** الرديات :
بين الشاعر رشيد بن خرميط العازمي
وصديقه الشاعر عبدالله بن هديب العازمي
بعد ان ارسل له من الخارج هذه القصيدة
انقل لكم القصيدتين عل ان تحوز على اعجابكم
إبتدأ الشاعر : عبد الله بن هديب العازمي
سلامي سلامٍ مثل فرحة نهار العيد = اليا عايد الغالي على الصاحب الغالي
ما دام ان سيف الحق في راية التوحيد = أبى اردد الأرقام في الحاسب الألي
ألا ياهجوسي ودن العلم يم إرشيد = صحيبٍ يميل الوقت وإرشيد ما مالي
انا ما دخلني شك لكن للتأكيد = ليا سمع صوتي يدري انه على بالي
انا يابوفيصل بين حامد وبين إحميد = وعينٍ على الأول وعينٍ على التالي
انا طول عمري ما اتخوف من التهديد = مع أهل الوفا والعرف ما نقص مكيالي
ما دام ان ابوفيصل معايه ماني بوحيد = لا يخطر على بال الجميع اني ألحالي
انا ما طرقت ألا شويٍ من الرصيد = واليا زادو ريالين زدت مية ريالي
تقبل تحياتي ولأهدافنا تحديد = وأخذ زبدة المعنى و ذا رقم جوالي
** رد الشاعر : رشيد بن خرميط
هلا مرحبا ترحيبةٍ ما لها تحديد = لها مع رجال العرف مخرج ومدخالي
ألا ياهجوسي يوم ضاقت صدور البيد = عن الارض لي في ساحة الكون منزالي
وألا يابحور الشعر يامركب القصيد = بنيت الشراع بغبةٍ موجها عالي
تغرد لك طيور القصايد على الجريد =واليا غاب عنك هلال يطلع لك هلالي
على غبةٍ فيها من اللؤلؤ الفريد = ابى ارخي لها في قبة الجمة حبالي
أنا ما قطعت اليأس حبل الرجا جويد = ولاني بمن يركض كذيا على الخالي
انا يا شعلت النار فوح القدور يزيد = يغني لها بين المواويل موالي
ما دام البضاعة غاليه والزمن عنيد = يعيش الشجر ويموت ما جا له ظلالي
يا عبدالله الأيام منها الحديد يبيد = لياليٍ تدور وتلحق الأول التالي
وختام الرسالة عودٍ أزرق وساعة عيد = كرامة ضيوفٍ بين دله وفنجالي
الشاعر رشيد بن خرميط العازمي
مع الشاعر : سعود الغريب
علها ان تحوز الرضا منكم
إبتدأ الشاعر: رشيد بن خرميط
يا مل قلبٍ بين الاظلاع مجذوب = جذبة رشا دلوٍ طويلٍ جليبه
امسيت مثل اللي على السجن مطلوب = مطلوب دم ولا تنازل طليبه
و الا الكسير اللي من القوم مصيوب = رماه حظه قدم بندق حريبه
خلوه ربعه طايحٍ يشعط الثوب = بأرضٍ خلي يقنب من الجوع ذيبه
ويا كن في جاشي سنا شعلة الشوب = وجروح قلبي يالغريّب عطيبه
من هاجسٍ يلعب بقلبي على الدوب =يسرح مساريحه ويبرى عزيبه
ترمي به الأقدار وتذوبه ذوب = وتصلاه في جمرٍ تواقد لهيبه
وترمي به الدنيا على خمسة دروب = بين الضياع وبين مجرى شعيبه
صابر واقول انه صبر قبلي ايوب = وقلبي جريح ووين بألقى طبيبه
البدر غاب وغابت الشمس من صوب = ويا ابو بدر مسراي ما ينسري به
يا سعود يوم أنك من الربع محسوب = ومثلك اليا يا ضاقت علي انتخي به
ارسلت لك من ضيقة الصدر مكتوب = واتنى الخبر متى الخبر لي تجيبه
وصلاة ربي عد ما تمطر انصوب = على رسولٍ مهتدى نهتدي به
** رد الشاعر : سعود الغريب
حي الكتاب اللي اسمنا فيه منسوب = حيه عدد ما در ديدٍ حليبه
واعداد ما السكر مع الماي ما يذوب = واعداد ما انحى النجم يمة مغيبه
بالشاعر اللي طرش الرمز بأسلوب = حيثه اديب وطرشه يشتكي به
يا رشيد بن خرميط انا ماشي دروب =قلبك ودربك مسهجٍ كد مشي به
وترى الغريّب في حناياه لاتوب = عشرين عامٍ جاحده ما دري به
من خوفتي يارشيد تلحقني ذنوب = وحكيٍ ملقحه العلوم تهذي به
اخفيت سدي عن هذر كل هذروب = مطاوعت مامور القدر بالمصيبه
وطفا سراج كان يارشيد مشبوب = واظلم دجى وقتي و ديم مغيبه
وخلاني اغني هجيني ومسحوب = والشيب في راسي تسارع دبيبه
لو الجبال الراسيه مثلي تذوب = ومن هول ما بالقلب ما ينحكي به
واما اننت سالفتك لها الصبر مطلوب = والصبر شمطان اللحاء تقتدي به
ما يحلها مجلس تفاوض ومندوب = الا الصبر يا سعد من يلتجي به
اصبر ما دام الوضع يا رشيد مقلوب = وحبل الرجا سود الليالي تجيبه
وسامح خزامٍ في يدين ام دبدوب = لو شفت في بعض المواقف غليبه
لا يركبك من عارف الحق مركوب = تراه مثل زرار ثوبك و جيبه
والسر خله بين الاثنين محجوب = اياي واياك الخبر يندري به
لا بد ما يفتر يا رشيد دالوب = وهوج الرياح العاصفات تغدي به
الوقت ياما فيه غالب ومغلوب = سنة حياة الله بخلقه عجيبه
واسلم عداك العيب عن كل عذروب = وهذا جواب اللي خبر تحتري به
وصلاة ربي عد ما نبت نبنوب = على رسولٍ كلنا نقتدي به
الشاعر حمود بن حنيف العازمي
والشاعر رشيد بن خرميط العازمي
تربطهم معرفة طويلة ولهم بعض من القصائد الجميلة
والرديات انقل لكم هذه الردية بينهم علها تحوز رضاكم
إبتدأ الشاعر : حمود بن حنيف العازمي
اليوم والبارحة كني بغيبوبه=ما غير اطالع ولا ادري ويشقولوني
اشوفهم مير ما ادري ويش لجوبه=علي ولا على غيري يهرجوني
على الذي ما لفاني علم من صوبه=اكن حبه ولا ابغا الناس يدروني
الصاحب اللي ليا منه مشي دوبه=ما ودي ان العرب يمه يلدوني
ليا ذكرته يفر القلب دالوبه=اقضيت صبري عليه وباح مكنوني
يا رشيد لو شفتها ما تقبل التوبه=سوهجت لو كنت مع ناس يصلوني
من دش بحر الغرام وذاق مشروبه=ما عاد يسمع جميع اللي يعذلوني
الحب بلوا على راعيه وعقوبه=ناس تشجع وناس فيه يزروني
يا رشيد يومك تعرف الحب واسلوبه=اواصل السير ولا عنه تنهوني
** رد الشاعر : رشيد بن خرميط
يا ابو فهد فرصة الايام محسوبه=للوقت فرصة وللدستور قانوني
ولاني احب الكلام بغير ماجوبه=وليا تكلمت جاك الهرج موزوني
وليا شكا لي رفيقي جيت من صوبه=اقوم في واجبه لو يطلب عيوني
يا حمود ما كل برق تمطر انصوبه=الله خلق كل شي وثبت الكوني
من دق وتر الغرام وجر مسحوبه=يشيل حمله ويمشي فيه بالهوني
يا حمود هذه سواة الحب ودروبه=راعيه كنه ورا الشباك مسجوني
لو كل عاشق يحصل كل مطلوبه=ما شفت ناسٍ من اهل الحب يشكوني
وليا بغيت النصيحه جتك مكتوبه=فيها كلامٍ بليا شك مضموني
يا حمود جاك الكتاب ولحف اجنوبه=لا تخلي الناس يابن حنيف يدروني
هذه قصيدة قالها الشاعر: إرشيد بن خرميط
موجهها إلى الشاعر : مطلـق بـن دويـك
يامطلق بن دويك ماشفـت خلـي=سايلـك بالله صاحبـي ماوطيتـه
يومك صديق وخابرك منصحلـي=وسدي على غيرك حشى مابديته
انا مريـض ولا بـرت علتلـي=وابا الدواء مير الـدواء مالقيتـه
راعي الهوى دايم ضميـره مقلـي=وإليا عذلته عـن سنـع ماقويتـه
ياليت أهل زين الوصايف هللـي=واعيش واسكن لوشهر وسط بيته
اليا رضاله صاحبـي راضيلـي=واقول في حالي وقلبـي فديتـه
انا هواه وصاحبـي هـو هولـي=من يوم شفته يابو مصلح هويتـه
والبيض غير اصويحبي لو صفلي=والله لأموت وصاحبـي مانسيتـه
وياالله يامنشي السحـاب المظلـي=اللي ليا ضاقـت عليـه دعيتـه
تفرج لمن حالـه مثـل حالتلـي=رجواك يللي كم مريضٍ شفيته
** رد الشاعر : مطلق بن دويك
بديت بسـم الله رفيـع المحلـي=اللي فـرض للنـاس حـج بيتـه
هات القلم وأكتب بيوتـن طرلـي=وأكتب جوابٍ من ضميري نقيتـه
مانيب فـي رد المثايـل مقلـي=والقاف مايصعب علي إن بغيتـه
حنا لمكتـوب أبوفيصـل نهلـي=هليت بالمكتـوب ساعـة قريتـه
أرشيد ابفزعلـه وهـو فزعتلـي=ولو مطلبه غالي عليه اشتريتـه
أنا رفيق اللـي يبـي صحبتلـي=أزيد له حـد الوفـا وإن قويتـه
ميـر أتعـذر منـك ياصاحبلـي=اللي مضالي يابوفيصـل نسيتـه
يا إرشيد خليت السوالـف تولـي=ابطلـب الغفـران وحـج بيتـه
ياإرشيد هذا حل وهـذاك حلـي=صعبٍ عليه مرجعه لو بغيتـه
لاكن عنـدي شـور ياسامعنلـي=إن كان شوري يابوفيصل بغيتـه
عندك حليـب صافـي مايملـي=الرابح اللي حطهـا وسـط بيتـه
أحرص علية وخل غيره يولـي=المال له رعيـان وللوقـت هيتـه
وهذه ردية بين شاعرنا وبين الشاعر : عبدالله بن هديب
قصيدة الشاعر : عبدالله بن هديب
إلا يا نديبي فوق من يبعد الهوجاس = من ألمانيا ما جابه محسْب فلوسه
شبح ستة أمية يجزعه لمسة القرطاس = ما بيّن نضيح الزيت بالروس وعكوسه
أبى انصيه ابو فصيل وابى اعطيه كلمة رأس = وأنا خابره قد عاصر الوقت ودروسه
وأنا ما شرحت الأمر يارشيد لأقصى الناس= شرحته لرجلٍ يرفع الرأس ناموسه
أنا ذاكرك يارشيد بالموقف الحساس = مثل ما ذكرت العام الأول بقاموسه
أنا لي عشيرٍ شبه دونه قطعت اليأس = جيرانه بني عمه والأبواب محروسه
بقصرٍ كبير ودونها ربعها حراس =وهي وسط هاك القصر حره ومحروسه
صبرت وحمس قلبي كما البن بالمحماس = ومحبة لطيف الروح بالقلب مغروسة
تصرف وصرفني معك ياعريب الساس = إما قص رأس الداب وإلا أكسر ضروسه
وصورت موضوعي كما صورة العكاس = وسلمت روس الحبل والحبل ممسوسه
وأنا خابرً عمر الذهب ما يصير نحاس = ابى الرد نفس العلم جسمه وملبوسه
رد الشاعر : رشيد بن خرميط
أنا البارحة يوم القمر صار فوق الرأس = سرن الهجوس ودق قلبي لهاجوسه
عبرت البحر حيث البحر يتعب الغطاس = لمست العلوم اللي من البعد ملموسه
قريت الكتاب وعذت بالله من الخناس= وقطعت العروق اللي تجي منهن السوسه
بعد ما عرفت ان الزمن شاب منه أدباس= تركت الذهب لأهل الذهب تجمع فلوسه
ولا يا ابونايف جارك الله من الوسواس=تهيج الرياح ويبكي الليل فانوسه
تمد النظر من باب جده إلى الفنطاس = وتمس الحبال اللي من العام ممسوسه
وتشوف النجوم اللي بجوف السماء جلاس = تبى المزن يمطر والهوى عامرً كوسه
تتل السبوق وتنهض الصدر يالقرناس = وابو موس واقف قدم بابه معه موسه
انا لو هدمت الضلع بالمطرقة والفأس= يموت أبن غانم ما ربح ربع دبوسه
وبعد ما شرحت الوضع بالحبر والقرطاس = مثل ما شرح للطالب المشرف أدروسه
عليك السلام ومثل ما قلت كلمة رأس=من الهاجس اللي يجذب القلب هاجوسه
** ملاحظه : جميع القصائد منقوله عن طريق الأخ : فهد محمد العازمي
فله كل الشكر على تواصله معنا