(صوت) قصيده الشاعر فهد عوض البريكي ...
الجادل اللي صـار غيـري حليلهـا=الله يسامحهـا ويـسـر سبيلـهـا
صدت وأنا صديت والخاطر أنجـرح=من عقـب مانـي بالمـوده خليلهـا
صدت غصب ماهو بكيفـي وكيفهـا=حكم الظروف اللي غصب ننحنيلهـا
صادفتها بالسوق من قبـل عرسهـا=تشـري شراياهـا وتشـري كليلهـا
خزيتهـا والنـار فالقلـب تشتعـل=ودنقـت ودموعـي تزايـد هميلهـا
وطلعت من سوق ((الجمال)) وتركتها=ولا لقيـت ألا البيـوت أرتكيلـهـا
الله وأكبـر يالزمـن كيـف خنتنـا=عـزي لحالـي بالهوى وعزتيلهـا
وياحمود نفسي من عنا البعد ضايقه=وروحي بعدها حان موعـد رحيلهـا
وأنـا علـى سنـة محمـد وملتـه=وراضي بقسم اللي كفيلـي وكفيلهـا
(صدى) حمود دليبح الساحلي ...
الله من عين جزت من مقيلها=فزًت وعيا نومها يستويلها
سالت مدامعها وشامت عن الكرى=اسباب ناسٍ باالهوى تشتكيلها
ماغير اداحم صلف الابيات باالخفى=اما تجيني طوع والا اجيلها
انا ليا هاضت وفاضت قريحتي=اصول فيها لين يبرد غليلها
كله سبب من غربلتني قصيدته=نفسه من الفرقى طوى الضيق حيلها
يشكي فراق اللي تجًهز لعرسها=راحت وشبًت في ضلوعه فتيلها
يقول نفسي من عنا البعد ضايقه=وروحي بعدها حان موعد رحيلها
ياابو عوض ماجور من لوعة الهوى=هاذي نهاياته وهذا حصيلها
ابنصحك ياخوك واقبل نصيحتي=ويكفيك عن كثر الدعاوي قليلها
ترى الهوى ياخوك تجرح نهايته=عقب الشهد يسقيك من حنظليلها
مادامها راحت وجاها نصيبها=الله معاها وانت دوًر بديلها
دوًر وتلقى باالمزايين فاتنه=لاجيتها تسقيك من سلسبيلها
قلته وانا ماني رقيبٍ على الملا=ولاني معزبها ولاني وكيلها
لوكنت انا اللي ذايق الويل والشقا=على العنود اللي فؤادي يشيلها
يسيل دمع القاف لامر طيفها=واقول نفسي اه ياطول ليلها
ريم الفلا تاج الحلا شمعة الغلا=منها القوافي مايهًود صهيلها
وادعتها من قلب ميت من القهر=قلبي يوادعها وعيني تخيلها
اتلا العهد تبكي مسى يوم عرسها=واليوم يلعب ورعها في شليلها