أثر القلوب الرهيفه مالها راي = لو تنجرح ماتتوب من الغنادير
هذا ولانيب قايل مثل شرواي = أنا عن أقلوب طرّاد الهوى غير
لي قلب ماهوب لي .. لويسكن حشاي ..! = للي طيوفه تعنيني مشاوير
قلبي معه : وأن زهمني جيت شكاي = وأشواق قلبي على شوفه طوابير
ماجيت ناصيه : قلب وراح برضاي = قاصد حسين الدلع حلو التعابير
اللي جرح خاطري ما دورّ دواي = وخلا عيوني من أسبابه مساهير
أن جاء وعد منه جيت أسابق أخطاي = وأستعجل الامر مني دون تأخير
من الفرح في لقاه أسرع وأنا جاي = أخاف.. لاياخذ التأخير تبرير
وأن جيت عنده نقلت برجعتي داي =وأروح ماقلت له تصبح على خير
يحدني في هواه المرّ لاقصاي = بيني وبينه خصام كليب للزير
أسير الاشواق لاجله رغم بلواي = في غيبته ياثقل دم التفاكير
يزورني في المنام ويسحب أرداي = لاشفت من حضرته في الوصل تقصير
يعني لياشافني ضايق بدنياي = علمني الصبر وأخطار المقادير