أعترف أنك أغلى ما فقدنه كفوفي=وأعترف أنك أغلى من سكن بالخيال
وأنك اللي سلب قلبي وفكري وشوفي=وأنك اللي تعلى فوق عرش الجمال
والحقيقه تعرف اللي يقود الخشوفي=عند زينك حرام أنه يسمى غزال
وأعترف في غيابك حيل شانت ظروفي=بس مازلت عايش مثل سمر الجبال
وأني اللي لغير الله ماصار خوفي=خفت في غيبتك ضيم وعذاب الليال
وأنك اللي فنت دونك مضارب سيوفي=في مواجه عيونك دون فعل الرجال
أعتزي فالمشاعر وأعتزي في حروفي=ثم ردت بي العزوه وأنا أخو العيال
جيت كلي وجبتك في هواي معسوفي=وأثمرت عزوتي يوم أن فتحلي مجال
حيل تعبتني وياك واليوم توفي=في محبة خفوقي لك بقطع الوصال
لو تمادى بهجرك مسكنك وسط جوفي=لك جفوني غطا ورموش عيني ضلال
جيتني ضيف وأن قفيت يا أغلى ضيوفي=عارفٍ حشمتك عندي على كل حال