حصري تغطية حفل افتتاح مخيم السيد \ سالم فنيطل العازمي في ام رقيبة
تغطية حفل افتتاح مخيم السيد \ سالم بن فنيطل العازمي
في ام رقيبة وقد حضر حفل الافتتاح العديد من وجهاء قبيلة العوازم و اعيانها ووجهاء من القبائل
و اقيمت امسية شعرية أحياها العديد من شعراء قبيلة العوازم وشعراء من قبائل أخرى
ويسرنا ان نعرض لكم هذا المقطع المتواضع الخاص لمنقية السيد سالم بن فنيطل العازمي
السيد \ سالم بن فنيطل العازمي
ونترككم مع التغطية لحفل إفتتاح مخيم
السيد \ سالم بن فنيطل العازمي
صورة مخيم السيد \ سالم بن فنيطل العازمي
صورة من منقية السيد \ سالم بن فنيطل العازمي
الأمير فلاح بن حبيب بن جامع
الأمير فهد بن فلاح بن جامع أثناء إلقاء كلمته بالحفل
الشاعر بردان العنزي أثناء إلقاء قصيدته
الشاعر مناور بن خضران العازمي أثناء إلقاء قصيدته
الشاعر عبدالكريم الجباري أثناء إلقاء قصيدته
قصيدة الشاعر / عبدالكريم الجباري
من قبل لا ادخل لجنة الشعر وانجزت=شعري مع ذويقة الشعر جايز
وانا احمد الله ما بعمري تهزهزت=وثبت في ميقاف شعري ركايز
لو شفت في معنى قصيدي وركزت=ما تلحق ابعاده بدربيل سايز
سلام ياللي في فعولك تمركزت=ورقيت مرقاب من الطيب نايز
وقنيت لك من خيرة الذود وابرزت=صفرن عجز عنها عيال العجايز
انت اللز قدة اليامن تلززت=وذودك فلا له في مديحي عوايز
الذود فيها زود ياللي تمطعزت=من دونها تشوف جدع الجنايز
يا ابن فنيطل جبت علم وتميزت=وجعلك لكل اللي تمناه حايز
وان قدر الله بالنتايج ولا فزت= تراك بقلوب الملايين فايز
جمعت بني عم عليهم تعنزت=تسوى ملايين الذهب والجوايز
الشاعر مجبل الحشاش أثناء إلقاء قصيدته
الشاعر مساعد بن جبران أثناء إلقاء قصيدته
قصيدة الشاعر : مساعد بن جبران
يالله ارشدنا وزيّن مبتدانا=واجعل اخطانا على خيرٍ وخيره
مع طريق الحق لا تقصر مدانا=بالمهمات الصغيرة والكبيرة
ثابتٍ وقت المهمة مستوانا=والكلام الحق ما يخلف مسيرة
كان قول الصدق فالموقف خطانا=والله انا ما ندّور درب غيرة
طول الله عمر رجالٍ دعانا=لين خلانا نجي من كل ديرة
وافيناً طيبة ومعروفة كسانا=للعوازم ذكرنا سالم سفيره
للتنافس والكرم فعلة شعانا=يا الله التوفيق والفوز وبشيره
والفضل للي مقدرنا وجانا=في محل ابن فنيطل والعشيرة
في بلادٍ فالمواقف ما نسانا=يوم قاد الصقر توحيد الجزيرة
في سنع عبدالعزيز الله هدانا=ما ذخرنا دون ابو تركي ذخيرة
اعتصمنا بالولي والله حمانا =لين صفينا المهمات الاخيرة
قائدٍ وحد وابالله استعانا=عز شرع الله وعم الكل خيره
فالمسار الاولي تمشي اخطانا=دام لهل الدين فالدنيا بذيرة
للخليج وكل قاداتة ولانا=اسمنا ما يختفي في كل ديرة
والكويت اللي من الغالي عطانا=يفظ الله شعبة الوافي واميرة
حافظين العهد ويذري ذرانا=فالعلوم الطايلة ولا القصيره
ما تفلي في مفالينا عدانا =خصمنا يرضخ ويقنع بالكسيرة
ولاننقص شئ من حق اخويانا=الوفا والصدق مع فزعة وجيرة
من صفاة الخيرين الله حبانا=من جنح للسلم ما نجرح ضميره
وعن كلام الحق ما نخفي نبانا=ساعةٍ فيها سعة ولا خطيرة
ولا نقول ان العرب صارت ورانا=الخطا والظلم ما نسمع شويرة
نعم في كل القبايل واحدانا=ما عليهم زود وسيوفٍ شطيرة
طول الله عمر رجالٍ دعانا =لين خلانا نجي من كل ديرة
مراقب المجالس الشعرية والادبية الشاعر خالد بن سكران أثناء إلقاء قصيدته
قصيدة الشاعر / خالد بن السكران
في محل أهل الكرم والطيب ورجـال الحميـه = جيت أغني وأبـدع القيفـان وقـدم سلامـي
ياسلام الله سلامـن عـد بـرق الموسميـه = عند ربعي تاج راسي مسندي عوني حزامـي
جيت في دار أهل العوجا صناديـد البريـه = الملوك شيوخنا ساس الظفر عوق الخصامي
هم حماة الديـن والتوحيـد عـدوان الرديـه = من نوى للمملكه بالشـر يبشـر بالعدامـي
تحت حكم الحر أبومتعب سليـل الوايليـه = المليك أبن المليك أبن المليك أبـن الأمامـي
عـز داره ليـن وصلهـا حـدود العالميـه = كل شعبه يفتخر به كاسبـن كـل أحترامـي
جعل يبقى طول عمره ذخر وعزومـه قويـه = يحفظه رب البريه مـن خفافيـش الظلامـي
قلتها وأنا كويتي من ديـار أهـل الحميـه = دار أخو مريم صباح الطيب مدهال الحشامي
بيض الله وجهك أتنومس ولك منـي تحيـه = بالنيابه عن بني عازم رفيعيـن المقامـي
الشاعر علي بن مذكر أثناء إلقاء قصيدته
قصيدة الشاعر / علي بن مذكر العازمي
بديت بذكر علام السريره=هو المعبود لا معبود غيره
كمن المبتدا بالله طيب=رفيع الشان لا إله غيره
بعد ذكره نويت ابدا القصيده=بيوت الشاعر اللي من ضميره
ابنظمها كما نظم الجواهر =واقدمها هديه للعشيره
هديه للرجال اهل المواقف=أهل فزعه وأهل خوه وجيره
لهم شكري وكل الأحترامي=هل الفزعات وسيوفن شطيره
على شانك يابو حمدان جينا=نباركلك وندعم بالمسيره
ألا ياسالم ارفع دوم راسك=ترانا معك بجموعن غفيره
ترى لولاك ياسالم ماجينا=كلام الصدق مابه شي غيره
ترانا كلبونا جنب سالم=من أعلى نجد لأطراف النجيره
رجالن مانعرف الذل دايم=ولنا عادات ما خنا القصيره
ليا شفنا من الجاهل خطيه=نحفظ السد مابحنا السريره
ولن شفنا من الثاني تحرك=ترانا نشبك اسلاك الظفيره
وترانا مانخون العهد دايم=ومن يخطي قطعنا خط سيره
ترانا مانحب أهل الظليمه=ومن يظلم تحملها ضميره
ألا يالابتي ياتاج راسي=تراكم راس مالي والذخيره
يقوله شاعرن من روس ربعه=يبين إمع الحدث من عرض غيره
يبين إمع البحور اللي تلاطم=وله بالمعرفه قصه وسيره
ولابه زود عن كل القبايل=ظليمتهم على مثلي كبيره
واختمها مثل مبداي الأول=بذكر الله علام السريره
مشرف المجالس الشعرية والادبية الشاعر حمود الساحلي
قصيدة الشاعر : حمود الساحلي
بسم الله ابـدي ياعـرب وابتديبهـا=من هاجسٍ جزل المعاني يصيبهـا
عقًـب قصيـدٍ ماينومـس بلابتـه=لاقـام يقـدح باالمعانـي اديبـهـا
يابن فنيطل ياعسـى فالـك السعـد=بعض المواقف مالها غيـر ذيبهـا
ياكاسب النومـاس والجـود والثنـا=انا اشهد انـك باالمراجـل لبيبهـا
لك مجلسٍ فيـه المناعيـر تجتمـع=على الفخر والعز مذكـور طيبهـا
فيه الدلال تفوح من حدرها الغضى=علـى النشامـا مايهًـود صبيبهـا
نقلط على عز ومعزه على الشحـم=بين الرجال اللي تنومس صحيبهـا
مثلتنـا باالصفـر لاهـان شاربـك=باالنقوه اللي مابهـا اللـي يعيبهـا
صفرٍ تشادي للذهب فـي مناجمـه=عسى المراكز الاوله مـن نصيبهـا
مرخيلها سالـم ولاشـح باالعطـى=يوم ان غيره باخـلٍ فـي حليبهـا
عسى الحسود اللي يلـوج ويخيلهـا=يعمى وعينـه مايحصـل طبيبهـا
طوال الغوارب خرع الاذنين وصفها=فـجً النحـور سبالهـا مرتخيبهـا
ياكنً فيها جفال تربع مـن السطـر=لامن زعج صوته عليهـا يجيبهـا
يقطع بها قفرٍ خلـيٍ مـن العـرب=ماهوب ناشد لو عوى فيـه ذيبهـا
قبله جدوده كد حموها مـن العـدى=بني عطا وقـت الوغـى تعتزيبهـا
كم فارسٍ مطروح من دون ذودنـا=أمسى عشى عقبانها فـي شعيبهـا
تبكيه فـي يـوم المفـارق حليلتـه=ناحت كما الورقى بفرقى نصيبهـا
كد قالها حليـوان باصـدق مثايلـه=مـوارث الجـدًان ماينصخيبـهـا
الشاعر جمعان مجبل العازمي أثناء إلقاء قصيدته
الشاعر ماجد فلاح قليب الذيب أثناء إلقاء قصيدته
قصيدة الشاعر : ماجد قليب الذيب
يوم سجيت القدم رحت مابيلي خوي=سقت رجلي يوم زود الحميا تسوقها
من هجوسن قام رعادها يدوي دوي=ولامطرت منها العطاشا تبل حلوقها
راكب الي يطوي البيد والطرقه طوي=ابيضٍ مثل السحابه تلوح بروقها
وارد الفكسار فالطرق مايهوي هوي=لانطلق مثل الشياهين صعب لحوقها
كن صوته صوت ذيبٍ من الجوع يعوي=ومتساون مع مساو الدروب وعوقها
كن ليته لاشعق مثل براق اعشوي=ولانبلج بين من الارض خافي شقوقها
فوقه الي كن يكوى على كبده كوي=ابلجن نفسه على الطيب زادت شوقها
ناصيلي واحد فالمواجيب احموي=والخصال الطيبه كلبوها يلوقها
واحدن فالطيب يذكر معى كل بدوي=ورايته عن كل رايه تعلت فوقها
سالم افنيطل هو الي هوا الطيب هوي=طيبن يوفي هل الطيب دوم احقوقها
راعي الصفر المزاين والجنب القوي=افتخر يوم العرب تفتخر في نوقها
جعل والله ياخذ الرقم الاول ويحوي=فيج ياصفرٍ كما الشمس عندشروقها
وياعسى ربي يبارك بعمرك يالسوي=وتفتخر فيك القصايد وفي طاروقها
ولجل طيبك نزوي البيت في مدحك زوي=والرجال الطيبه بينن منطوقها
الشاعر تركي بن منصور أثناء إلقاء قصيدته
صورة لوجهاء القبيلة ووجهاء القبائل الأخرى
جانب آخر
جانب اخر من الحضور
الشاعر سعود ربيّع العازمي
يا ضفاف الخليج ويا كتاب الغاوي=اكتب القصه ومعناها مع اسم الراوي
وردها عني وسلم لي على كاتبها=وحب لي خشم الصحيح بحضرت الجداوي
الصحيح ابلغ من الاكذاب يا مروجها=يا مربط خيل كسرى مع احمار الشاوي
تدعي بالعرف وانت بعيد ما انت بحوله=الخطوط معبدة يا خطنا الصحراوي
نزل اشداد المطية واعقل المطيه=ما انت ابن لعبون والا راشد الخلاوي
روسنا تبقى على طول الزمن مرفوعة=ومجدنا ما تكتبة ميادة الحناوي
طيع شوري لا تجي قدام خيل صبحا=لانتخا واحد من العطوان جت نخاوي
النصيحة واجبة والعلم خذ مضمونه=وانت ابوها وسمها يا العالم النمساوي
ان بغيت السلم سلم لي على طلابة=وان بغيت الحرب والله سيلنا نحاوي
ما تخضعنا تحت عبادة الكراسي=الفرس بنت الكحيلة والفحل عطاوي
علم اللي يفرك كفوفه على طارينا=وقلة النجم السماوي باقي سماوي
لا وقف غياض قال قويع سالم وينه=كلنا قلنا نعم بالوادي الحفراوي
قال ابا سالم فنيطل قلت حي الطاري=طوحوا له عقلكم والليل ذيبه عاوي
جا يسوق الطافحه وشرهان فك قيادة=كن صدره باب قصر المصمك النجداوي
غاربه مارق سناد وضافيات سباله=والاذن مثل القطاة ان شافت النداوي
اصفرن مثل الذهب بايدين بنت الباشا=جا من السودة مربه للمزاين ناوي
روحن وراه صفرن يدحمن جنوبه=اخذن منه السنام وجنبه الرهاوي
واخذن راسه وعرقوبه وكل وصوفه=واخذن قلبي وانا المشتاق والشفاوي
كن اخو نوره يناديهن على ام ارقيبه=مشعل اللي ذكره العنبر وعود الجاوي
نجل من جاه الولا منا وسمع وطاعه=والله انا ما نخون ونخلف الهقاوي
الله الله والقصيد اليا طرقنا ابوابه=ساق لي فنجال كيف مهيل الظلماوي
اسرج مهارة واعن الجامح الاصيلة= في يدي مطواع والا الغير معه تلاوي
ما تبا غيري بدون قصور يا ابنا عمي=تعتبرني بعد ابن جافور وحليوان والصقلاوي
وتعتبركم بعد سالم والقفيدي=واعتبر نفسي ماني عنكم غناوي
الشاعر / محمد عوض المحيلبي
سلام الله علي اهل المرجله والمعرفه والجاه =ارجال الطيب واهل المرجله ماضين الافعالي
هل النخوه هل الفزعه وكلن يرفعه مجناه=علي ادروب الفخر والمرجله ماتقصر احبالي
الا يامرحبا بك يافلاح واجبي مبداه = سلايل جامع الي صيتهم بين العرب عالي
فلاح الي ليامنك نخيته مطلبك تلقاه = هديب الشام دايم يا عرب للحمل شيالي
عسا الله يرحم الي بالعلوم الغانمه رباه =علي عز وفخر يمشي ولاهو شخص حيالي
نبي نمشي علي العليا وكلن رافعن يمناه =ومن حاش الرذيله يالربع ماهوب رجالي
وتكرم هالوجيه المنوره والي بعد جيناه = راعي المعروف راعي المرجله والمنزل العالي
اقول الله يبيض وجه سالم والردي يفداه = اعاد اتراث جدانه عريب الجد والخالي
ولا ننسي عياله باللقا تمشي علي ممشاه = لو ان الطيب ينطق قال ذا عمي وذا خالي
يشوف الناس قام اتراثها يمحا وهي تنساه = وبعده ياجماعه جمع الاول مع التالي
من اول دونها سيف المهند والرمي وقناه = وكلن دونها ياربعنا رجلي وخيالي
جمل القبيله وماقصروا عياله والقبيله من وراه
حضور طيب وشعراء مبدعين
ومجالس قبيلة العوازم سباقه في كل تغطية ماهو جديد للقبيله
تقبلوا تحياتي
التوقيع - محمد مريبد الفهيدي
يجيبك الشوق والا تجيبك الحاجه=مصيرك اليا صفعك الوقت تذكرني
اقفيت والحزن عقبك هبت ادراجه=ولابقى الا قصيدي فيك يجبرني
كنت احسب انك طبيب القلب وعلاجه =واثرك تدور على ادنى شي يكسرني
حصري تغطية حفل افتتاح مخيم السيد \ سالم فنيطل العازمي في ام رقيبة
( تقرير عن مشاركة مخالفة ) ، و الموجودة أسفل كل مشاركة .