سر ياقلم واكتب من القـاف تعبيـر=واكتب عسى الميـلات مـا يوالفنـا
هل المطر واستبشر القـاع بالخيـر=في كل روضٍ فيـه عشبـه زهنـا
من مزنةٍ هلـت مطرهـا شخاتيـر=وأحيت هشيم القـاع مـن موتهنـا
والحيـن سجـل باقلـم بالتساطيـر=يوم المعانـي احضـرن واحضرنـا
قم يانديبي فـوق طـرز السياييـر=مـن وارد البابطيـن تـو وردنــا
مع خوة اهل الجود نسـل المناعيـر=فـي معرفتهـم ياعـرب مكسبـنـا
ناس لهم في ثومـة القلـب تقديـر=ياحيـث ظنهـم متفـق فيـه ظنـا
ونلفي علي ريضان في جوها غيـر=تشرح صـدر منهـو عليهـا تعنـا
ياماحلا الدوجات في حـزة اعصيـر=وسط الريـاض وكـل ريـحٍ تخنـا
يازين جوٍ كاسـي القـاع تخضيـر=والورق في زيـن اللحـون ايتغنـا
وشوف البختري والنفل والنواويـر=تفرج لمـن قلبـه همومـه طونـا
ونبني علي ذيك الفياض المخاضيـر=خيمـه تظـم الشمـل منـا ومـنـا
مـع خـوةٍ مـا يقبلـون المعاذيـر=كـلٍ يهيـم بشغلـتـه لاشتغلـنـا
وهـذا يعلـق للذبيحـه شناكـيـر=وهـذا يقطـع باللحـم فـي صحنـا
وهـذا يضبـط مجسلـه بالتدابيـر=وهـذا يولـع نارنـا مـن حطبنـا
وهـذا وقـد جهـز ادلالٍ مباهيـر=امخالطـه مسمـار وهيـلٍ وبـنـا
والليا لفانا الليـل والحـال تيسيـر=وشـوف النشامـا باللقـا يفرحنـا
ودارت سوالفهـم بزيـن التعابيـر=ياحيـث كـل اعلومهـم يسعـدنـا
وبعد العشا كلٍِ يمسـي علـي خيـر=في لحف عن بـرد القـوي يحلفنـا
وعلي صلا ة الفجر همنـا بتكبيـر=من قبل نبدا الفـرض نبـداه سنـا
ومع طلوع الشمس ننوي علي السير=يـم الفيـاض اللـي لنـا يذكـرنـا
مع الرجال اللـي تحـب المشاويـر=علـي جديـد الطـرز هـو منوتنـا
ودجنـا وشرفنـا بذيـك المظاهيـر=ونظارنـا فـي شوفهـن يمتعـنـا
مابين روض وبين عشبٍ مزاهيـر=روضٍ خضـر فيـه النـدا ينعشنـا
واعطيتكم عن ماحوي القلب تقريـر=وهذا كلامي ومصرف الهـرج عنـا
واختامها صلوا عدد رفـرف الطيـر=علي النبـي وارسالـة منهـج لنـا