رحل طيب الجدان

[حمد بو ضريس العازمي]

عسى الواحد المعبود يرحم سليل الجود=فهد جعل رب البيت يسكنه بالجنه
رحل طيب الجدان في يومه الموعود=عن الفانيه حكم المقادير شالنه
شبابن صدمنا علم موته وحنا إرقود=فزعنا وكلن جاوب الدمع والونه
بكينا على فقده وذقنا عليه إلهود=وأخذنا من الاحزان حزن الشقى لنه
صغيرن ماجاله فى حياته ثلاث إعقود=قبل يكمل العقدين الايام حطنه
بقبرن عسى له فيه عن فود بقعا فود=ورحمه من اللي لاعطى الخير مامنه
هذاك الولد قرمن خذا من هذاك العود=خصالن مع اهل الطيب والجود عدنه
كريمن شريفن ماجنى العار والمنقود=ولايوم شفنا منه حنه ولالنه
بوقت الرخى والطيب حاضر ماهو مفقود=ولابالشدايد قيل كنه ولاكنه
يبادل رجال الطيب بالطيبه ويذود=عن اللي شرور الناس من جور يرعنه
على طبعه الهادي يجي بالوفا ويعود=خفوقه نظيفن طيبن بالعرب ضنه
ماعمره ظلم رجلن ولاشق ستر إفهود=ولاله بدرب البيض خطوات ودنه
نهل من هله طيبن عليه الرجال إشهود=وعلمن وطيب أخلاق بالعز عزنه
لياسولف إيسولف على حاصلن موكود=ولامن سكت يضحك لكل البشر سنه
ماجا يوم ثرثارن ولاباذلن مجهود=على الراديه وبليس للشر ماعنه
مصلي صلاته بالولي مخزي النمرود=هذا العلم من صادق نرد الخبر عنه
وأنا اقول صايم قبل لايضمه الملحود=بيومن يزيل الذنب نسل الشرف سنه؟
عرفنا عن الراحل من الشاهد الموجود=علومن عساهن مع هل الحور زكنه
رحل عاقلن هادي ماهو جاهلن مقرود=ولاهو مثل من شين الاخلاق يشعنه
مايغتاب مايقهر بشر مايعل اكبود=مايمشي ورى من كان كل الخنا فنه
حبيبن نظيفن ماسرح بالعلوم السود=نواياه مايومن على الشر حثنه
مايهتك بستر الجار مايخيّب المحدود=كريمن لامد الطيب مايلحقه حنه
مادوج بسوقن دايجه سافلن مجرود=من اللي عن المنقود والعار يحمنه
رفع قدره اللي مامعه بالسما معبود=ومشاه بدروبن من الخير سرنه
عليه القلوب اللي تحبه بحزن تجود=ماوالله لو طال المدى يوم ينسنه
لوإن الليالي كلبوها سهود امهود=يعيش البنادم والملذات ينصنه
لاكن القدر جاري ولاعنه يوم اصدود=ومن له سهوم إتغير بالموت ماخطنه
خذاه الكريم اللي من امره تهب النود=بيومن عليه إجموع الاجواد صلنه
عسى يوم تاقف فوق قبر الفقيد احشود=وتدعى مايرمى وسط نيران يصلنه
رضى له من اللي عالمن فى دبيب الدود=ورحمه عسى منها فهد يسكن الجنه

[حمد بو ضريس العازمي]

القصيده خلصت بوقت وفاته

ولاكن حصلت ضروف وعقبها

حصلت حالة وفاه ثانيه وهذا سبب تاخيرها


المرثيه هذى بولد اختى فهد راشد الشليبه


الله يرحمه ويرحم كل اموات المسلمين

[الصامت في زمن الثرثرة]

جميلة جملية صح بوحك لاهنت

رحم الله فهد بواسع رحمته عزالله دايما الطيب عمره قصير

رحم الله أمواتكم و أموات المسلمين

كلنا على هالدرب ماشين يالله عفوك و غفرانك

تقبل مروري

[حمد بو ضريس العازمي]

اقتباس: المشاركة الأصلية كتبت بواسطة الصامت في زمن الثرثرة    جميلة جملية صح بوحك لاهنت رحم الله فهد بواسع رحمته عزالله دايما الطيب عمره قصير رحم الله أمواتكم و أموات المسلمين كلنا على هالدرب ماشين يالله عفوك و غفرانك تقبل مروري

صح بدنك يالغالي الله لايهينك على المرور


وعلى الكلام الطيب شرفتنى واسعدتنى


لك منى التحيه الطيبه