بسم الله والحمد لله والسلاة والسلام على رسول الله , وبعد : -
ينتمي آل شريم الكرام الى فخذ التومه من قبيلة العوازم , وقد برز منهم شاعرين هما : هادي بن شريم وولده مبارك .
هادي بن شريم : -
----------------
من شعراء العوازم الذين شهدوا الوقائع مثل وقعة الصرار سنة 1919 , وقد خلدها بقصيدته المشهوره التي يقول فيها :
ربعي نهار الكون ما فيهم شرود / حنا هذاك اليوم ما نبغى الحياه
يستاهلون اللي تعلق بالعمود / يوم البنادق كنهن نفض العباه
لعيون عقشا كنها ظبي النفود / الجمع الادنى نصفقه عنا وراه
مبارك بن هادي بن شريم : -
---------------------------
من شعراء العوازم المخضرمين حيث أنه توفى سنة 1993 , ومن أشهر قصائده تلك التي قالها في الستينات , وهي من روائع الشعر الشعبي المعاصر , يقول فيها :
عديت رجم العلا لا زالت ركونه / عديته اليوم يا مرزوق وأشقاني
ذكر علي بعيد الخد من دونه / يبيد الهجن في الممشى والاقراني
ما يوصله كود تنبير يسوقونه / فرت شرابه يصبونه بالاقلاني
وقف على مركز باصه يقصونه / واللي يسوقه مع الطاروق طرباني
حبه عقلني عقال اللي يعقلونه / زود على الحبل الاول حط له ثاني
خلوه عقب الصعابه تهمل عيونه / عقب العبث ما يقوم الا بعمداني
ليا ناض كنه على جنبه يكزونه / معقله واحدن عليه زعلاني
أحب خلي وأحب اللي يحبونه / وأبغض عدو الغضي لو هو من أخواني
أبو جديلن يبذ اللي يكدونه / معموله الورد ومخمر بريحاني
واليا قعد في شليله مالت قرونه / شقرن تثنى بحضنه مثل شرطاني
حديثه أحلى من اللي تمطر مزونه / نصبن على نجع بدون عقب مقطاني
هواه راكد وصافي النقع يروونه / كنه حديث الحبيب يوم لاقاني
والخد كنه ينظف له بصابونه / لو تلحقه شمس بالمطراش ما شاني
واصبيه أسود وحال الرمش من دونه / هو آدمي بس عينه عين شيهاني
شرح بعض الكلمات : -
تنبير : سياره .
فرت : سياره من طراز فورد .
باصه يقصونه : أي جواز سفره يختمونه .
عقب العبث ما يقوم الا بعمداني : اشاره الى العنف في عسف الجمل .
واليا ناض : أي نهض .