في ليلتن قمـره بهـا الجـو صافـي = و نسناسها الغربي يذعذع على هون
ببيح مافي خاطـري مـن خوافـي = مادمت في شرع المحبيـن مرهـون
ما دام خلي بالهـوى قـال كافـي = ابيه يعرف بس عنـدي وش يكـون
فـي درب حبـه قادنـي بحترافـي = عقله رزين مصاحب الذوق بفنـون
له قبلتن لا شافها شخـص حافـي = درى براس المال .. ماهوب مليـون
عينه كما عين اشقرن حـر صافـي = عنق المها .. و الخصر ناحل و مفتون
ابو جديلـن بيـن الامتـان ضافـي = و ابو ثمان(ن) كنها الثلـج فاللـون
ادمنت في حبه وبصمـت اعترافـي = و مد العهود و قال وافي ولا خـون
وادمن علي واسرف و زود اسرافـي = و من خوفي اردد اليا غاب و شلـون
و نضمت له شعري و حبكت القوافي = و سهرت له يوم المخاليـق يمسـون
وجروحه الي فـي خفوقـي عوافـي = اصفط له الراحه و لو كنت محـزون
عشنا هوانا بروح و احساس دافـي = و خضنا الغرام وباح ما كان مكنون
حتى انحنـا درب الهـوى بنحرافـي = يبكي وكبدي فاتقه كلهـا طعـون
بسبـاب ضرفـن قادنـا للتجافـي = اقفا .. و جرت ورقت الشوق بلحون
عليـه مايلحقـه منـي خـلافـي = ارفع له البيضـه و بالبعـد مصيـون
مهما يطول البعـد يبقـى سنافـي = و ابقى اسيرن في غرامه و مسجـون
تجرفنـي الذكـرى عليـه انجرافـي = اهيـم وعيونـي تفضـي بمخـزون
عقبه جميـع البيـض كلهـا تعافـي = لو هو عرض لي من قفا البيض مزيون
وعقبه بدرب الحب مابـه مصافـي = معاد به حب(ن) مثـل مايقولـون
وعقبه مكانه موحش .. الليت طافي = حرام عقبـه ماتهنـت لـي عيـون
شفي مـن الدنيـا يعيـش متعافـي = ماتنقصه حاجـه ولا هـو بمديـون
محبتـي لـه جـد ماهـي هرافـي = يوم ان بعض الناس كذبـة يحبـون
وما نساه لين الكفن يصبـح لحافـي = ولين المساجد مابهـا مـن يصلـون
مانساه لو انـه قطـع مـا يشافـي = عساه يذكرني اليـا جالـه شجـون
و اغلا قصيده جات و الكل غافـي = بنزف الجروح الي صعيبـه يخيطـون
(( وهاذي تواقيعي وهاذه اعترافي )) = خضنا الغرام وباح ما كان مكنـون
.
.
.
شعر \ محمد الشتلي