مشكور ماقصرت يانسل عكشان=
أنشهد إن الحق دايم تعده
مابيني وبينك علاقه وعرفان=
لكن بوسط القلب شي يشده
مدح العوازم مايبي أي برهان=
العازمي تلقاه في كل شده
صديقهم دايم تلاقيه طربان=
والضيف لاجاهم يحصل موده
وعدوهم دايم ذليل ومنهان=
ويوقفونه دايما عند حده
تاريخهم يبقى على مر الأزمان=
يحكي بطولات لهم قبل مده
يوم الحرايب قبل ترسيم الأوطان=
أفعالهم بانت على كل هده
وأكبر دليل فعلهم يوم الأكوان=
يوم اللقا كلن مكانه يسده
لا جيت أوصفهم نشاما وشجعان=
والكل منهم طاري الموت وده
متكاتفين ودايما مثل الأخوان=
لاصار واحدهم ظروفه تحده
له يرخصون المال لو بالتديان=
دايم معه مهما ظروفه تضده
وانا بريكي من مداهيل حلوان=
شاعر وأعرف البحر جزره ومده
من قوم راع الطيب نايف نفيشان=
عسى الولي من جل خيره يمده
يحميه رب الكون من كل شيطان=
عساه ماتشكي من الوقت شده
قم يانديبي فوق صنع المريكان=
وقدام إبن عكشان حضر وعده
من فوق جمس ماصنع وسط الألمان=
وماصنع للمدواج في وسط جده
محلاه والله يوم يمشي مسيان=
ترى الجمارك مستحيل ترده
لامن تعديت النويصيب عجلان=
دور على اللي مدته خير مده
وأنص الرجال اللي لهم بالكرم شان=
أفعالهم من طيبهم مستمده
تلقى سعد براك واقف وفرحان=
يضحك وبابه مستحيل يرده
ولاضفت عنده أخذ عنوان عكشان=
ومكتوبي اللي مرسلك فيه وده
لاهنت والله يانديبي ولاهان=
وقله إبن متروك يبلغك رده
وقله يسامحني على كل نقصان=
لاوحيت طار المدح مالي مصده
والخاتمه صلوا على خير إنسان=
محمد اللي كل الأمه توده