جار الزمان وصار للناس منظور=وغنّت على غصن الصدوف الحمامه
طاح الشجاع وضاقت فجوج وصدور=( وشعيل ) عيّت لا تشيله عظامه
وأنا وهقواتي لنا خمسة شهور=نصد عن ( ملفي ) وننطر ( سلامه )
ومن بعد ماضاق الفضا ويبس حنجور=جيته أدوّر من وراه السلامه
عنيت له من ديرتي من ورى ( الزور )=ونسجت من زين التعابير خامه
جيته ... وأنا مانيب من ينطق الزور=أقاوم صدوف الزمن وإحتدامه
ناديت ... لكن كني أخاطب قبور=وصديت يوم إنه رجع في كلامه
ماجور يا جود المناعير ماجور=ومرحوم يا عصر الوفا والشهامه
إليا متى وأنا على وعد بلفور=ما بين تحقيق الأمل وإنعدامه
يأهل الكويت ... وعادت الوقت له دور=لكن إليا وصلت حدود الكرامه
لي عزة ن ما تقبل الظيم وتثور=ولي هامة ن تطغى على كل هامه
أصادم الأيام ... وأداحم نحور=ولا ألتفت لأهل الردى والرخامه
أصول فالميدان ( والخوف منحور )=ترّك صبي ن مايروم الزعامه
( دستوري ) الشيمه وللبعض دستور=وطلعي تعدى طلع ( زرقا اليمامه )
ماجي مكان ن وسطه ( الحسد ) معمور=اللي غشى بعض القلوب بظلامه
هذاك ثور ن هايج وناطحه ثور=وهذا دعس راسه سوات النعامه
إليا إحضروا غابوا ... ولا كنهم حضور=حطولهم في خد الأشراف ( شامه )
لابينهم خوّه ولا عندهم شور=الكل منهم غارق ن في منامه
اطيبهم اللي دايم يلف ويدور=ويرخص خويه لأجل يبلغ مرامه
وأنا لو إني مأبني بيوت وقصور=غيري كثير ولا عليّه ملامه
يكفيني إني دون ربعي كما السور=لا جا نهار ن فيه عج وعسامه
أوقف بجاه ، ومال ، وأفعال ، وشعور=( وقفت معزي ) ساعة الوقت ظامه
وقفت شرف وإجلال والسيف مشهور=يشوش راسي ثم أطش العمامه
ربعي وجيه العز والذل مكسور=( ألاد عازم ) محتمين الجهامه
عاداتنا لامن غدى السلم ( منكور )=وكل ن تحيزم وإلتفت في حزامه
نركض كما تركض على الصيده نمور=وأفعالنا تشبه سهوم القيامه
روس الرجال ... وغيرنا مابه قصور=كل ن على عز وعزيز ن مقامه
أهل المعزه فعلهم كنه = النوروأهل الردى ليل ن عتيم ن ظلامه