النوايا المبهمه .. !

[جمعان وقيان]

بسمك الله الغني المغني الغفار والحي السلام=العزيز القادر الرحمن والقهار ذو العرش المتين
لو تنام عيون خلقه لا حشى بالله عينه ما تنام=يستجيب اليا دعى داعيه يطلب ستر ذنب ٍ به مكين
يا زمن كافي ترى قد قيل بان الضرب بالميت حرام=وانت والله يا زمن كفيت في جرح ٍ لفاني من سنين
الجروح الماضيه شفها ترى ما سرّها كثر الكلام=والعذر ما فادها والوقت ما نسّاني الحزن الدفين
طافت اعوام وهقيت الجو صافي وانجلى هاك الغمام=واعتبرت انها سحابة صيف عدت وقتها قلت تهبين
ما دريت ان النوايا المبهمه زادت على النيه ظلام=لين شفت ان المواقف بين خلق الله تهون وما تبين
ذاك فضلته على نفسك وفضلته على كل الانام=ورغم هذا ما شعر بك لو تكون اليوم ضمن الغايبين
وذاك رجل ٍ قد حشمته بين ربعك تعتبره اعلى مقام=ورغم هذا مرخص ٍ بك مهملك من بين كل الحاضرين
وذاك خبل ٍ يتبع اسلوب المكر والضرب من تحت الحزام=ما يواجه والمواجه ماهو بطبع الرجال الماكرين
لكن الدنيا تدور ومالها بالكايده غير الجسام=والمواقف تفرق اهل الدون عن درب الرجال الاكرمين
ها كافي يازمن ؟ ولا ترى في خاطري بعض الملام=دامك اللي لا رحمت ولا قسم رحمته رب العالمين
ذكريات العشق الاول صارت الليله بقايا من حطام=ومابقالي غير نزف ٍ بالمشاعر يا عسى ربي يعين
لي ذكرت ايامي العذبه معاها لي ذكرت اجمل غرام=قمت اجر الونه اللي عقبها تنزف جروحي دمعتين
دمعة اللي فاقد ٍ شوف الوطن ما طاب لعيونه منام=مغترب عن داره اللي يمها يزداد شوقه والحنين
ودمعة اللي طايح ٍ حظه وحظه عقبها ما يوم قام=كل صدمة في حياته لا تعداها تجيله صدمتين !
ايه انا اللي في حياتي شلت همي فوق متني والعظام=كني اللي كل خلق الله لهم طعنه وانا لي طعنتين !
مير ابصبر والرجل لا من صبر في دنيته لا ما يضام=دام يرجي رحمة الغفار والقهار ذو العرش المتين

[/quote]







.