ياناعس الطرف مابيني وبينك ديار=الدار وحده وأنا بالحيل منك إندمرت
أنخاك بالوصل يالمجمول ساعة نهار=وتقول حاولت والله شاهدن ماقدرت
تكذب عليهّ وأنا بعد هذا اعتذار=لوكنت ياصاحبي لي بالخطا ماإعتذرت
بترك لك الوقت وبترك لك الاختيار=وأنته لامنك من إهذيك الظروف إستقرت
حدد مكانك وأنا يابن القروم الحرار=أشيل شرهتّك لو عن موعدك ماحضرت
والله لجي لك ولو دونك خطر وانتحار=يالذ وأحلا إنتحارن كان فيك إنتحرت
لجلك بضحي ولاغير المسار أي مسار=عليه أبمشي لو إنك للوفا مااستدرت
عشان ذيك الصداقه والعلوم الكبار=ماني بقاصر عن اللي منه ليّه قصرت
من زود حبك خفوقي فيك مايوم بار=وفاه وياك باقي لك على ماخبرت
ملكت قلبي يبو خدن ماناشه سمار=وأتعبتني بالوعود اللي عليها صبرت
شفني مابدلت فيك التالف المستعار= اللي عشانك بلذاته مايوم إنقمرت
مازلت أصارع عذاب العهد والانتظار=واقول يمكن يجي منك على ماإنتظرت
وصلن نضيفن يسلي خافقي بالحوار=اللي يشتت مافيه إمن الوذا ماغمرت
مير البلا يازعيم اللي تذب القفار=إني ولايوم فى حبك وحرصك شعرت
أذوق منك القهر وأشوف منك الفرار=وأموت من نارك اللي فى خفوقي سعرت
لوكان بالحب حربن طاحنه وإنتصار=والله لقول إنك أنت اللي علي إنتصرت
شف عقب ماتلفت قلبي منك صار إنفطار=بالكبد يامن معي بالطيب أبد مابذرت
من سبتك شلت همن منه مت إحتشار=لولاه ماكان من طعم السعاده ظهرت
سببت لي فى حياتي نكستن وإنحدار=ياصاحبن مذكر إني عنك يوم إستخرت
كم واحدن تاب عن ماحب وأصلح وأنار=وأنا لقيتك ضياعن مت به وإنقبرت
لاشفت حالي غرقت بحيرتن وإنبهار=واقول إهو حب ولاإني بسحر إنسحرت
ماعاد أميز وش اللي صابني من ضرار=شرك ذبحني وأنا بالحيل منه إنقهرت
عذبتني بالهوى واشقيتني بختبار=ماشفت مثله لو إني بجتيازه ظفرت
الاوله منه يوم الله سترك بستار=جيتك ولارحت منك إلا على مانسترت
والثانيه يوم كلن يم الاجواد غار=فى سد خله بسدك للعرب ماجهرت
والثالثه يوم جاتك مثل سود البكار=أيام خليتها لك كالزهر وزدهرت
والرابعه يوم تطلبني كبارن عسار=ماقلت إلك لا معك بالطيب حيل إستمرت
ياما لقيتك عقب منت بعمار إبدمار=وأعمرك وجحد إنك من وفاي إنعمرت
لو للكرم من شعور إنكان بالحيل ثار=ثم قال عزالله إنك بالعطايا سكرت
وقف ترى صاحبك ياطيب القلب نار=ياكلك وانته بطيبك للجحود إنهمرت
ماهو مخليك لين توقف الانهمار=وإلا ليا شافك إمن الخير كله فقرت
مهما عليك الوهم بالشك والجحد دار=تبقى هذاك الحبيب اللي عنهّ مانفرت
إمعلقن فيك ضني ياستير الزرار=لوكان منك طفرت اقول ابد ماطفرت
اجدده دوم وأقوى عقب طول إنهيار=وأخسر ولا احزن على اللي من غرامك خسرت
لنك منار لحياتي ياهذاك المنار=اللي من إبعيد يضوي لي وأنا له عبرت
جيتك من اللي مايبغى منك غير إعتبار=ياعز وأغلا حبيبن فى خفوقي خطرت
ماكنت أبي منك للمحضور مدة مزار=ولا لمن يغضب الله منك أبي ماحضرت
كنت أتمنى يصير اللي ولا يوم صار=وصلن ولا أدري علامك بعتناقه كفرت
عطيتك الوقت كله والسنع والقرار=وأخذت منك الكلام اللي بصدقه فجرت
كم قلت لي ياحمد كان الزمان إستدار=للوصل والله ماقول إني بضرف إنجبرت
والله لجي لك وإخذ كلمه بدون إحتظار=على الوفا اتعيش وإني لك عليها نذرت
تحلف وأنا منك أصدق وأهتدي بالقصار=ولاأدري إني على حيلة فرارك خدرت
على كلامك خفوقي سار والعقل سار=ياصاحبن من سببك إمن الهموم إحتشرت
متى يجي للكلام اللي تقوله ثمار=واقول عزالله إنك وافي ن ماغدرت
هذا سؤالي ولاينصاه منك إحتقار=جاوب وأنا بشكرك لو بالاجابه صغرت