(صوت) : فهد عوض البريكي ...
الجادل اللي صار غيري حليلها=الله يسامحها ويسر سبيلها
صدت وأنا صديت والخاطر أنجرح=من عقب ماني بالموده خليلها
صدت غصب ماهو بكيفي وكيفها=حكم الظروف اللي غصب ننحنيلها
صادفتها بالسوق من قبل عرسها=تشري شراياها وتشري كليلها
خزيتها والنار فالقلب تشتعل=ودنقت ودموعي تزايد هميلها
وطلعت من سوق ((الجمال)) وتركتها=ولا لقيت ألا البيوت أرتكيلها
الله وأكبر يالزمن كيف خنتنا=عزي لحالي بالهوى وعزتيلها
وياحمود نفسي من عنا البعد ضايقه=وروحي بعدها حان موعد رحيلها
وأنا على سنة محمد وملته=وراضي بقسم اللي كفيلي وكفيلها
(صدى) : حمود دليبح الساحلي ...
الله من عين جزت من مقيلها=فزًت وعيا نومها يستويلها
سالت مدامعها وشامت عن الكرى=اسباب ناسٍ باالهوى تشتكيلها
ماغير اداحم صلف الابيات باالخفى=اما تجيني طوع والا اجيلها
انا ليا هاضت وفاضت قريحتي=اصول فيها لين يبرد غليلها
احوف القوافي حوفة الذيب للغنم=واترك هزايلها وأنقي جزيلها
كله سبب من غربلتني قصيدته=نفسه من الفرقى طوى الضيق حيلها
يشكي فراق اللي تجًهز لعرسها=راحت وشبًت في ضلوعه فتيلها
يقول نفسي من عنا البعد ضايقه=وروحي بعدها حان موعد رحيلها
ياابو عوض ماجور من لوعة الهوى=هاذي نهاياته وهذا حصيلها
ابنصحك ياخوك واقبل نصيحتي=ويكفيك عن كثر الدعاوي قليلها
ترى الهوى ياخوك تجرح نهايته=عقب الشهد يسقيك من حنظليلها
مادامها راحت وجاها نصيبها=الله معاها وانت دوًر بديلها
دوًر وتلقى باالمزايين فاتنه=لاجيتها تسقيك من سلسبيلها
هذا وانا ادري حب هالجيل مهزله=فيه الخيانه جعل ربي يزيلها
ترى بنات الوقت ياخوك يلعبن=هذا مخورفته وهذا هبيلها
قلته وانا ماني رقيبٍ على الملا=ولاني معزبها ولاني وكيلها
لوكنت انا اللي ذايق الويل والشقا=على العنود اللي فؤادي يشيلها
يسيل دمع القاف لامر طيفها=واقول نفسي اه ياطول ليلها
ريم الفلا تاج الحلا شمعة الغلا=عليها القوافي مايهًود صهيلها
وادعتها من قلب ميت من القهر=قلبي يوادعها وعيني تخيلها
اتلا العهد تبكي مسى يوم عرسها=واليوم يلعب ورعها في شليلها