البارحـة عديـت روس المراقيـب = خذيت فيها مـن زمانـي حسايـف
سرجت رجلي ماحسبت المطاليـب =سرجة قداميّن من المـوت خايـف
ضاقت عليه وضيّقـوه المعازيـب =وساقوا عليه من التهايـم ردايـف
قالوا معاك لغيبة الشمـس تقريـب=شف لك مع الطرقه عوين وصرايف
جمع زهابك قبل عوج المشاعيـب=تمسي على غارقك جلمـن تلايـف
وأنا لقيت بـراس مرقـاه تعذيـب=مدري كـدر والا فـراق الولايـف
سامرت رجم(ن) في فروجه مكاتيب=كد عقبوه اهل القلـوب الرهايـف
رجمن يذري عن سموم اللواهيـب=في راس ضلع ن قبلة شعيب هايف
مدهال للضايق وراعي التحاسيـب=اللـي ضلوعـه غاديـات نحايـف
جيته وأنا كامي جروحـن معاطيـب=الي ثـلاث سنيـن حالـي كلايـف
وساعة رقيته كن روس العراقيـب=غضروفهـا دمـه غدالـه ذرايـف
عليـك ياوقـت العنـا والتعاذيـب=تنقص مع غيري عليك الوظايـف
قريتني لسطـورة الشـاة والذيـب=وأسلفت فيني ماعطيـت الخلايـف
عزلتني عزلـة حمـود الدغيليـب=ونلت الكثير ولاعطيـت الخفايـف
والا انت ياراعي الغثا والهناديـب=القلب في دعواك ميّـس وعايـف
اللي سواتك لو يضـك المقاضيـب=تفتر أيديـه ولا وصـل للنوايـف
بدري عليك العرف ياجاهل الطيـب=العرف كايد وانت سبـع العجايـف
تلميذ ماضنـك خذيـت التجاريـب=لو كنت في دنياك سامـع وشايـف
من بار مثلك في خيار الاصاحيـب=ودك على راسـه تثـور القذايـف