(( للبن محماسه ))
للبن محماسة وكيفي شرابه = وبهارها زايد به الهيل مهدور
غنيت من طنخة يزيد الضوا به = والحمد لله دايم بعز وسرور
العز مكسب لرجل في شبابه = لاصار ورثه عز والساس مخبور
لله حكمه يا مبد الحرابه = والسيف ضربه خازمٍ كل مذعور
حنا دوا للي يدور طبابه = دام البصيره عندهم مالها دور
الميسم الحامي يطيب الكوابه = الكي يصحي غايب الذهن والعور
الراي والله عند عز العصابه = رجلٍ مقدم للعضيمات مذخور
حرٍ يذري والكرم والصخا به = والطيب والنوماس لظلم هو نور
شيمه وقيمه مع شموخ ومهابه = والحر مخلابه على الصيد باتور
عشنا وشفنا يازمان الغرابه = الشاه سبعٍ وياخذ ويبدي الشور
هذا الزمن والبسّ دسم لنابه = يالله لطفك والعرب تنطق الزور
هذا الزمن والثعل ذيب الذيابه = والبوم صار اليوم حرٍ على الكور
هذا الزمن ياهيه مكبر مصابه = لاعاش رجالٍ على الكذب والجور
هذا الزمن حلوه يشابه سرابه = يالله لطفك والعرب نطقها الزور