السلام عليكم ورحمة الله وبركاته ...
اللهم صل على محمد وعلى آله وصحبه أجمعين .. اما بعد
قصيدة رثاء في جدي المرحوم بئذن الله تعالى ( عبدالله بن مجبل الشتلي )
نسال الله العلي القدير ان يتغمده برحمته ويسكنه الجنه والمسلمين اجمعين ..
وان لايرينا بأحدن منكم مكروه ولا على من احببتم فالله
•
•
•
يقول من عينه تذارف دموعها = ونفسن طرى من حزنها ما يلوعها
الله من قلبن تكدر بضيقته = ونفسن قوي الهم ضيع سنوعها
عليك ياعودن بكا من تذكره = وكبده تفطر من تهشم ضلوعها
ساعة مشو والدمع فاض بمحاجري = في ليل خلق الله زانت هجوعها
ابكيك يا شباب نارك بمدهلك = الضيف عنده ليلته ما يجوعها
وابكيك يا راع الدلال المبهره = مايوم ينقص هيلها مع قدوعها
و ابكيك يا يمنا طويله و وافيه = مداتها ان مدت كرمها يشوعها
و ابكيك ياريف الجماعه و لابته = ياسعد من ضيقات نفسه يزوعها
عليك يامن كاسب الطيب والثنا = وكل المراجل ترتكي له بكوعها
و عليك ياكيف النشاما و ودهم = هاذي دلاله ماتغير وضوعها
وجهن بشوش وهرجه احلا من العفا = ونفسن ضرت للطيب ينحت طبوعها
يالله في عطفك ورحمتك يالولي = يامن عليه النفس تعلن خضوعها
ارجيك بلي زار بيتك وحج له = ونفسن موضبها بزينه خشوعها
وارجيك بلي قام من عمق نومته = يسبحك في سجدته و فركوعها
اغفر له ونجه عذابك وقوتك = وعساه فالجنه بعالي فروعها
ارفع لك يدينن من الدمع كفكفت = امن عليه بوحشته لا تروعها
في جاه قرأنك وخاتم الانبيا = يوم امته تبعث يجي لك شفوعها
تثبته يومه بعث لك وتسأله = و يرفع لك اليمنا وتجزي رفوعها
يالله عسى قبره لغيثن من المطر = تاخذ ليال الشمس و يسفر رجوعها
وينبت به النوار والشيح والنفل = من كل باذر نبت يزهى طلوعها
ودنياك يا ابن ادم تراها مقفيه = لاتغرك ان زانت بتقلب بنوعها
وجعل البقا في نسله الي بقا لنا = والله عليه اجر النفوس وفجوعها
والله يعظمً اجر منهو تفقده = و يعين من عينه تذارف دموعها
ابكيك ياجدي من الليل للضحى = و فرقاك والله كايده في وقوعها
شعر / محمد الشتلي