الخطب الجلل
ياظلام الليل والمسرى طويل = ببذل الاسباب واتخطى بعجل
اتحرى الصبح بعيوني واخيل = ينبلج نوره مع النجم ويطل
ماقطعت الراي بأمر (ن) مستحيل = ناوي النيه ولا زال الأمل
متكل بالله وهو نعم الوكيل = ويهبا الشيطان واللات وهبل
هذي اول خطوة (ن) بالألف ميل = قالوا ان اللي مشى بدرب ( ن ) وصل
ليه تسألني يابو طرف ( ن ) كحيل = في برود اتقول ويش اللي حصـل
ماتشوف بعينك الجسم الهزيل = او هو عاده عندك اسلوب الهزل
هذي جروحي مليت إبها الشليل = ولا بقى لزيادة جروحك محل
مجهد ( ن ) نفسي ولا ، لاقي حصيل = صرت مثل النحل بس اصنع عسل
منّك احلى شي ذقت الحنظليل = بيدك أشرب منه لين اصبح ثمل
ولا يهنى لك عيش ولا يبرد غليل = لين تصلاني بنارك واشتعل
لا خطر في بالك ترد الجميل = وترفض الأحسان من جنس العمل
يابخيل الكف ، يالكف البخيل = الكرم ماحد ( ن ) يجازيه ابخل
لا بغيت اوصف وادور لك مثيل = شفت في وصف الصبخ مضرب مثل
قاعك الصبخا علي مجرى مسيل = والشعيب ان سال زادت بالوحل
غصت فيها لين ضيعت الدليل = والمطر من فوق راسي ينهمل
قستها في كل حالاتي عليل = وما على الغرقان من زود البلل
ادري أن بعدك مثل جمر المليل = وادري ان فرقاك ( ذو خطب (ن) جــلل )
بس تدري ليه قررت الرحيل = لن حبك فيه قصاف الأجل
محسن المحيلبي