هذه ردية قديمة جدا بيني وبين الشاعر سعد بن جريبه وأتمنى أن تحوز على رضاكم
سعد بن جريبه يقول :
سر ياقلم وأكتب جزيلات الأبيات=
أبيات شعر تحتويها الجزاله
أبيات شعر في المعاني قويات=
حق الرفيق اللي كثير الغلا له
هو صاحبي وأبدي عليه الخفيات=
عون الرفيق اللي تضايق وجاله
له في دروب الطيب روحه وجيات=
الجود عمه ومنبع الطيب خاله
مني لبن متروك حلو التحيات=
مضمونها تقدير والخير فاله
يقوله اللي شايف كل مافات=
شوف العيون الشوف ماهو خياله
من موقف بالضيق في ماض الاوقات=
بين بها الأصحاب كل في حاله
بين بها خوة نفوس رديات=
خوة على ماقيل درب السهاله
وبين بها خوة نفوس عزيزات=
شرواك يااللي مالقينا مثاله
أقولها من خاطر في سجات=
يوم الردى والطيب حضر مجاله
خالد على ماقيل راع الحميات=
سيف مجرب ماندور بداله
مالي ورى مدحي مقاصد وحيلات=
هذا كلام الحق والكل قاله
مدح ثبته القول وأفعال بإثبات=
ماهو على ماقيل مدح الجهاله
وختامها مني سلام وتحيات=
للصاحب اللي من تضايق سعاله
رديت أنا وقلت :
يامرحبا وإعداد وبل المخيلات=
يامرحبا باللي لفا بالرساله
يقولها شخص ظروفه صعيبات=
حيثك تعرف بكل ماهو جراله
شخص معك دايم على صدق نيات=
شخص علشانك يضحي بحاله
يابن جريبه مرحبا عشر مرات=
إعداد ما بالكون نوع وسلاله
أنا معك لا صار بالوقت ميلات=
لأجلك أشو ف الموت وأوقف قباله
اللي فعلته غصب ماهو جمالات=
واجب علي ولاتحسبه جماله
شفني معك في كل شدة وضيقات=
من يوم بعض الناس بين خماله
عندي نصايح وأعتبرها وصيات=
مافيه غيرك واحد قلتها له
أعذر رفيقك لو حصل منه هفوات=
وأترك رفيق المصلحه والضلاله
وابعد عن أصحاب العلوم الرديات=
وأمسك طريق المرجله والبساله
ولاشفت من صاحبك زله وصدات=
راجع حساباتك بوقت مضى له
هذي نصايح وأعتبرها هديات=
من يوم شفت النصح حضر مجاله
وإن كان هرجي فيه نقص وزلات=
أبيك تعذر صاحبك وأتعفى له
والخاتمه صلوا بخير الصلوات=
على النبي اللي بعث بالرساله
خالد بن متروك