يامرحبا عد همال الخيالي=وعداد من صام فى شهر الصياما
ترحيبتن فيك ياذرب الخصالي=ياللي لك بخافقي قدر ومقاما
من جيتني يابعد حالي ومالي=وانا لك الله بالحال التماما
انهيت حزني ومنك الهم زالي=واسعدتني حيل واسقيت الحياما
عزالله انك علي بالحيل غالي=وانك معذب خفوقي بالهياما
يانافل الجيل ياسمح القبالي=ياطيب الساس يانسل الكراما
جيتّك هذي من اصدوف الليالي=وإلا عليهّ مرجعّك الغراما
بالله قلي ياموهوب الجمالي=بالصدق وانطق بحبك لاتساما
الياتواضعت منك ايطيب فالي=واليا تكبرت يغشاك الملاما
انا مبي منك ياترف الدلالي=غير الحقايق ومعسول الكلاما
تدري بي انك مزودني هبالي=واني عليك انتحب مثل اليتاما
من هجرك اللي علي بالحيل طالي= عديت بالهم والسقم السقاما
حبك علي مر ابد ماهوب حالي=من سبته دوم عيني ماتناما
والكبد ماتذوق شهلول الزلالي=ولابعد عقبك اتذوق الطعاما
والقلب فى كل ماطيفك طرالي= خلا ضلوعي من اسبابك تواما
ايفر مثل العديم امن الجبالي= اللي على الصيد يطوي طوي خاما
حكمت قلبي ولاسريت حالي=بالوصل والعطف بهذيك العواما
صدقت فيني من اهذيك السفالي=هرجن بلا اثبات مبني من حراما
واقفيت عني ولاعقبك جرالي=غير الشقا والثقيلات العظاما
اهموم خطرات عسراتن ثقالي=منهن دموعي كما وبل الغماما
واحزان مامنهن الزاد اهتنالي=بالصدر من سبتك دايم تناما
لولا الولي ماقطع منهن حبالي=خلني العام معدومن عداما
من يوم ماغبت عني مابقالي=غير السهر والمسلي بالظلاما
شعرن يسليني الياضاق بالي=ماكنه الا البحور اللي تطاما
صعبن ولاكن خضع لي واهتدالي=يومن غيري مايومن فيه عاما
اذكرك فبياته الغر الجزالي=وانوح لك فيه من نوح الحماما
عذبتني وانت عني دوم سالي=ماجاك من مايجيني من كتاما
تضحك وانا خافقي يصلاه صالي=والحال منك ابحطامن فى حطاما
انته من الحزن يالمحبوب خالي=وانا من الحزن مصيوب ابسهاما
من غبت ياللي عليك الدمع سالي=وانا اتحراك ياضبي العداما
دايم مع الليل فكري وانشغالي=فى يومن ايصير به وصلن ولاما
اسرح معك كل ليله بالخيالي=واشهق ليا جاب لي ذيك القداما
ايام حلوه ماصار ابها خمالي=عشنا بها بعتدالن وحتراما
راحت ومعها غدالك ماغدالي=عشقن على العز والطيب استقاما
ياطيب ذيك النضيفات السمالي=يوم اجمعتنا على طيب ونظاما
الياطرت لي يقرب لي زوالي= واحس كني قريصن من هواما
ادوخ واقول من ضلك ضلالي=يالواحد اللي ماغيرك له دواما
علي منك العذاب اللي صفالي=شرسن ولااظن قد صاب الأناما
ناره بقلبي لها دوم اشتعالي=تشويه ماتهيد فيه الها اضطراما
منه ماكنت اتهقوى بالهنالي=واهمومي الها علي دوم احتداما
خلاني الشرس اسولف مع ضلالي= واعايد الناس من شرقن وشاما
على الضلاله سرحت ابعقل خالي=ولكل مهلك له امشي بحتكاما
من يوم ماعني انهيت الوصالي=ماشفت منك ولايوم اهتماما
خليتني للسعير اللي شوالي=قلبن يحبك وعن شرواك شاما
صديت يامن عليك امن الغزالي= مواري ن تطرح الحايم لاحاما
انا اتعذب واشوفك ماتبالي=باللي عليه من السقم ايتراما
تقسى ولافيك من شوق احتمالي=وانا لك الله موالم لك ولاما
عليك تصفق يميني فى شمالي= وجروح قلبي من اغيابك تداما
والحين يومن علي رجعك والي=سلمت وابغالك يازين القواما
تصدق معي بالاجابه فى سؤالي=وابغاك وياي كلك بنسجاما
دامك من الغش وهذاك الضلالي=صحيت وايقنت فى صدقي تماما
دام الحقيقه محت زور الهزالي=عني وعنا جلا ذاك العساما
جاوب ترى الهرج من شكواي طالي=قصيدتى تطلبك مسك الختاما
جيتّك يانسل مروين السلالي=صدفه من الوقت وإلا من غراما
خلاص جاني جوابك وانقضالي=منك مرامن ولابعده مراما
تمت ومني عدد حب الرمالي=على محمد صلاتي والسلاما
التوقيع - حمد بو ضريس العازمي
أنا ليامن غبت غيبه طويله= أرجع معي شعرن يعوض غيابي
انهيت حزني
( تقرير عن مشاركة مخالفة ) ، و الموجودة أسفل كل مشاركة .