ياهاجس البـارح عليـك السلامـا=عديت فيني فـوق روس المراقيـب
تهيّتنـي فـي سجـة الانسجـامـا=وسرحت بي في تيهتك سرحة الذيب
وأنا خصيمـك وأعتـزي بالظلامـا=من يوم جاني طارشـك بالمكاتيـب
كنت أحسبنك برد وأثـرك سلامـا=داويت روحي والجروح المعاطيـب
وأنا لي أكثر من سنـة فـي هيامـا=وهم وولوالـن وضيقـة وتعذيـب
وأنت الشفا من بعـد رب الدوامـا=ولولاك مالـي بالسعـادة مكاسيـب
رديت فكري ليـن فكـري تحامـا=وعديت جزلات المعانـي تراتيـب
شطرن يجي وآخـر قوافيـه آمـا=وشطرن يراودني على قفلة الإيـب
اليا كتبـت الصـدر عجـزة تدامـا=من الجزال أفكار ومن العطا صيب
ياخذ من المعنى العفيـف المسامـا=ويحش قسمة حش شلفى تراحيـب
ينحت صخر نحت الحجر في تهاما=والا كما الرجمة بروس المراقيـب
في خايـع سيلـه يخلـي الحيامـا=يدلن على الساقي سواة الطواليـب
خـدة قفـر وابيـان نبتـه خزامـا=ومـن التويبـع ماكحتـه الدواليـب
كاسيه رب العرش مسقي الضوامـا=كسو الرعاف اللي بحرش العراقيب
غيثن مـن اللـي طالبـة مايضامـا=عـلام ماتبديبـة الشمـس وتغيـب
عله علـى الزلفـي وينهـل شامـا=ويمطر على دار الكرم ديرة الطيب
دار الربوع أهل النفـوس الحشامـا=لطامـة العيّـال عكـف الاشانيـب
ويسقي وطن منصور نسل الكرامـا=الصاحب اللي مادخل نسله الريـب