الله ياعام قضيته بالحفر .......... الله يامحلاك ياذيك الليال
مرت سنه والثانيه هذي تمر .......... والذكريات بوسط راسي لاتزال
يوم(ن) أبو هادي ليامنه حضر .......... في شوفته راحه وفرحه وإبتهال
هذاك خالد وأسمعوني يابشر .......... اللي بطيبه ماخذن كل الخصال
أنا أشهد إنه بالمراجل مقتدر ........... وأنا أشهد إن حلياه بالدنيا قلال
وأنا أشهد إنه حايزن كاس الفخر .......... بالطيب والخوه وزينات الفعال
من روس قوم ماتهاب من الخطر .......... رفيقهم مايشتكي جرد الليال
مطير دايم صيتهم فوق القمر .......... والنعم فيهم قلتها والكل قال
تعال ياقرطاس وأكتب ياحبر .......... مادام طاري المدح حضر له مجال
وقم يانديبي شغل الجمس الحمر ......... وشيك على البنزين والزيت بعدال
وأفحص جميع محركاته والكفر .......... شيك عليه وزد له الما بإعتدال
جمس جديدن مايهاب من الوعر .......... يعجبك لامن جر بدروب طوال
أمسك طريق القاعده وأخذ الحذر .......... ترى طريقك به عبور للجمال
ثم لف مع درب الرياض اللي يمر .......... بالقاعده طريق وأترك أهل الشمال
وروح جنوب(ن) ياعسى دربك خضر .......... إلين ماتوصل مداهيل الرجال
ومع لفة أهل الغاط خذها وأستمر .......... وللعبدلي أسأل ماهو عيب السؤال
ولامن وصلت العبدلي صل العصر .......... وأسأل وتلقى بيت وافين الخصال
في مجلسه تلقى معاميل صفر .......... والعود الأزرق سايقه بين الرجال
وقله يبلغك السلام ( أبو عمر) .......... ويسأل عن أحوالك عساك بخير حال
ولا ساق لك فنجال حطه وأعتذر .......... نيابة عني على قطع الوصال
وأن كان أبو هادي قبل منك العذر .......... فأسلم وأخذ فنجان من صفر الدلال
وأن قلت أبمشي قال لك مامن مفر .......... إلين تستوفي حقوقك بالكمال
ماهي غريبه منك ياذيب الوعر .......... صيتك على ياصاحبي روس الجبال
لكن عندي كلمة(ن) بالمختصر .......... بقولها وأضرب عليها لك مثال
خذنا من الدنيا مواعيظ وعبر ..........وجربت أنا جملة من أصناف الرجال
بعض الرجال تغيب لاحس وخبر .......... وتنسى مواجيب الصداقه والوصال
إن قلت تجهل بالمراجل ذا خطر .......... وش فايدة لبس العمامه والعقال
والبعض منهم جيته مثل المطر .......... شرواك والله نادر بين العيال
تسلم يابوهادي من صدوف القدر .......... في ذمتي ماأنساك مهما الوقت طال
والخاتمه صلوا على خير البشر .......... على النبي بإعداد حبات الرمال