** نبذه عن الشاعر :
هو : نواف منور الدريويش
من فخذ الصوابر
هو من مواليد 1970م
وتوفي عن عمر يناهز 37
في يوم الاربعاء الموافق 19_ 9_2007م
وكان اول ظهور له في ميدان المحاورة عام 86 م.
- وقد أخذ مكانة مرموقه بين عمالقة شعراء المحاوره
أمثال :
صياف الحربي - مستور العصيمي - رشيد الزلامي - مطلق الثبيتي
سلطان الهاجري- حبيب العازمي -ابن شايق - زيد بن سلمي
-عبدالله العير المطيري - عبدالله الميزاني-مساعد بن جبران - فيصل الرياحي
حمود البقمي - علي بلال اليامـي -مصلح بن عياد - تركي 2000
رجاالله الحربي - سفر الدغيلبي - ابو ناب - فلاح القرقاح
عبدالله الذيابي (( العمى )) - محمد بن طمحي - ملفي المورقي
محمد بن مشيط - ذيب الشمري - غازي الميموني
سعود العبدلي - الشمالي المري - سعود الزعبي .
وغيرهم الكثير .
** قصائد الشاعر رحمه الله :
(( 1 ))
يانفس طاوعتك امرار وتراديد = واليا بغيت لك طريق مشيته
امشي بشفك ما حسبت المناقيد = مانام ليل ولازمك ما قضيته
واليا طلبتي شي من دون تحديد = بالجاه والا بالدراهم شريته
مدللك عن منتك زيد وعبيد = وابوي مثل رضاي لك ما رضيته
بقيت في حكمك كما العبد للسيد = ماشي ورايك ماذكر اني عصيته
ابي الخلاص وياخذ الامر ويزيد = ان طعت لامرك كل ليل سريته
اثرك عدوه ما ورى تبعتك فيد = غدرك تبين لي وانا ما هقيته
ما شفت منك الا مشاكل وتنكيد = وقطع المصالح والتعب كمبليته
والنفس مثل الورع تفطم عن الديد = وعزالله اني تو طبك لقيته
الصبر سويته مع العزم لك قيد = والله يساعدني على ما نويته
(( 2 ))
جـيــتــه وبـلـغـتــه بــكـــل الـحـقـايــق=وقــلــت الله الله فــيــك مــغــرم ومـفــتــون
ولازلــــت أحـاول بــك بــكـــل الـطــرايــق=وانـــا حـــذر مــــاودي الــنــاس يــــدرون
وعـنــدي عـلــى حـبــي جـمـيــع الـوثـايــق=أطـلــب وانـــا جـاهــز وحـاظــر ومـمـنــون
أضـحــك وأنـــا فـيـنـي تــشــب الـحـرايــق=زودٍ عـلــى مـابــي مـــن إلـهــود وطــعــون
مــن عــذرك الـلــي صـــار مـاهــوب لايـــق=أبـغــاك عـــون وصـــرت بالـعـكـس فـرعــون
الـحـقــت جــــرح الــعـــام الأول لـحــايــق=بـحــرج أظـــروف الـوقــت عـنــي تـصــدون
جـيـت أبـتـسـم وأضـحــك ورحـــت أمتـضـايـق=والله ماحـسـبـهـا تــجــي مــنـــك هــلـــون
ون ســـهـــل الله يــاحــمــام الــحــدايــق=أبتـقـاضـى مــنــك وبـلـيــس مـلعــون
(( 3 ))
ماني الوحيد الي خواله عمامه = لاكن بليا عم جالي ولد عم
سلمت منها لو مالي سلامه = الرجل من هول الزمان أيتعلم
وطيبٍ لمن لايستحقه رخامه = مثل الذي لاقال أله قول ماتم
والبحر لولا غبته واللتطامه = ماصار له هيبه ولا صار له جم
والناس لو تدري بهول القيامه = ماشفت قطع الوصل باللحم والدم
وبنيٍ بلا ساسٍ سريعٍ هدامه = لازم تبين خلته ويتهدم
ولون بوجيه الأوادم علامه = يعرفبها واف الخصايل من الرم
ماكان يخدعك الهبود بكلامه = ثم قلت ياطيب الولد لاتكلم
بالهرج أشد من الهلالي سلامه = وعلى الصحن قدم الضيوف أيتقدم
زاح الصحن يمه وقرب يدامه = سما وكل لوكان ماقلتله سم
والرجل مهما كان يرفع مقامه = والخير كمن خص والشر كم عم
من يحترم نفسه يزيد أحترامه = ويشاف بالعين الجليله ويحشم
بس الخمامه غصب يبقى خمامه = يحكم عليه الوقت والناس تحكم
لو لبس من غالي العمايم أعمامه = سرجٍ على ثورن ثبارن معمعم
لاكبر راس الثور يكبر سنامه = الحصن تفهق والكديش أيتقدم
والعد حول فوق جاله مقامه = أقرش من الطي الرفيع وتصرم
ويين الشجيع اللي يجود أحزامه = اللي جويدٍ محزمه ويتحيزم
لاكن عسى حسن العمل هو ختامه = الله يغفر ذنبنا ثم يرحم
قدر شراب الأدمي مع طعامه = هذا محلله وهذا محرم
أعوذ به عن كل ظلم وظلامه = وعن حوبة المظلوم وشرار ظالم
وعلى النبي صلاة ربي ختامه = محمد عليه اللهم صلي وسلم
(( 4 ))
ودك يصير الرجل عراف وفهيم = مايقول داري وهو ماهوب داري
واليا نشد عن شي يستخدم الميم = ماشفت ماعينت مالاح طاري
والطيب من بين النشاما مقاسيم = اللي عليهن حمل واللي عواري
لاكن قل المال للرجل تحطيم = لوكان يطريله ثمانين طاري
عشقٍ طلع في وادي الهيم للهيم = دربي يمين ونبت عشبه يساري
ومن صارله حاجه ورى برطم شريم = ينزل لرغباته نزول أضطراري
ويحطله طيبٍ مزيف وترهيم = معى تحدث في سلوكٍ حظاري
ماهو عشانه يفك المجاهيم = له حصتٍ فالأهلي ولا التجاري
وقتٍ تغير فيه بعض المفاهيم = فيه العدو مثل الصديق المباري
وقل الصحيح وقايله وصح يانيم = وساد الكلام اللي من الصح عاري
ألا ويصحب كلمة الحق تعتيم = فعلا وأنا سامع وشايف وقاري
لكن عزيز النفس مايقبل الضيم = ماني على الدون والدون ضاري
ولبغى من الناقص حفاوه وتكريم = لوصرت في بعض الأمور أنتحاري
أجزع كما تجزع حرارٍ صواريم = والخوف ماطول عمار الحباري
للكل مقدارٍ وللكل تقييم = ولاني لعميان البصيره مداري
للأسئله ياسين للأجوبه جيم = هذاك ذاك وذاك ذيب الغداري
وعلى الرسول أفضل صلاةٍ وتسليم = شهادتٍ لله تشهد أجهاري
(( 5 ))
الله من قلب همومه غدت به = مثل الهبوب اليا غدت فالقراطيس
من بين هدفات الظلوع انتحت به = وعزي لمن كثرت عليه الهواجيس
ان نمت من بين الحشى غادرت به = بحلوم ليل تلتجيها كوابيس
وعلى محيطات البحور احذفت به = وامسي بجم ما تجيه الغواطيس
اهموم قلبي حبته واسكنت به = بنت لها بني مثبت بتاسيس
على عشير الي بعد قربت به = ابعد لياهو بعد لندن وباريس
ما قربت سود الليالي غدت به = واقفت بغض العود زين الملابيس
شمل الهوى من بيننا شتت به = وردت يديني من عشيري مفاليس
جسم نحل وانهار ما فكرت به = ولا حسها مثلي عليها حواسيس
اسهر وسهري كنها ما درت به = يجهل عناي ابو العيون النواعيس
مدري كلام اهل الحسد صدقت به = اهل الحظوظ الراديات الهلابيس
نفاقهم يوم اهرجوه اقنعت به = اللي ورى سلم المحبه جواسيس
او رايها من عندها قررت به = مدري تبي تكسب بهجري نواميس
(( 6 ))
الزيـن ياسعـود مشغولـن تلفونـه=والظاهر انه بعد ياسعـود عطلانـي
أدق عشريـن مـرّه مـا يشيلونـه=ياسعود ماكن وسط البيـت عربانـي
رحت أتنشد عنـه ناسـن يعرفونـه=قالوا عشيـرك لقالـه واحـد ثانـي
قلت الله أكبر ماصدق مـا تقولونـه=ماهوب حقن لطيف الـروح ينسانـي
دقيت في شارعـه رمـزن يعرفونـه=وصدفه طلع لي وهو ضايق وزعلاني
وقلت أنت وشفيك وجهك مختلف لونه=بالله وش مزعلـك يااعـز خـلانـي
قال انزعج كـن بيتـي مـا تدلونـه=سيّر على البيت لو تنشد عن اخواني
ماهـوب لازم تلفـونـي تدقـونـه=لابد تنشـد مـادام الخـط عطلانـي
ياسعود علمتهـا بهرجـن يقولونـه=وياسعود علمتها فـي كـل ماجانـي
قال الحسد طبع ناسـن مـا يخلونـه=وشلون تصدق لعدوانـك وعدوانـي
شرّع لـي البـاب العالـم يشوفونـه=نسى المذله بعـد عمـري وجدّأنـي
وسولفت والكابرس يمشي على هونه=مع التقاطع ورى اشـارات خيطانـي
(( 7 ))
ياخذني الطاري ليا ذعذع النود =والامر من رب العباد استمده
واقول ياقلب من الود ملهود = هرج تحس انه يضايقك بده
الارض قاع وفوقها برق ورعود = ونزل السما ماله عن الارض صده
والسيل جرحه يبعث زهور واورود = لاتقول عقب الجرح مابه موده
انته ربيع القلب ياناعم العود = لو ان قلب تاخذه ما ترده
ماتشوف قلبي بين اياديك مولود = وقلبك بلشنا بين مزحه وجده
ماترحم اللي جرحه عيونك السود =ومخفي جرحه عن الناس مده
وانا صبر وكل صبر له حدود = واخر قراري حاجز الصمت اهده
واقع ولي فالصمت غايه ومقصود = والصدق سيف يقطع ((الفطر)) حده
طالت مشاويري وطال العنا زود = من الكويت اسري واصابح بجده
يمشي قدم رجلي على الهون والكود = واثبت براهين الموده بشده
واليا طلبت شهود جبنالك شهود = اني مسافر بين روحه ورده
احيان مثل اللي ورى السرب مردود = ضامي ودون السرب جا من يرده
واحيان اقول اني من العقل مجرود = البحر ما افرق بين جزره ومده
ومن طبعي اخشى هرج حاسد ومحسود = وماحب من يبدي على الناس سده
واحيان اقول الباب مغلق ومسدود = مع واحد نور القمر مثل خده
واحيان اقول لنا مواثيق وعهود = بيني وبينه جا كلام نعده
راع الهوى مابين صاحي ومصلود = لو قال يالله السلامه مرده
واحيان اقول اني مغربل ومقرود = عرف عسى تاليه ربي يصده
لاشافي قلبي ولا حاصل فود = لاواهني مكبرين المخده
(( 8 ))
عقدن يحل وعقد ماهوب محلول = تحير من دونه جميع الوسايل
قالو يحل وقلت ماهوب معقول = الحل والله دونه الياس حايل
قالو علامك قلت طيب ومعلول = مشاكلن تبغالها شرح طايل
قالو محبه قلت حبيت مجمول = الحب ماعيّب شيوخ القبايل
قالو وش اسمه قلت ذا شي مجهول = اما اسكتم ولا على ماني قايل
قالم تقول وقلت عزالله اقول = لاواهني حايل بسكان حايل
لاوكنت في جون خلا مابه الزول = ترى الخلا طب القلوب العلايل
(( 9 ))
لا واهنيك باالغلا وانت ضدي = وشلون لونك بصفي على طول
ماهو بودي يوم امر امتعدي = والله من اللي بيني وبينك يحول
اخاف من نظرة اعيونن تلدي = ومطالعات احويل بعيونه الحول
بيني وبين اسرار حبي تحدي = الين صار الطبع والطبع ميزول
محدن درى عني ولاباح سدي = وواواصل الغارات واصول واجول
واطوي مسافة خايعن مجرهدي = واقضي اشغالي وانا معك مشغول
ومعلي اللي يجيب الكلام ويودي = لاجبتلك سيره ولاارسلت مرسول
ان مر زولك دايم اغضي واصدي = وانا بقلبي ياحبيبي يهازول
يابو جديلن فوق متنه يكدي = جميل من كل النواحي ومجمول
عذبتني والحال صار متردي = تراك عن ماصار باالحال مسؤول
جحدت حبك لين بيحت سدي = واليوم ابشرح ماحصلي وابقول
صبرت يالبين العن جد جدي = لقيت بعض الصبر ماهوب معقول
ونصرت قدك باالغلا وانت قدي = لو قالو العذال اباقول يحول
والله مدري من عليه اببدي = ماله وجود ولغز ماهوب محلول
(( 10 ))
فقدنا قليلين الحيا مابقا كود انت = شريدتهم انت الله يشيلك عن الديره
على شذبت المقفي وسب الرفيق ادمنت = تعذرب بهرجك طيب العرف والسيره
تخوجل بمنطوقك تدلع تدلع بنت = وقالولي انك تستشير اختك منيره
بوقت السعه شاعر وفاهم وكنت وكنت = وبااللازمه جون تطارد معاصيره
يغرك كلامي يوم اقوللك نوب احسنت = وانا اطفيبها اعيون اهل الحقد والغيره
انا مستعد اني لردك مثل ماكنت = على اسمك ووسمك مع هل البر والديره
ترى العلم الاخر كان شان الزمان وشنت = ترى علمك اللي تذكره مايحصل غيره
اذا اوعدت ماتافي واندورك ماعينت = معايير وانته وش تبي غير هاالعيره
وانا صح عن بعض الطواريق قد دينت = واذا اذنبت فيك الذنب تقفاه تكفيره
(( ديوان الشاعر : نواف بن منور )) رحمه الله
( تقرير عن مشاركة مخالفة ) ، و الموجودة أسفل كل مشاركة .