كيف أبرر غلطتي والخطا والله كبير
وغلطة الشاطر كبيرة ترى بعين الكبار
آه يا حسره بقلبي كما نار السعير
وتصطلي بالجوف حرّة تزيد النار نار
واعذابي من خسارتك يا عذب الضمير
ليت عيني غمضت قبل لا شوف الدمار
انتهت قصة هوانا وانا قلبي كسير
وانت فكرك من كلامي ترى بالحيل حار
لا تحيّر في هوايا عساك بألف خير
أبك انا اللي صرت مفلس ولا حولي عمار
الليالي ما صفتلي وانا حالي خطير
ومن سبايب غلطتي اصفق اليمنا بيسار
وما جنيت الا الحسايف مع الوضع العسير
والحقيقة قلتها لك بصدقٍ واختصار
ولو يدور الوقت يا بنت والله لاستخير
وما تحرك من مكاني ولو ماصار صار
يا ليال البعد ، والهم ، والوضع الخطير
يا هجوس الحزن ، والروح في وضع احتضار
مايرد الدمع شخصٍ مقفي مستدير
كود يرجع من خذته المنية للديار
بذكرك ياللي بقلبي ترى مالك خشير
كل ما جريت صوتي وهليت العبار
وبذكرك ويا الاذاعة ودقات النذير
وبتذكر وقفتك يوم نزلت الخمار
وبتذكر عينك اللي بها وصف يحير
ميزةٍ تفرق عيون المهار من المهار
لكن بقلبي عتب لا تقول إنه صغير
مادمحت الزله يوم اتقدم باعتذار
في أمان الله وارجوك تذكرني بخير
كان لي في وسط قلبك معزة واعتبار