باقـي علـى فـوت الثريـا ليالـي=عقبـه تحـرى للكليبيـن وسهيـل
ياعاشقـن بـر الكويـت الشمالـي=لاهل نجم سهيـل لاتامـن السيـل
هذاك هو شفـي ونومـاس بالـي=عزلي عن الانذال والقـال والقيـل
أروح وأقطـع ساقتـك ياخيـالـي=حيثـك تودينـي لذيـك المداهيـل
منزالنا يـوم البخـت راس مالـي=ومدهالنا يـوم الضعايـن مراحيـل
ومقطاننا يـوم أحتمينـا الجمالـي=في ساعتن تنعت بها سبّـق الخيـل
ومرباعنا يـوم أقتسمنـا الحلالـي=يـوم السبايـا والمنايـا محابـيـل
يامـا تناتقنـا الرشـا بالحبـالـي=وياما بلشنا فـي السرايـا مداخيـل
ويامـا تعلينـا بـروس الجبـالـي=وفزنـا وزبنـا الرجـال المشاكيـل
عاداتنا الطـالات فـي كـل حالـي=ورث الجـدود معقليـن المهابيـل
نورد على الجـم القـراح الزلالـي=ندنـي مجاديلـن ونقفـي مجاديـل
هذا علـى الجمـة يفـر المحالـي=وهذا على الجيلان يركي المحاميـل
أجموعنـا بنـي أعـم وخـوالـي=ماحولنا مـن يزرعـون المشاتيـل
أفعالنـا وأبـدي بهـا بالجـزالـي=أفخـر بهـا وأعدهـا دون تمثيـل
وأنا عن اللي فـات يامـا حكالـي=جدي وقهويتة مـن البـن والهيـل
وأخـذ يـرد علومـة أول وتالـي=وأنصّت في هرجه وسقت الفناجيـل
اللي على نصحـه يزيـد أنفعالـي=على الصخى وأمباشـره بالتهاليـل
نصحه ثقيـل وشيمتـه بأعتدالـي=حصيلهـا ماقـال طـه وجبـريـل
يقـول لاتامـن لكـيـد المـوالـي=أحرص من اللي رفقتة رفقت أهذيل
مـن لا يبادلـك العطـا لاتسـالـي=خله ورزقك عند منشـي المخاييـل
ومن لا يعزك في الرخاء وأنت سالي=في اللازمة سكر عليـه الصواميـل
ومن لا فزع لك في الوغى والقتالي=في لازمـة خلـه يـروم المهازيـل
عدو عينـك عنـه شـد الرحالـي=في جيرته لاتعطـي الكيـل بالكيـل
ترا الردي يودع لـك المـر حالـي=يزهى بهرجه مثل زاهي الخلاخيـل
لاحتاج لك في الوقت قال أنت غالي=واليا أغتنى قصّر عليك المواصيـل
في الشمس مالك عند بيته ظلالـي=ماهو من اللي في الكرم يذبح الحيل
يقفـاك بالنمـة وسـرد الطوالـي=ويقلب على قولك عظيـم التآويـل
يلهيك ويجـرك بطـرح السؤالـي=واليا خذا هرجـك غدالـه تعاويـل
وأوصيك في عشرة قـروم العيالـي=اللي على النوماس دايـم حلاحيـل
راعي الوفـا ذرّوة كريـم السبالـي=اللـي تعزوابـه قلـوب المناحيـل
وأنا عن الشمـات كونـي لحالـي=أخير لـي مـن سارديـن التعاليـل
نقالة الهرجـة علـى مـن يبالـي=مورديـن سمـان سـود الغرابيـل
ماني مع أهـل الطيـب ياهملالـي=رجـال وأميّـز كـلام الرياجـيـل
عاقل وماخذ طيـب عمـي وخالـي=ولاهمنـي ماينقـلـون المهابـيـل
لو كان وقتي في الهوى ماصفالـي=أكيـد مابدلنـي الـوقـت تبـديـل
كرامتـي شفهـا محـل العقـالـي=عندي قناة النفس غايـة وتوكيـل
ماطيّحتنـي لوعتـي وأنشغـالـي=صدري وسيـع وكلبوهـا تساهيـل
أن روّحت هـذي مـراح الهلالـي=القى عوضها في الليـال المقابيـل
وأن وافقت هـذي طـرا ماطرالـي=تغني عن اللي يسحبـون الشماليـل
أمـوت ماصاحـب ردي الخصالـي=اللي منزل شيمـة النفـس تنزيـل
واللي على تذليـل نفسـه عنالـي=غنت عذاريبـة وجـرت مواويـل
قلـه يـدوّر يالجـواري بـدالـي=لايرتفع للراس يقعـد علـى الذيـل
ماله معـي ياطيـر شلـوا مجالـي=مـادام ملبوسـه ثيابـن سماليـل
أنـا عطيتـة بالوفـاء مابـدالـي=يوم أن قـدرة بالشقـى والبهاذيـل
وقفت له وقفت وفـاء يـوم جالـي=ووطيت له روس العـدا والعواذيـل
وفزيت لـه فـزت فهيـد الرمالـي=اللي علـى عمـة يـدز المراسيـل
يقول ياعمـي تـرا اللـي غدالـي=قدرك بعيني وأنت طعـت الاقاويـل
غدرت بي وأنت السبب في أرتحالي=طلّقت مـن سبتـك قمريـة الجيـل
طاوعت بي هـرج حشـا مايقالـي=من روس قومن يقلبـون التماثيـل
دربـاس ينقلـك ودايـس يلالـي=كـل يبـي يشعـل فتيـل القناديـل
ماهوب حقن سلب حكمـي ومالـي=وأنت السند في الوقت لاطالني ويل
هذا وأنـا مثلـه ضربـت المثالـي=وسجلتها من فوق بيض الكشاكيـل
وأنا لو أشكـي مرقـدي ماهنالـي=ماكان ذقت النوم فـي تالـي الليـل
يشهد علـي الله عظيـم الجلالـي=اللي مسجل سيـرة العبـد تسجيـل
أن الغياب أحـرق علـي الطحالـي=وكبدي تشادي فوح صفر المعاميـل
وعيني غشاها السهد من ماجرالـي=الها سنـه وأكثـر تهـل الهماليـل
ونفسي بلاها سقمها مـن خمالـي=أتعبتهـا بالدكـتـره والتحالـيـل
بين الرجاء واليـاس والانفصالـي=مغيـر أعدلهـا ولاشفـت تعديـل
وأصبح دواها يالجـواري محالـي=معطله من ويـن مـاروح تعطيـل