السوالف ماتودي
من بغى يرقا العوالي مايوديه الكلام = السوالف ماتودي ولا تفيد اللي هرج
العهد لامن عطيته يلزمك بالاحترام = احترم كل الكلام اللي من لسانك خرج
شد حيلك واعقد النيه وتحزّم بالحزام = وخل بالك بالصعود ورجلك بأول درج
لا تهاون في مسيرك مد شوفك للأمام = امش في خط متوازي وانتبه له لانعرج
كل شي وله اصوله امش به حسب النظام = لاحد (ن) ينقد عليك ولا يقولون استرج
لا ضربت اوجع وخل الضرب في صم العظام = لا تنطّر فزعة الفزّاع وساعات الفرج
الصبر مطلوب لكن ماهو بكل المهام = والصبر لا زاد بإسم الياس سجّل واندرج
ما ورا العربان كايد ما خفى حدر اللثام = كل واحد يخفي عيوبه ولو انه عرج
كل رجل ( ن ) له مقامه ما هم بنفس المقام = وكل (ن) ومدة يديه وكل (ن) لناره سرج
والعذر لاهل العذر ما كل من قصّر يلام = لا على الجاهل ملام ولا على المعسر حرج
محسن المحيلبي