السلام عليكم ورحمة الله وبركاته ،،،
تثور الطواري والمشاعر بدون قيود
ولا بيدي حيله يابوناصر واركدها
على الجرح جنها حطت الملح والبارود
تزيد الجروح اللي تعاند واعاندها
احسب الليالي وقتها سهود ويا امهود
ولا ادري بصكات الظروف وتوجدها
واثرها ليا شانت تزيد الجفا بصدود
ومن فتّل اشنابه تحطه تحت يدها
احسب النوايا كلها بيض ماهي سود
واثرها خليط الوان واحبال عاقدها
واحسب الخوي مثلي انا له ظهر وسنود
ليا ضقت ضاق وضيقتي عني ابعدها
واثاريه لا غايب ولا هو بعد موجود
عليه الحسوفه والهقاوي مبعدها
ولا اكثر الرفقه ومن بينهم معدود
مصافيني بروحه وروحي مقيّدها
انا من ظهر رجال حر وعريب جدود
على مسابق النوماس نفسي اوردها
على الطيب والماجوب اجي ماحتري مردود
ولا طبت لجل الناس تمدح واشهدها
على فطرتي دايم احب الكرم والجود
ونفسي علي طبعك وممشاك اعودها
على الله على الله يا يبا والليال شهود
ولا اطيح لو شحة صدوفي مواعدها
بكمل مسيري واتكل بالله المعبود
لي الصبر والقمه تبي من يطاردها