوى هذي سواليفه
والحين بعد إذنكم والنفس شقيانه=
موضوع سالم يشد الفكر توظيفه
إن كان سالم شكى بلواه وأحزانه=
بأسباب طفل مريض وحاله ضعيفه
ويقول حالته والله حيل تعبانه=
لوجيت أبوصفه والله صعب توصيفه
فأنا أطلب الواحد المعبود سبحانه=
اللي يدور الفلك بأمره وتصريفه
اللي جميع البشر تطمع بغفرانه=
وأمور خلقه يصرفها على كيفه
يارب تشفيه وترجعه لأخوانه=
وتحفظه من عثرت الوقت وصواديفه
والله يجزاك يالدواي بأحسانه=
ويرحمك ربي من القبر وتخاويفه