يا من تشاورنـي وبيّنـت خافيـك = ان قلتلك كلمـة صحيـح احتملهـا
لاطالنـي مـرك ولاذقـت حاليـك = خوّة صدف وقتـك جديـراً بأجلهـا
ومن واجب الخوه ابـرك واداريـك = واضغط على نفسي واخفي زعلهـا
ولابد ما تقفـي وغيـري يخاويـك = ويبين لـك نجاحهـا مـن فشلهـا
من خبرتي توّك تجـرب مساعيـك = وجديدها ما يخبـرك عـن سملهـا
اصبـر ودورات الليالـي توريـك = وتاخـذ عبـر بحداثهـا وتعقلهـا
لكن انـا بعطيـك نبـذه ووصيـك = والباقـيـات الله بغيـبـه كفلـهـا
مـن واقعـك لاتبنـي الا مباديـك = اللـي يجنبـك النفـوس وجهلهـا
ومن الخيال ابن المدايـن بياديـك = وبعد البنـا هـد المدايـن بهلهـا
وارفع مقامك لايجي فيـك تشكيـك = ثقتـك فـي نفسـك يقلـل زللهـا
واحذر تجامل واحـدٍ مـا يدانيـك = لوحاجتـك دونـه ضعيـفٍ أملهـا
ترى الدسائس بالعمـل مـا تعليـك = اختر جزال سمانهـا عـن هزلهـا
عملك بعيـون الرجاجيـل يحييـك = وان كلفـوك بكلمـة الحـق قلهـا
ولاتلتفت للي مضـى مـن لياليـك = ما فات مـات وقولتـك لـو زلهـا
اللي يفوتك فـات غيـرك وقافيـك = امـور وان فاتـتـك دوّر بدلـهـا
وخل الطمع دايـم عـدوّك وتنبيـك = دنياك عـن نـاسٍ طمعهـا خذلهـا
رزقك مسجل وانت في الرحم ويجيك = وارزاق غيرك ماتجي غيـر اهلهـا
كل الامـور مثبتـه عنـد واليـك = وروس القمم ما خلدت من وصلهـا
دنياك لوتضحـك بوجهـك تبكيـك = والنفس ماتدري متى وقـت اجلهـا
انصحك لاتركض وراهـا وتغريـك = هـذا رحـل عنهـا وهـذا نزلهـا
اللي يمشي ركب غيـرك يمشيـك = والباقيـات الصالحـات وعملـهـا