مبروك يا متعب عسى الله يهنيك=يانسل حلال الصعيبات نايف
اللي على درب المراجل مربيك=نايف وفي كل المواجيب نايف
لاصار بالدعوى علوم وشرابيك=وبيّن بمغزاها شجاعٍ وخايف
يحيي ربوعه بالمواقف ويحييك=وتصبح ثقيلات المصايب خفايف
خلك على نهجه ولاني موصيك=حراً معك عقلك وسامع وشايف
لكن من الواجب من الشعر بهديك=واعطيك من نظم البيوت الطرايف
احرص على دينك وحسّن مباديك=قولت نعم لابد فيها كلايف
تراك منتب مختفي في مساعيك=الناس تدري والسنتها صحايف
ناسٍ حريصه وين تمشي خطاويك=هذا يجي عندك ولآخر مضايف
ولا تجازي الزله بزله ولا ابيك=تصغر ابيك بعز شامخ وعايف
وان شفت شئ يغضبك من دناويك=الحلم فأن الحلم مابه حسايف
الحلم من بين الرفاقه يعليك=أخير من سل السيوف الرهايف
اخذ الصحيح اللي عن الشك يغنيك=والشعر حكمه للعقول وطرايف