البارحة ماهملج الجفن بنعاس / من هاجسن بالقلب دق وسرابه
عزي لمن قلبه سرى فيه هوجاس / وعزاه ياقلب يشتكي من عذابه
كني بدار مخلبه مابها أوناس / مثل الطريح اللي شكى من صوابه
رجله كسيره وشاف لوعات ألاتعاس / ماعنده الا جايعات الذيابه
أثر الردى لو قال مايرفع الراس / لو هو قريب الجد وش ينبغابه
ولاني على غيب الاجاويد بلاس / لو كان هذا طبع بعض القرابه
مالي بهم لو تملك الدر والماس / والرزق عند اللي كريمن جنابه
وأتبع هوا الغربي اليا هب نسناس / والوصل مانقفل طريقه وبابه
وصافي الذهب مابدلوا فيه بنحاس / ونقع المطر ماوصفوه بسرابه
ياللي طرقت الباب وتدق ألاجراس / والحق معروف خطاه وصوابه
ياللي بنيت البيت ثبت له الساس / وبيتن بليّا ساس يصبح خرابه
وحجه بدون شهود ماتقنع الناس / وكلن على قده يفصل ثيابه
والناس قالولي ترى الساس نداس / والرجل يعرف مقصده من جوابه
ولا أقارب الحيّه وأنا عندي احساس / ابعد برجلي عن جسدها ونابه
بالك تدوس الحد والحد مايداس / ولاتعتزي في سيف يرقل نصابه
وقد قالوا العربان ياطابخ الفاس / ماحاصل منها مسره وثابه
وانا قنعت وكل شي له قياس / وأترك أهل النمات وهل الحزابه
يالله لاتخيب رجانا بالآفلاس / يارب ياللي كل مسلم رجابه
يامحيي غصون محيله ويباس / ياباعث خلقه بموعد حسابه
وعداد ماتبدي أنجوم بالآدماس / أختم جوابي بالنبي والصحابه