وين انت ياللي غيابك زاد عن حده =عقبك شربت العذاب بكل الانواعي
يابو جديلن يغيض البيض لاكده =اسود من الليل حدر الردف بذراعي
يشبه لذيل الفرس في ساعة الهده=في هوشتن مابها رحمه وفراعي
وزودن عليها حمار الورد في خده =ومخالطه برق صيفن له تشعشاعي
وسودن مضاليل فوق العين ممتده=رمشن ضليلن يضلل خرس ووساعي
وخشمن كما السيف في سلته وبحده =وشفايفن مثل جمرن جاه ذعذاعي
ياوجد حالي عليك ان طالت الصده =وجدت صويبن روا من دمه القاعي
خلوه ربعه طريح ابساعة الشده =يصيح بالصوت محدن جاه فزاعي
يانور عيني دخيلك تسرع الرده=تراي عقبك حياتي مالها داعي
صاحبك سود الليالي بيحن سده=انا والايام بين اجهاد وصراعي
هجمات الايام عكسيه ومرتده=طاوعتهن غصب لو ماني بمطواعي
واليوم كف الوفاء من بيننا مده=واعرف ترى منزلك من بين الاضلاعي