الضيقه اللي تجي وتروح يا ابو سعود= عانيتها يوم غيري عاش ما ذاقها
اسهر معاها ليا صار الخوالي رقود = واكتم أحاسيسها واشقق اوراقها
ما بحت سدي لو ان الضيق بيّح سدود= بالقلب ما تطلع الكلمه من اعماقها
ولا عشت رجلٍ شرود ولا أحب الشرود= طبعي كذا والاوادم حسب خلاقها
كلمه وراحت عساها ثانيه ما تعود = من بعد ما قلتها واطلقت ميثاقها
ماهو بحق الرجال اللي تحل العقود= لا والله ألى على الواشين واخلاقها
عديتها والحقيقه غايتي والشهود= وارتحت دام الحقيقه ما حدٍ عاقها
ويا صاحبي لو يحك العود في راس عود=بالازمه ما نهاب النار وحراقها
صحيح من يجحد المعروف يسمى جحود = لاشك يا صعب هالكلمه لنطاقها
اقولها والصراحه طب مرضى الكبود= وان كان نفسك مريضه جاك ترياقها
واليا استوّن الليال البيض بالعين سود = سلم على دورت الدينا وعشاقها
[/quote]