هذه الصفحه مخصصه للأبيات التي لم تكتمل ، ويشرفني تسميتها بـ سنجاريات .
أتمنى أن أوفق في طرح مايلامس مشاعركم وأحاسيسكم .
،
،
،
( أحيان ) أحس إن المشاعر عرايا = بالذات لالديت بالوجه قبله
أستصغر بعيني جميع البرايا = وأخضع لمن كل النفوس تحسب له
وأستذكر ذنوبي وسود النوايا = في موقف ٍ مافيه بعده وقبله
يارب لاضاقت جميع النحايا = فرّج لعبد ٍ مايبي غير سبله
ياكم من شيخ ٍ يسوق الهدايا = فوقي برق براقه ،، وهل وبله
لكن ماتغني كثار العطايا = عنّك ... ومن غرّنه أمواله أبله
أتوب لك ياعالم ٍ باالخفايا = عبدك يحاتي يومه اللي كتب له
أليا متى وإحنا نسوق الخطايا = سوق الجمال لخايع ٍ فيه ربله
،
،
،
العام أقول أيامنا تقزيره = يوم إن بنيان الفرح معموره
واليوم يالله الستر والخيره = قامت تشاوتني مشاوت كوره
الحظ الأقشر مايودي ديره = وأحلامنا تمسح من السبوره
حتى المواجه ، والغلا ، والغيره = فقدتهن من يوم قفّت نوره
اللي غلاها باين ٍ تأثيره = في وجه من سيطر عليه شعوره
ياقلب وكبار الأمور صغيره = ويانفس من عقب التعب ماجوره
،
،
،
تحملت ... وصدوف الليالي حمول بعير = والايام مهما تغوي العبد غداره
سلكنا الطريق ولامشيناه عكس السير = وعدواننا تحفر والأصحاب قباره
رفيق أمس غير وطبعه اليوم صاير غير = دليل إنه أقفى ... عني إنقطعت أخباره
تعذّر ,, ولكن ماكسر عذره التغيير = وأنا ماتعوضني بوقفاته أعذاره
قصرت القدم دونه وانا سمّي التقصير = لكن حدني من دونه الجرح وأسراره
،
،
،
ياقلب ،، لايجرحك غدر أحبابك = الحب تاليته طعون وفرقا
ويادمع عيني لاوصلت أهدابك = وملّيت من كثر إنحدارك ،،، فـ إرقا
وياهيه ،،، من عقب البطا وش جابك = حتى الجروح الحمر صارت زرقا
صحيح كنت أموت بك وأحيابك = وتنوح لك فوق الضلوع الورقا
وعقب الطعون وعقب طول غيابك = من حبك ومن سيرتك ( يافرقا )
،
،
،
عساني عساني ما أفقدك يارهيف العود = وعسى الوقت مايأخذك مني وتنساني
أحبك محبه ماتبي ياغلاي شهود = وأقدر جنابك مثل ماأقدر إخواني
دخيلك لاتنزل دمعتك دامني موجود = لياضاق صدرك ، دق رقمي وتلقاني
،
،
،
ياجعل من فرّق مواليف وأحباب = ياتيه من جور الزمن مايعوقه
ناس ٍ تدوّر للنمايم وتغتاب = ماكنها إلا للهروج مخلوقه
،
،
،
نحشم الخيل ،، لن الخيل فيها عزوم = والسحاب نعشق طاريه لأجل مطره
علموا من كلانا بالحكي والحلوم = لايصيبه مرض خنزير وإلا بقره
يذكر الله مدام إنه يعايس يقوم = قبل تاتي صواديف الزمن بخبره
المراجل ماتوخذ عقب ليله ويوم = دونها ليل ، وإجبال ، وبحر ، وإغبره
جعل خوّة زحازيح النشاما تدوم = وجعل عرف الرخوم نهايته فشهره
،
،
،
إفرد إيدينك وصدرك حنين وظلني = عن سموم القيض ، لين آردك ثم أرتويك
حطني مابين عوج الضلوع وخلني = وإنسني في داخلك ( جعلني ما أطري عليك )
طالبك ... وإلا خذ القلب مني ملني = خايف ٍ لايصير حبي لنفسي لك شريك
المشاعر تنثنيلك غلا وتفلني = قدم عينك وأهتديلك وأنا منّك وإليك
أمطر أمطر يافديتك غرام وبلني = وإعتبرني معك سيف ٍ يصونك ويحميك
وإن جرحتك ، فدوة ٍ لك ( بوجهي سلّني ) = لأجل أموت بنص منّك ونص ٍ مفتديك
،
،
،
هذا ما إستطعت جمعه والقادم أجمل إن شاء الله .
تقبلوا تحياتي .