صوت وصدى مع الشاعر (( سعود الدهيمي ))

[محمد بن هضيبان]

يابيت يابيت القصيد وحصايله=كم واحدٍ في قلبه العلم نايله
وأنا بدالي فيك لازم ومرحله=عسى رحايلي تستمع مع رحايله
أبي..الدهيمي والدهيمي يهمني=الشاعر اللي يعجبني مثايله
ياسعود أبادلك السلام ابرسايلي=أحلا من الدر المصفّا همايله
وتحيّةٍٍ عطره كما اللول والذهب=وحبٍٍ بقلبي للرجاجيل شايله
مثلك وشرواك أنت ياسعود غايتي=يفداك من تضحك عليه المحايله
ومن بعد هذا ياسعود أبتدا المثل=وراع المثل تلقا السؤال أبرسايله
وأنا تعلم منك والشاهد الولي= الواحد اللي كلبونا نسايله
أنا دخلت السوق والسوق ممتلي=سوقٍ تكاثر فيه هرجة عمايله
الرمز من بيني وبينك على النقا=عشان بعض الناس تبلش دلايله
والمقصد اللي بين قوسين حطهم=جمهور ليلا.. والطويلات طايله
اللي على قلبي كما القيض لاحما=اللي تصنع كل واحد فوايله
أهل الخيال أمراقبت كل محتفل=تقول كدشن فالميادين صايله!
واللي تبناهم على شان حاجته=يبا البدل فيهم عمايله جمايله
تضحك لهم خشفٍ من الزين كامله=ريح الشمطري في مقادم جدايله
ويضحك لها راع الخيال ويحبها=ودموع عينه فوق خديه سايله
المقصد أنه بس يطلع بفايده=عشان تبرد في عروقه غلايله
ويقول عاد إليا ضمنها ويفتخر=ويكتبلها من ماتيّسر قوايله
وش عاد يكتب ياسعود بحبيته=الله ولا هرجت متيح وخمايله
هذا اللذي منه المضامين وارده=برقٍ يلوح ولاترجا همايله
وسلم وسلملي على محمد وسهم=اللي تنومس كل واحد فعايله

رد الدهيمي

حي الخيال اللي عيوني تخايله=وحي القصيد الزين ولسان قايله
يامرحبابه عد ماذعذع الهوى=وعد الحجيج اللي على البيت ظايله
واعداد مافالعام من وقم ثانيه=واعداد ماهل المطر من مخايله
ترحيب الذّّّّ من العسل في مناحله=ماجاه غش ولالعب فيه كايله
ومن در بكرٍ مصغرٍ ترتع الحيا=في وسط ريضانٍ من الوسم سايله
خطاً لفى فرّح بملفاه مهجتي=فيه المعانِ الصم بالفكر هايله
جاني على الايميل في ربع ثانيه=ماجا على حمرا من الهجن حايله
من شاعرٍ يصخر من القاف مابغى=وان طب وسط السوق ينقى جلايله
ابن هضيبان أول الركب ينذكر=لاذكروا الشعّار تشهد جزايله
آخذ معه بالقاف واعطيه ماطرى=من شرّدٍ في داخل الجوف جايله
وانا مخاواة المشاكيل مكسبي=ولاّ ترى الدنيا والاعمار زايله
تقول يامحمد من السوق منزعج=وتشوف ناسٍ داخل السوق عايله
واقول هذا سوق ويظم ما احتوى=اللا وغطّت فيه زينه نفايله
من عقب ظلىّ ثابتاً ساس بنيته=اليوم جرف وكل ِرجلٍ تهايله
لعبّه اللي حط فالغرب مشرقه=واشتال نجرانه وحطّّّه بحايله
لوتنشده وش صار هل الك سبحته=وقعد لسانه ماتبّله بلايله
ومن الصبابه لاهرج جرّ ونته=وامست حمول شعيل بالجنب مايله
ناسٍ لقوا من يستجيب لكلامهم=وكلاً قعد منهم يعقّد حبايله
ولو مالقوا ناسٍ تصفّق لكذبهم=كان استراحوا غصب والبدو حايله
بحّارةٍ تضحك اليا اوحيت هرجهم=وكلاً الياجا الجد ضيّع صمايله
بواخرٍ ينوون الابحار فوقها=يوزونها بحرٍ تلاطم هوايله
واليا اغرقوها جنبّوا عن طريقها=وجتك البواخر بالحمول متمايله
ذولا لو ان العلم عندي محيتهم=محي الدبا والقلب ماتت غلايله
مع ان ابه ناسٍ من الوجد صادقه=برق الحيا لالاح قامت تخايله
لاكن فرق الناس ماعاد ينكني=مثل اللزز ماتكسبه غير اصايله
واسلم وسلّم لي على الربع كلهم=اعداد ماهل المطر من مخايله