يالقهوجي عطني من البن فنجال=ودبل لي الفنجال خل البيايل
تراي انا يالقهوجي ضايق البال=والهم وسط الجاش صايل وجايل
يالله تساعدني بترتيب الامثال=ابيات شعرا" بالمعاني جزايل
وان كان ماجني سمينات وجزال=ولا بلاش من المثل والمثايل
ماقلتها من شان وش قيل وش قال=ولا على فرقا طويل الجدايل
للعلم ياأهل العرف مخرج ومدخال=وانا على قولي مثبت دلايل
كد قيل مايزعل من الحق رجال=والشك عن ذربين الايمان زايل
اشره على الطيب ليا حملها مال=وقول له وين انت يابو الصمايل ؟
وين انت يالي للصعيبات حلال=ياشعيل شيال الحمول الثقايل
من لا فزع في ساعة الضيق بالحال=وقت السعه نلقا بداله بدايل
والا الردي ماينفع بكل الاحوال=وعزالله اني عنه ماني بسايل
لو كان زوله وافين بين الازوال=ماهوب صاير من رجال الفعايل
والطيب يبقى لو يطولن الاجيال=يبقى مع ارجال الحضر والقبايل