الشاعر :
** (( فهد الجافور ))
*** نبذه عنه :
فهد بن محمد بن جافور العازمي
من فخذ الجواريه
ولد بـــ منطقة الفنطاس سنة 1868م تقريبا
توفى رحمه الله بـــ مدينه السالمية في 15/ 2/1975م.
نظم شاعرنا الكثير من قصائد الحكمة والغزل والهجاء
عاصر الكويت برها وبحرها وكانت له مكانة خاصه لدى
الجميع من اهلها وعرف عنه الشجاعه والفصاحه والكرم
** قال عنه الشاعر عبدالله الدويش :
(( ادهى شعراء النبط الذين عرفهم ))
** وقال عنه الشاعر : عبدالمحسن الرفاعي :
(( قوي المعاني سريع
البديهه شديد الملاحظه شعره له ميزة ونكهة خاصه به ))
** قصائده :
(( 1 ))
نحمـد اللــي عز ربعـي على كـل الجنــود =يوم جت سبع الطوايف خطا ما من دليــــل
إستوى يوم ياعلــه علــى البايــر يعــود =واحمد اللي عز ميــزان ربعي لايميــل
باروا العـدوان فيهــم وجوهــم بالجــرود =ولابتي دون المعقل ليــا بار العميــــل
ثار من دون المعقل كما وصف الرعـــود =مثل زلزال الرعــد ياتقصف من مخيــل
يوم ثار الهيج لي ولابة مثل الفهــود =والمعادي قدمهــم كنه الصيـد الجفيــــــل
ذبحهم عند المعقل ثمــان ميــه وزود =وليا نجا والذبح بالقوم من زلم وخيــل
كل طماع نكـس مفلـس ماجاب فــود =ما لفى بعلــوم هيــاتهم كــود الذليـــــــــل
من فعايل لابتي يشبع السبع الونـــود =طبعهم دايم وكسارت العظم الجليــــــــل
لابتي دولة شريف عمت عين الحســـود =واجه العيال يوم الملاقـي شين يهيـــــــل
إشتهت كبدي متوعي والفت الرقود =واحمد اللي جلا عن كبدي المر الثقيــــــــــل
(( 2 ))
بادين بالله ولا غيره البادي يصير= واذكر الله واشكره عد مارفرف وطار
والسلام اثنيه للورع وأخص الكبير = من هل العوجا مواكر صواريم الحرار
بشر المقرن وكزو لبو تركي بشير= البيارق سندله وعدوانه دمار
استوى يوم عبوس على جوبة نقير= قبل نور الصبح ينباج لا وسط النهار
وامطرت فوقه مزونٍ مطرها حشر طير= وبلها مثل البرد والهوى لاهوب نار
ماوطا سيله تعشاه دالوبه ضرير= ماخلق مثله بالاكون بالدنيا وصار
وردوا على العوازم وردوهم صدير= صدروا من شوبة الموت قصاف العمار
خابرين افعول ربعي معطشت الذخير= من على عصر الفتيل المعقل ما يزار
المعقل عنده الموت طيره ما يطير= شاطٍ باطرافه الموت شيطات العشار
كن جضع الزلم بنحورهم جضع الحصير = من مضاريب المشوك وبالشرف القصار
اوقدوا فيهم بالاحراق يامطفي السعير= لين عافو من طمع لابتي والكل نار
بشرو سبع الخلا والطيور اللي تطير= العشا في جوبة نقير ودوهم خبار
جعل ربعي بالملاقى لهم حظٍ كبير = جمعهم يركض على الموت ليا جاله شرار
ربعي العطوان عز الضعيف والقصير= ومن نهق فسقان حطو برجلينه هجار
لين يرغي ثاويٍ عندهم عقب الهدير= لا حصل له ينطلق همل الفتنه ونار
يوم جونا بالملاقا وجيناهم نسير= لين ذوّب جموعهم ضرب القرار
في رجا الله ثم عبد العزيز انه يغير= عند طيحات التشاريع من دارٍ لدار
صار للديره واهلها وما فيها صرير= من وحم عبد العزيز ابو تركي يوم ثار
نادر العقبان لوما بمخلابه ضرير=خمرت منها الحباري ليا نهّض وطار
سيف ماص شذرته ما يوقيها الجفير= ما يباع ولا تمده يمينك لليسار
لولب الحكام حبسن وحيل بصير= شاخ في كل الجزيره وماخذها جهار
دولته من فعل يمناه ماتاخذ قصير= ماتبي غير ابو تركي من العربان جار
ماشيٍ درب المطاعه وعينه للفقير= جعل ربي ينصره عد من سمّى وسار
يزك تمت هللو كلمك ولذكر أخير= خاتمة قيلي صلاة على سيد البشار
(( 3 ))
نحمد اللي عالمٍ غيب الليالي = يوم بليوا لابتي والله يعيني
جوهم العدوان شينين العمالي = والعدو لو زان يومٍ مايزيني
منتوين ارقابهم واخذ الحلالي = مير عيوا بالحلال المستحيني
يوم جوهم مثل صيات الجمالي = والمعقل عنده الجمع الرزيني
زعزعوا عطا مداغيش العيالي = وانطحوهم يوم جوهم سبحتيني
إذبحوهم لابتي ذبح الصخالي = واصرموهم يوم جوهم معتديني
ياكريم وياعليم بالاحوالي = عزهم يا منشي المزن الرزيني
الضعيّف عندنا يلقى إظلالي = مكرمين الضيف في عسر السنيني
(( 4 ))
بديت انا في ذكر خلاق العبيد =جزل العطايا اللي دخيله مايضام
انا اذكر المولى قبل قيل جديد = هللت لله عد ما صلى وصام
كيف العدو يزعل من الهرج الوكيد = الصدق ماتبغيه والهرج التمام
تغط نور الله وهو فوقك شهيد = كم هيةٍ فيها نخليكم عدام
إفزع لربعك جعل عمرك مايزيد = عنهم تزبنت البحر يوم الزحام
العازمي يذبحك والحاكم بعيد = ورّاك يوم فيه شيّب بالغلام
تنهق ونكسر لك إركاس من حديد = حنا كعام إلك وللعايل كعام
ودك على الطوله ولاتحرز تزيد = نقمعك مع خشمك ونجعل بك إخزام
بيارقك وخذت ولا حوشت فيد = ومن العوازم صابك إجفال النعام
ننطحك باللقوه وننطح بالقصيد = ونطردك من دون المعقل والجهام
ربعي هل الطولات ورزان العديد = ياسِعد منا فزعة له بالزحام
شرٍ على جمع الموالي والعقيد = كم من عقيد زتتوا عمره إشمام
طاحت قرايعكم ووجه الله جديد = وهذي جنايزكم عليها الطير حام
وعبدالعزيز إلكم مخاليبه تصيد = وحنا كتبنا الله لتاليكم عدام
(( 5 ))
باديٍ في ذكر جزل العطا رب العباد = رافع الرايات منشي رزينات الغيوم
هاضني علمٍ لفاني وتركت الرقاد = طار عن عيني كرى نومها واقفى يحوم
من سبايب هرجةٍ جابها راعي البلاد = من حمارٍ ناهقٍ بومةٍ نسل بوم
ضايع وانا لمن ضيع المجرى إعفاد = باديٍ له بالطويله واشرف بالرجوم
اقطع إلسانه من اقصاه في موس السداد = وارفسه في مقعدٍ فيه مايحرز يقوم
لابتي عند المعقل كما سور البلاد = عند حسكات الوبر كنهم دولات روم
من حضر منهم تنومس وجا فيه السداد = لو تلافوا كان مانار نايركم لزوم
ربعي اللي شرب منهم معاديهم نكاد = يكرمون الضيف بالعسر والجار محشوم
افهم القيفان مني ترى هرجي وكاد = من فهيمٍ ماتجي في تماثيله إثلوم
(( 6 ))
أمس هلت اعباري من محاجر إعيوني = خايفٍ من محاتا الذم والنفس حيّه
خايف ٍ من حكايا الناس مايرحموني = والله المطّلع علام ماكان فيّه
هيه بالربع رنّوا كلكم وسمعوني = جعل من سمعني يسمع شفاعة نبيّه
يانويتوا بجر اخرابكم إنشدوني = وسمعوا قيل ابن جافور ياهل البغيّه
راقدٍ في منامي هاجعات ٍ إشطوني = لين جاني لطيف الروح صافي الثنيّه
قال وش هالغيبه يامضنّة إعيوني = قلت للغوص جعل الكل يرجع بغيّه
جعل يرجع بنا منشي سحاب المزوني = جعل كل يجي من عقب الارماس حيّه
ذاهبين الحمايل بالخشب ولعوني = لينهم وهقوني في البحر هالسوّيه
لاجناح يطير ولاطروش يجوني = ولابرورٍ قريّب والسباحة رديّه
أشهد إنه عدو اللي بصوبه هدوني = إه ياقيضةٍ راحت فواتٍ عليّه
مسكني كل عام وشوف نجل العيوني = لين غابوا عن الخفرات جلّي رعيّه
كان قزرت هالطرشة تراني إظنوني = بس يانواخذاي أبعد عن البر فيّه
يوم أبرق وأفكر هالطرشة تراني إظنوني = بس يانواخذاي أبعد عن البر فيّه
كان جينا زبار البر عنه إحفضوني = عقب زرق الغيب تصير نفس رديه
يوم أبرق وأفكر في عوالي إمتوني = مسلبٍ جلدها من مرة الغوص فيّه
طابت النفس أنا يانواخذا حولوني = حضّب النفس من شوف الزباره غنيّه
ياوصلت الزباره صرتي ناوشوني = شايمٍ شومة الضلع الحمر عن طميّه
خالق النفس حيّ دايم مايخوني = معتني في قليل المال وأهل الشويّه
في وسيع الفياحي ماتجيني إشطوني = وفي المكان الكسيف تضيق نفسي عليّه
يوم تمت ذكرت الله بتلى الحوني = خللوا كلكم والكل يذكر نبيّه
ذاكره بأه وأتلاه منشي المزوني = خالق النفس علام الأمور الخفيّه
(( 7 ))
ياصاحبي هاللون ما يستويلي= تمللني مللٍ بليا نجاحي
ما قلت يا لطف الحشا عزتيلي= قلبك متين ولا مشى بالنصاحي
ضيعت يازيت الوصايف دليلي= في مرّتك هاللون ناوي اذباحي
ان كان مالي ياعشيري ذبيلي = ارخص لنا ياعل دربك سماحي
لوكان حبك في ضميري محيلي = كل يشد اليا جفاه المراحي
ما يطرد المقفين كود الهبيلي = والحر ياشاف الجفا منه راحي
(( 8 ))
يامل قلبٍ ما يهوّد نحيبه= كنيت مابي لين بيّح بمابه
ومما طرقني صار بالراس شيبه = منواهجٍ كنه فوادي هبابه
عيّا براد الما يبرد لهيبه= الله يعين اللي صبر يوم صابه
اقنب قنيب الذيب وانحب نحيبه= واهرف هريف مهر فلات الذيابه
واجزي من الطامن وانط الجذيبه=لا اشرفت فحت اخير من كن هابه
الدمع من عيني تزايد صبيبه= يشدي لشختور المطر من سحابه
عليك ياللي رفع النهد جيبه= تزمي نهوده يوم زرت ثيابه
واليا ضحك قريت له بالغليبه= منه الله الوالي عطاني مهابه
من الهوى حملت حمل القظيبه= حملٍ تحملته بعيري ثوابه
جيت الحبيب وشفت فالعين ريبه= واقفيت وقلبي جافلٍ من جوابه
قام ايتعقد ناظره فيه ريبه = يقول قول خاطري ما رضابه
وعجلت من هرجة عيون الربيبه= ماشفت غاية خاطري وش نوابه
الرجل من خلي ذليله واديبه= وذل من دقت عدوٍ حكابه
يالله عسى االلي صاب قلبي يصيبه = كوده يعرف الحب جالي عذابه
العيد جاني مير انا ويش اسويبه = ان كان ما عايدت من ود نابه
العيد عيد اللي يعايد حبيبه=واللي حبيبه غايبٍ مادرابه
(( 9 ))
انا على الشعيّر في راس عنقور = سبعٍ يهجون العرب من زفيره
بالقيل مدعور الشواعير مثبور= وترى الردى باللعب ماهوب عيره
مثل الجمال احدن نقل حمله بزور= واحدن برك واحدن تردّى مسيره
واحدن ليا ضيّق ثغى كنّه الثور= وزربٍ على راسه سوات الحجيره
فيهم صواريمٍ دهاويلهم جور= هرش جذب كل العشاير هديره
وانا ليا مني تشليت ماغور= طعسٍ يبذ اللي يهايل حفيره
حيذور ياقوالة القيل حيذور= من جمة زرقا مداها غزيره
فيها النهوم وكل حوت وجرور= والجن فيها والهوايش كثيره
وفيها دواليب تقلب كما الفور= وفيها فراعين الجنون الضريره
ومن لا استشارك لا تعرض له الشور= لا تنصحه لا ضيع الله مريره
(( 10 ))
افز لك يابو ثمان مغاتير = كما يفزون العرب للمخيله
ياجت من الجبلة مزون مزابير= رجاه والا العالم الله بسيله
بقصاي علمتك وابي منك تعبير =عطني شوي الحق هذي يديله
السيل ماينقع بروس العثامير = ورد السراب يجيك طاوي صميله
نحفت حالي نحف عود النجاجير = وحالٍ بريته يالقضي وش دليله
ماتقضب الحذوة بليا مسامير = والثوب يبغي له متون تشيله
ياحول الغارف بخص جمة البير = وبخص بضيضه واجده من قليله
والكذب شين وحوبته تطرح الطير = وراعيه ينقل له إذنوب ثقيله
اما جفى بيّن ولامن معاذير = وإلا صداقتنا تتم ونجيله
(( 11 ))
الله من عينٍ تهل العوابير = وليا مسحت الدمع من حجرها فاح
غدى لدمعي فوق خدي قواطير = نهيت دمع العين لين العزا باح
غديت كني مذهبٍ ضيع الطير = حرٍ على جول ابرق الريش ذباح
اشقر وفيه رموع ريشٍ مغاتير = تل السبةق وصار طلعه قطا لاح
وتولج الكدري مجافل مدابير = وكن الوحي جول القطا وارتفع راح
وهو علق فيهن إلحوق بتقصير = وتلافتن يمه وراحن طفاح
وافق جراد وجاه عج ومعاصير = ولايلتفت للي على ساقته صاح
راعيه ومّا في طويل الشناظير = عدى وطنب في حجا الرجم بصياح
ماعاد يلقونه كثير المداوير = لو كان ترماله حمامه وملواح
عليك ياشمعة جميع الغنادير = اللي مشالي بالمحبه والانصاح
ارجيك رجوى البدو نبت المخاصير = والا رجا حمل النخل كل فلاح
(( 12 ))
ياصاحبي ماعاد ابيلك محاليف = ولاعاد اصدق هرجتك عقب شوفي
احلف على اللي مايعرف المحاليف = وانا بدر الحب بيض إدفوفي
أنكفت منك إنكاف ربعٍ مناكيف = وخلصت مخلاص الصبي يوم يوفي
وريت بك يابو ثمان مراهيف = وريت بك واثريك غيمة إطفوفي
عقب الوثانه قمت ترقي المشاريف = وحطيت لك مع كل نجع إشفوفي
يوم المحبه بيننا شيف ماشيف = شربت من حوض الغلا في إكفوفي
هذا ولا كثر عليك التحاسيف = الفس جزامه وقلبي عيوفي
هرجت لك يوم لي مقضب السيف = والما ليا غثرب شرابي عيوفي
إدخل على الله والردى فيك ماشف = حاميك ربي يا إظبي الخشوفي
(( 13 ))
قلبي من العام يجذبني وانا اهينه = جذب الرشا فوق محال ودراجي
والحال كن الدبا يرعى بساتينه = والعين كن الحماط بحجرها لاجي
على عشيرن ليا اخلالي مقارينه = من المها فيه عين وعنق وإحجاجي
ياعين شيهانة الصقار ياعينه = عين الوحش عقب جول صايعه راجي
حار القدم يوم جاني واخلفه زينه = ضيق علي السعه ما ادركت منهاجي
يابنت ماترحمين الحال ياشينه = تنوين بالضيق والله عنده إفراجي
يامشخص غالي بأغلى مثامينه = او دانة الغوص توضي كنها اسراجي
(( 14 ))
ياغزالٍ سم حالي وقلبي شايعه = سم حالي بالغلا والحديث اللي نظيف
كبدي اللي من حريمة عشيري مايعه = والسبايب كلمةٍ قالها جرحي لطيف
جعل ربي ماسمعها وعنده ضايعه = والحريمه جعلها ماتصير من الوليف
عين طيره حاكم للحباري طايعه = اخلفت رمايها بالمحاجر والرفيف
بالحبيب شارتين بالظبى اللي رايعه = عنقها عنق المها والحجاج اللي نظيف
كن قمر اربع عشر في لبابه طالعه = ماتطرف من حشا جيبها يكشف كشيف
ليت خلي يمشي الحق وانا طايعه = يحط ميزان الغلا وانتقاسم بالنصيف
((15 ))
ساهرٍ بالليل والناس هجاع رقود = ضايق صدري ووسع ضميري بالجواب
يابغيت النوم عيت إعيوني لاتنود = كني اونس حدر جنبي تقرصني دواب
يابغيت الصبر ما احرزت عن حلي العنود = ناهبٍ معلوق قلبي ومذهبني ذهاب
يانويتم يا هالزين عنا بالفرود = علموني ابشعط اللي علي من الثياب
جعل يوم فيه فرقا عشيري مايعود = والمراح اللي جفاه الزين يخطيه السحاب
خدها براق وسم ترزن به ارعود = في حقوق الغيم تنحاه صلفات المهاب
ليت جدي حاضبٍ من عشيري بالجدود = كود احيّر صاحبي واستريح من العذاب
زين فيه هليّل النيل والحجان سود = شفتها لمحه وصديت وعلق بي صواب
ذاكرٍ من صاحبي عند هجعات الحسود = هرجة مع صاحبي تودع الشايب شباب
(( 16 ))
ياعين البديده كلبوهم وياعيني = ألا ياثمر قلبي وشوفي بالاعياني
علامك مسجّم يا الغضي ماتحاكيني = وحياة الولي لولاك ماجيتكم عاني
عسى بالغلا عندك إثقال موازيني = يصيبك علي من الغلا مثل ماجاني
حتى انك تجرب حب غيره وتغليني = وتغليني محبة قلب ماهو بلساني
ترى للمحبه ياعشيري قوانيني = وبعد للجفا يازين الاوصاف نيشاني
نيشان الجفا الحقران والناظر الشيني = وليا طلبت مواجهة خاطره شاني
أنا اليوم عاني لك وابي منك تعطيني = صدوق الكلام اللي ليا رحت يقراني
(( 17 ))
سرينا وذا الرجل ملت =والعين جاها عناها
نشت مزنة واستهلت =على النير ضافي حياها
وهذي الخباري تملت=والاشجار ما احد رعاها
غنم جاركم وين فلت=وهذا الحيا من قفاها
عليها سباع تدلت =وانا بالتفق من وراها
(( 18 ))
باديــن مـرقبـن والشمـس تبغـى المغيب =فــي تجـلا النهــار والليــل قـرب دجـاه
واطلـب للـي عسانـي ياطلبتـه ما خيـب=صـايمـن لـه نصـوح ومجهـدٍ بالصــلاه
يـامقـدي العمى اللي مايشـوف الدربيب =يــوم يمشـي مـع البيــدا يقلــط عصـــاه
فـي شفاعهـة محمـد جعلها لـي نصيــب =يــوم كــلٍ تعــــادل ســايتــه وحسنـــاه
عذبنـــي ثــلاثــه بكــار راحــن ذهيـــب =مــالقـــوهـــن مداويــري غــداً هسـواه
صــوبني على الابهـر صوابن عطيـب =وكســـرن مني الضلعــيـن بــا اول بــداه
اخرن في ضميـري مثـل حاض الهيب =يـاكـل القلـب والمعلـوق حامـي سـنـاه
بوجديـلٍ على الارداف مثــل السبيـب =ذيــــل شقـــرا ذنـــوب كــاسياتيــن قفــاه
لاقفــن مـا يصيـد القايـده مـا يصيـــب =وش يبــي بااتبـورد خيـب الله رجـــاه
والله انــي شـاب وعقـب هـذا بالشيـب =لانسيتــــه ولا أحـــدٍ خاشـــره في غــلاه
اول العمر يطرخ مثل طرخ العسيـــب =مثـــل طـــرخ العسيـــب للــي كنيـن ذراه
العبــث بالجهالــه والــوثـن بالمشيــب =يـــوم فكــر وشاف الشيــب والكبـر جــاه
اول الكبر منه والشوف يدني قريــب =الطـواحـن تفــرق والحــم نــش مـــاه
والنـواضـر تهـدل والـواحي تشيـــب =والقــوايـــم تخـــطا ثــالثتهــن عصــــاه
قــام يطوي بحالـه مثـل طــي القليـب =طي بيرٍ نسع من حـدر واقرش حصـــاه
يـاوصل راس تيمه لـو يساقا حليــب =مــايسـره عــطاه العـود حتمــه عـــــواه
(( 19 ))
انا كما سبع يخبط جنوبه = ليا زفر مابه وزاد اغلاثه
سبع ليا منه تزفر نوبه = ارجف قوي الخد مع دماثه
ياسمعه الشاعر تبين عيوبه = يشدي قعود بان فيه ارماثه
قام يتهبد مايحق إدروبه = ومن الرغا حتى إلسانه لاثه
ترى حلاة اللعب في ماجوبه = إذا اشتهوه وصار له شراثه
العب بيوتٍ كنها مصبوبه = اخذ من الصافي وكب انكاثه
احدٍ تماثيل تصير اعجوبه = واحدٍ اعبط اللعب بالعباثه
مايستوي لعبه على مطلوبه = مل الطحين ليا عجن ملواثه
(( 20 ))
أنا ليامني تزفرت وأمطرت = وتفتحن بيبان صدري وغنيت
فصلت زينات التماثيل وأظهرت = من شدها ماشيف فيها تفاخيت
وليا عسرني لاعب القيل عشرت = رزيت رايات الفرح ماتغبيت
وليا عسرني بالتماثيل ماحرت = ارقى كما سيارةٍ تتبع الليت
قضاب سكانه إستادٍ وهو فرت = يمشي على زود الشطاره عفاريت
ان ضيع المجرى بممشاه عشرت = ماهو عشار إنثى عشاري ديناميت
مخلقٍ راقد خبير ليا ثرت = ياثار خلي اللي يحوشه تفاخيت
وانا ثقيل وألي مير ياخرت = يشدي لبارودٍ قبع من كباريت
والطيب اقضي حاجته ماتكبرت = أفزله واعطيه من غالي البيت
افرح ليا جاني وعليه سيرت = مرافق الطيب يسرك ليا جيت
والا الردي اترك مارده عنه صدرت = لانافع حيٍ ولانافع ميت
(( 21 ))
يامجدي جدني وانت الحكيم = يامسنع سنع اللي لك يسال
يامحل العفو عفوك ياكريم = اطلبك ظلك ليا زال الظلال
نجني يالله من سو الجحيم = اغفر الزلات عني بالكمال
انت يامحيي العظام اللي رميم = يامنشي في حشى الروح الحمال
اطلبك من رحمتك وانت الرحيم = يارفيع العرش يامنشي الخيال
ماعلى الدنيا احد بيستقيم = من عليها راحل ومن حط شال
من قعد خلوه في خده مقيم = همل الدنيا وماله والعيال
مادرك إلا كسوته خام رخيم = عقب مايلبس مواهيد وشال
يوم شيل وراح لجٍ الحريم = راح من دراه لدار المستسال
جاه من ناجاه في قبرٍ ظليم = في مكان ضيقٍ في خدٍ هيال
جضفي شيٍ يشوفه مستظيم = انهضم من فوق جال وحدر جال
احد يصعد لجنات النعيم = واحدٍ في سجن واحوالٍ كسال
احد بالنار مشروبه حميم = واحد في جنةٍ مال وجمال
ياومر في نفخة الصور الكريم = جضت الدنيا وطارً الجبال
دبره الله قادره وامره حكيم = كل ساياتٍ على قد العمال
وكل كون غير كون الله سليم = وكل حمل غير حمل الله يشال
وكل راي غير راي الله عديم = وكل حكم غير حكم الله يزال
لاتكذب في جوابي ياغشيم = ماعلى الدنيا مرده للزوال
يدري انه صدق من قلبه فهيم = إفهموا قول العدال من الميال
ياحليم وياكريم ويارحيم = زابنك يا الله عن كل الخمال
(( 22 ))
يا الله ياحيٍ على الناس دايم = يا باسطٍ خده ورافع سماها
تفرج لمن جملة شياهه طعايم = يطعم ونفسه عاجزٍ عن عطاها
يابو الفرج تشكي عليك البهايم = الرعي حاذ ويبس واحفا جماها
راعي الغنم يشكي جميع القوايم = كن الحراب الطاعنه في قفاها
دنياً نجاهدها بصبر وعزايم = وعيت حلاوتها تساقي غثاها
يوم استوى للناس طايح وقايم = تضايقوا وهي بعيدٍ مداها
(( 23 ))
قليل الشوف يازينه = اخير من ضيعته كله
اخير من قولةٍ وينه = وليا بغا الدرب مادله
من يبخص الشوف في عينه = هذاك ياكبر حظٍ له
متعلقٍ في اعراء دينه = وليا مات لي هو على مله
اخير من راعي الزينه = راع الملاهي وربع له
(( 24 ))
ياراكب اللي زودا في ارضاعه = عامين يرضع حدر ثنتين اضيار
راعي الجدح ماخاشره في متاعه = ولا كف عنه الديد مفرود وحوار
مشطر الكيعان يشدي إذراعه = يشدي كيعان المعاير اذا سار
يقطع مسير العشر في ربع ساعه = لولا اللواحي والرسن يردعه طار
وداعتك يااللي بري الوداعه = مني لبن عزران لاجتك الاشرار
عقب نصا فالح صبي الوقاعه = وعند الحبيني يا برك جعل ماثار
واصيح وانهم طيبين الجماعه = وماكان في كبده زعانيف وامرار
من لانشد عن بدته والرباعه = هذاك مثل اللي على الغبن صبار
واشوف من فيهم تجيني افزاعه = والا ترى رد التماثيل بيسار
والشاعر المقرود نكسر اذراعه = حتى اللسان إحش في حد ميشار
الله نواه بشين والشر صاعه = مثل الحمار اللي تمرغ على النار
هيس فقير وعاجزٍ عن متاعه = وعند العرب ضاري على لحس الاسوار
رقص له الشيطان وابليس طاعه = والله تبرى منه وماطاع الاشوار
(( 25 ))
جزابي طمان الخد والنايف اشقاني = وتماكنت راس الرجم من حر مافيه
انا حسبت ياشرفت به خاطري زاني = اثري من رقا المشراف بيح كميه
زمابي على الطامن وشفته بالاعياني = واثرى الرجم مايرحم ولافيه ماويه
وتذكرت من حبه من العام يرعاني = كما ريعت الكتفان ريضان وسميه
حيث ان الدبا خلى الزماليق عيداني = ويخلي الديار اللي مريفه سناويه
عوى الذيب من دون اريش العين جوعاني = وزمت دونه الجيلان ياصبر عينيه
وانا خايف اني اروح من غير غرضاني = اثمن حكايا قبل يحكابهن فيه
جثيل الزوايا عقب فرقاه ولهاني = حدوني هل المنقود عن رادع شفيه
ابوصلك يا لطيف الحشا لازم عاني = وابصبر ولو تشكي من الشوك رجليه
انا يا ذكرتك ما اتصرف لحذياني = انا اخاف تلهيني مساوات نعليه
ياليتك قريب عندنا مثل جيراني = يجي شورنا واحد ونيتك لي نيه
يا الاجواد شوروا بالموافق على شاني = عسى من يساعدني تسمح له النيه
(( 26 ))
البارحه نوم الملا عنه جازين = والعين عافت نومها ماهناها
رحنا مقفين واهلها مقيمين = واخفيتهم وبيوتهم في بناها
واحفيت متني بلتفاتي على الزين = وارجل قدمي ماتسنع خطاهاا
الرجل ماتمشي ثلاث الخطا زين = اما شير والا لجمها حصاها
والقلب مشطون إخلافي اشطانين = وعين على الهجعه تهومل بماها
لاواهني اللي من الحب سالين = واهني من كبده متوعه هناها
انا مشيح وارفع الصوت صوتين = واهل القلوب الدالهه في رخاها
(( 27 ))
يا الله اليوم ياعلم بحال الضعوف = يامسنع على الخيرات ودروبها
ترحم اللي عليل وصار مثل العيوف = يا لطمه العجاج وشان مشروبها
آه يابكرتي عقب الهدايا عصوف = تقطع القيد والعمجات عذروبها
مادروا عن ضماها لين قامت تسوف = في سمومٍ يلوح الوجه لاهوبها
غالٍ مشتراها مير صارت زهوف = قام يجذب عليها زين دبدوبها
(( 28 ))
ياونتي ونة غريرٍ ومظلوم = ورعٍ يتيم بين عم وجارات
عمه من امه ينزره دايم الدوم = وهن يعزرنه على غير مشهات
على عشير حط في قلبي إثلوم = ومن الجفا بين مواري وشارات
ماشفت من زين التواصيف مرسوم = إليا طلبته طلبةٍ منه ماجات
لو كان ماتسوى ونيني طرف يوم = غير التشكي والبكا والتنهات
الولف سنه والمصافيط مرسوم = من قبلنا جتله سوالف وهرجات
ركبٍ بليا هدو ترى اهلها قوم = هداني من بينهم منه ريبات
الحرب تسمع له نظارت وعلوم = والطيب يطرب والردى زود فشلات
إترك جواب يلحقك منه مثلوم = وان فات شي لاتصير انت شمات
مازان لك مادام لك دايم الدوم = وكل لاما في قفاها تفخات
عطني حريض العلم من قبل ماقوم = سوالفك عندي ليا جيت زينات
مثل الزهر صبحية السيل بحزوم = في يوم خدره والمحاجر مملات
بالك تشح بهرجتك تنقل الزوم = مادامها ياغض الانهاد حلوات
الحر يامنه شهر يبعد الحوم = والتبع مايجزع ولافيه نوهات
(( 29 ))
يا بنت انا قلبي عذلته ولاطاع =عذلت قلبي عن هواك وعصاني
ياعين شيهانٍ من الكف ينزاع = ياشاف جولٍ دارجٍ في بياني
إما على غيرك مسيره تمر ضاع = يشدي مسير اللي من الحيل واني
وقلبي عليك من الضما يقرع إقراع = عليك طواي الضماير طواني
(( 30 ))
انا اليوم عقب العصر شرفت بالمرقاب = تجليت فيه إشوي والليل ممسيني
تعومس إعيوني كن فيها سفر وحراب = وتعومست من حر ازرق الدمع عيني
على صاحبٍ عرقا على القلب بالصواب = عبّد عن طريق الشرع عيا يماشيني
ألا يا لطيف الروح ماتقبل ثواب = تصدق علي بجيةٍ منك تعطيني
ترى الشيب يا لطيف الحشا جافي الشباب = وترى من عطا يعطيه مغني الضعافيني
انا اليوم مثل اللي فقيرٍ يطق الباب = ترى ملة الاجواد تعطي المساكيني
(( 31 ))
ياصاحبي عنه ارمسن العلامي = وحتى حلوم الليل عيت تجيبه
ابكي وطاويني عليه الهيامي = يا الله عسى اللي صاب قلبي يصيبه
انا على شوفه حزين وكامي = واللي بصدري كامته مادريبه
ادراه عن حكيت اعيال الحرامي = وعند العرب ماجيت للزين غيبه
حبه إمبني في ضميري إخيامي = ولا واعذاب اللي بحبه بليبه
ماعاد يمحا لين يمحا سنامي = تمحا إنصاله وتخايط شعيبه
وين انت يااللي له توصل سلامي = علمٍ يوداله وعلمٍ يجيبه
مامن صديق يانهمته إحامي = اجزاه بالاحسان واشوف طيبه
ياكود ابن عباد قرم تمامي = عوايده يفرح بحاجة إصحيبه
يثنيه إله عد الجراد التهامي = وعداد جنحانه وريشه وصيبه
(( 32 ))
خلي تولاني بحد الخناجر = ياقو قلبه مزع القلب بيديه
خزمتني خزم الخشب بالاناجر = في هلبت الكمبار عابيه راعيه
سميها ينبت ببعض المحاجر = وبعض المحاجر والصبخ مايجي فيه
وان قلت قولٍ فيه ماني بفاجر = عز الله اني باخصٍ في معانيه
(( 33 ))
اليوم لطيف الروح يا (( نما )) شفناه = ولقيت عنده واحدٍ حال دونه
سلم وقلط لي هوى البال يمناه = سلام يوم ان العرب يسمعونه
عليه صملان الظماير مطواه = من عام الاول يابسات إشنونه
صبرت صبرٍ ماهقيت اني اقواه = يا الله تعاوني بصبر المعونه
اللي كما اللولو تليعج ثناياه = كن الرماح الوارده في إعيونه
(( نما ))
هو :
نما محمد الغربه العازمي
(( 34 ))
انا اليوم يا لطيف الحشا جيتكم بادي = وابي للبداوه يا أريش العين ترحيبه
ترحيبه من اقصى القلب وانصاه بفوادي = ترى من مشى درب السنع قيل يا طيبه
ترى الناس فيهم من حسودٍ ونقادي = ياعل الحسود الله يقطع عراويه
جزع يوم ماله من هوى البيض ودادي = على كثر ماأقبل ما لقى من يهليبه
(( 35 ))
الله من قلبٍ تجي فيه سوجات = سوجات موجات على كفة السيف
وتجيه من بعض الهواجيس دكات = ياقلت هاد وهان جت به عواصيف
عيني تذكرها القدايم وما فات = طرايف يوم الهوى لي على الكيف
رجلّي دايم مكلفات مشيحات = اركض كما المذهب وانط المشاريف
واقنب كما سرحان وارمي بالاصوات = وانحب نحيبه واكتمه بالسراجيف
قلبٍ ترمع مثل غصن الشرافات = دايم تومي به هبوب الشفاشيف
لولا الله ابرك والغنى والتنهات = ماجوّداً قلبي إضلوع مهاديف
والجفن جازي تالي الليل مابات = جازٍ ويزعج بالدموع الذواريف
والكبد ساطمها عن الزاد معطات = هم الحبيب وبعد زين التواصيف
الحال باريها كما بري رندات = لوحٍ يسوونه بصار القلاليف
صمٍ رعوا وسطه ببصر وشوفات = يبي يسوونه جفيرٍ على سيف
حالي غدت عند البني الخوندات = من كثر ما دلبح لهن بالملاقيف
اركض عليهن دام هن لي مودات = ياهب ولمي دام هالي تصاريف
يا بدلن بحيلةٍ جبت حيلات = وإليا انكرن انا خيار العواريف
احدٍ يسقنه من المر كاسات = واحدٍ يهرجله بسرد المحاليف
نوعٍ يحضبن له ونوعٍ بعيدات = وليا بغى الطامن رقن المشاريف
وحدٍ يجن له بالمحاريف عجلات = والصيد يبقى له رجال ظواريف
(36)
شهانة(ن) من سبها اخطى عليها= عوق النفيج وداغر الخرب تفراه
يانطت البزوه وصرت إذنيها = تبطحت عنها الجعر مع سمهداه
توحف كما نجم(ن) تصرم عليها= بريش ترفعها الثنادي الموزاه
حرام ياسب الردى مايجيها = قناصها ياراح بالخرج يملاه
واليوم طاحت دوك عابت إيديها = مادبر الله كان والحمد لله
( 37 )
يقول ابن جافور صلوا على النبي =وتسمعوا ياحاضرين اجلوسها
دن الدواه وهات قرطاس والقلم= واكتب بيوتن مثل نقد افلوسها
مثايلن من سمعها غنابها= شوحاتها تقطع ظهر جاسوسها
مثايلن متكونتن مخاطيبها = يبذ مناحيها اطوال طعوسها
إليا زفر مابي وفاحت مثايلي = من قبة فيها النهوم تدوسها
هبت دواليب الاحيمر وقلقت = زاد الهوى فيها وغمر كوسها
البلد ماعين لها حدر قاعه = كن الجمال المجهمات إدغوسها
ماياتها فيها المراكب سافرت= فيها القريز اللي اكبار إنفوسها
وكل الرجال الطيبه تدراني= حشمه وقدر وشيمة في روسها
ما أخطي وفي حاجاتها تلقاني = إمحشمه وتروح في ناموسها
الا الخمايم ماتعرف العاني = لين الجمال الصايكه تدوسها
مايقضي الحاجات كل ادويني = تظهر اجمال مايطاول روسها
ليا تشربك في الحبايل وصاته = يغثي كما يغثي إخريف عوسها
أدرى صديقي عن خمال إلساني = و الا المعادي عرته ندوسها
ماثور لين ان الخطأ يبلاني= عقبه تبين والعلوم أحوسها
ومن لايثمن للخطأ والجادي = يجيه من سبع السباع فروسها
وأنطح ليا مني بليت بلقوى = يا بين الطيب وتار نسوسها
ترا الرجال ابهم خنان وطيب = لكن تعدى عن خنانها اضروسها
ياوش عذارا جوزن إذكاره = من صافي الماء فصلن ملبوسها
ملبوسها دب الليالي دايم = يعجبك في بعض المكان اجلوسها
( 38 )
مادام رجلي بالمشي يعينني= وعيني تشوف السفر واميز اليمه
بدوج حتى تفرج ظيقتي عني= العمر فات أوله ودرج الرمه
اشوف سود الليالي دلبحت عني = حتى الشباب انتهى ما عاد انا يمه
ياليتهن مثل ما راحن يردني= والعود يرجع شباب وينجلي همه
ظنيت فيهن ولا صارن على ظني = لو به معمر شبابن رحت انا يمه
اعطيه فوق الثمن زودن على فني = واللي يبيله شبابن ينتقل يمه
يعطيه عمرن جديد زين ويغني = وتطلع ثناين تلاوح بيض بالرمه
يالله ياغافر الزلات إعف عني = تمحي إذنوبن علي وتبري الذمه
تم الإنتهاء
جرى نقل جميع هذه القصائد من :
ديوان (( صدى الماضي ))
طبعه سنه 1988 م
للمؤلف : (( مطلق فهاد الجافور ))
+
ديوان الشاعر : (( فهد بن جافور )) المطبوع