يالله بحظٍ ليا جدت من جودك يقوم=ونفس عبدك يالله انك تطيب فالها
من بغى الطولات يطلع على راس الرجوم=ومن بغى العليا ونوماسها يرقى لها
لابتي ياعزوتي مابعد هاليوم يوم=اسرجوا بنت العبيه وانا خيالها
خيّل العورا طرب لا رحم جد الرخوم=ولارحم من لا حمى الكلمه اللي قالها
والله ان النفس تجزع وراعيها يشوم=مير لاكبرت صعاطيرها حنا لها
أبلنا تدحم ويبرالها اعيالٍ إقروم=لا ارهجت في ظل أهلها ماهيب لحالها
ولاوصلنا منتهاها ولا جدت إعلوم=بنتعزوى والعدا مايسرك حالها
كلمة الصقلاوي نقولها وقت اللزوم=لين غياب العوازم تجيك أرجالها
والعمار انسوقها فدوه لرثم الخشوم=واليدين اتطيب فيها وترخص مالها
من طمع فيها بيرجع وفي خشمه اثلوم=ونفسه ان غرتهْ فينا ماهوب اشوالها
الشعل حنا جنبها وشمرنا الكموم=وكل شغمومٍ حذف غترته واعقالها
حبها بأرواحنا لو يلوم اللي يلوم=لاعبٍ بقلوبنا مثل لعب اسبالها
كل هزعاً طافحٍ راسها صوب الغيوم=تشبح لحد السماء كنه إيورالها
كن في طول ارقبتها سوات اللي تهوم=زين مطلاع ارقبتها عطا وارهالها
حد غاربها سناده مثل راس الحزوم=من يمد إيديه ويهوزها ماطالها
ولنتهض مقدم ظهرها تنكسها إمخدوم=السنام اللي تنكاسته تزها لها
والجنوب اوساع والرق مع كبر الجروم=سعد عين اللي ليا مرته يبرالها
من صطرها تدهّر ماتلد ولاتحوم=يوم تندبها المطانيخ في هوبالها
والصياح ان وصْلها كن به غاره وقوم=روحت للصوت ماتلتفت لعيالها