يفداك دمي لو تجف اقلامي = يا لين اخطّ اللوحه الزيتيه
والنعم يا ( محمد ) وسبع انعامي = يا ابوهلا واهلين والله حيّه
يا بندقي فالاّزمه وحزامي = بعض الامور تخالف الجاهيّه
يا خوك قلّ للكاتب الاعلامي = المسأله يا صاحبي شخصيه
اكتب ( لراسي ) ما عليّ إلزامي = مطويّه احسن لي من اعلاميّه
ماني على اضوائهم حوّامي = ضيّ القمر ولا الضيا الوهميّه
ولا اعترف بالملهمه لـإلهامي = ولا احتفلت بـليلة الالفيه
ولا يهيضني ( صباح اللامي ) = اهمّ شي الراحه النفسيّه
حافظ رصيد لدورة الايامي = ولا اشعر بخيبة امل موليّه
يا ربي ابعد كارثة( تسونامي ) = او حطها فالدوله العبريّه
قولوا لمن همّه اعظّ إبهامي = احمض على بوزه من اللوميّه
لـربّ رميه دون قصد الرامي = صابت هدف وإلا وراه شويّه
شفني وصلت وجرح وجهي دامي = ما قلت لجل عيونك السحريّه
الياس اسوقه عن طريق احلامي = كما تساق النوق فالبرّيه
ظابط خطاي وغايتي قدامي = انا لها دامي على رجليّه
ابلغ من آثار الحديد الحامي = كلمة ( سفيه ) وقالها عفويه
واحلى من العدّ العذي للضامي = كلمة ( شكر ) على جهود إيديّه