ياعيد قل للزيـن لارحـت يمـه=يلطف على حالن فراقـه قسمهـا
قله شبيب مـن الجفـا زاد همـه=وعليك نفسـه همهـا مارحمهـا
قامت همومه وسط قلبـه تخمـه=وحاله تقطع جلدهـا مـن لحمهـا
وجسمه تبعثر مالقى مـن يلمـه=وروحه بدت تزهق ويقضي نسمها
من العنـا والبهذلـه فـار دمـه=وسط الحشا ناره تواقـد فحمهـا
من وين ماوجه يشـوف المطمـه=دورات بقعا يـوم تفتـح بفمهـا
واللي بقت حوله نفوسـن تذمـه=تبدي ظليمتهـا وهـو ماظلمهـا
عوق الصحيح وعادلين المرمـه=اللي تدسم خبثهـا مـن شحمهـا
قلبن توسوس به وقلبـن تسمـه=مثل الخشوم اللي تزايـد عرمهـا
مجلاسهم مابيـن حقـدن ونمـه=ناسن على قول المثل ماهضمهـا
ولولا المخاف بنار بعـدك تزمـه=وياخيبة الهقـوه متـى مانهمهـا
كد فرقـت مابيـن ناسـن ملمـه=عـذال والعـذال محـد فهمـهـا
راحت ضحاياهـم رجـال مهمـه=وحتى الهلالي في قصيدة شتمهـا
يحكالهـم والنـاس كلـن بيمـه=وياويل من مثلي بعشقـه لزمهـا
وأنا وجودي وجد عايد على أمـه=اللي نهار العيـد قـام وعدمهـا
حكم عليها الشيخ من دون ذمـه=وبالموت في حكم الظليمه حكمهـا
وقاموا عليها الناس وعيال عمـه=هذا يكتفهـا ..! وهـذا حزمهـا
ووقف ودمعة يدمر اطراف كمـه=وصلى عليها من بعـد مارجمهـا
وأمسى يصيح بعالي الصوت يمه=ويشقق إثيابـه ويمسـك قدمهـا
وتطري بباله يـوم يـورد لجمـه=ويملا رشاويها ويسقـي غنمهـا
مـن الحسايـف قبرهـا مايدمـه=يحرث نصايب حفرتـه ويهدمهـا
مقابله فـي راس عالـي المقمـه=عبرات عينـه عقبهـا ماكتمهـا
من بعدها جوه غـدا فيـه غمـه=تماكنـت منـة الليـال بوهمهـا
وأنا أشتكيت أمري على من يتمه=اللـي مقابيـل الليالـي علمهـا