عيدك سعيد
جعلك بخير وعوافي ياغالي كل عام = ياعسى عيدك سعيد وعسى عمرك مديد
غيرك نعايد عليه برساله والسلام = وانت نصخر لك قوافي ونبدع لك قصيد
ماذخرت الشعر دونك ولا عذب الكلام = ولا كتبت بغير شخصك قريب ولا بعيد
يابلابل غردي وانشدي له ياحمام = نغمة الافراح لاجيتي من فوق الجريد
لو تغيب بيوم عيدي تغشاه العسام = ولو حضرت بيوم حزني يصير اليوم عيد
الليالي دون نورك كوابيس وظلام = ليلها حالك وموحش ونسناسه جليد
ساعة (ن) جابتك تحمد وفيها الحظ قام = بارك الله ساعة(ن) جابت الحظ السعيد
حبك اللي نازل (ن) بالحشى نزل الكرام = والمشاعر من حواليه خدّام وعبيد
من زرعتك داخلي وانت تحظي بإهتمام = من رجى حصدك ويسقيك من دم الوريد
اعشقك حتي الثماله وفيك القلب هام = وادري اني وسط قلبك انا الحب الوحيد
دوك شعري والغلا واصدق شعور الغرام = صغتها لك حول جيدك مثل عقد(ن) فريد
هذي عيديه عساها تجي قد المقام = توصلك والناس عقبك ترددها نشيد
محسن المحيلبي