يمكن مع الايام

[حمد بو ضريس العازمي]

يمكن مع الايام تنزاح الاحزان=عن قلبي اللي من همومه حزيني
رجواي باللي خالقن كل ماكان=الواحد اللي للخلايق يعيني
عساه يرحمني من إفلان وفلان=ورتاح طول العمر من هم ديني
مليت من ظيقن له إسنين وزمان=وهو مخليني سواة الطحيني
من سبته ماشفت ياكود حرمان=من فرحتن ماجاتني من سنيني
لافكتن منه ولاضحكة إلسان=ولاطرب من هرجة الطيبيني
خلاني المكروه فى زود نقصان=ومكتفن عن حلم نفسي يديني
بالليل جفني منه للصبح سهران=والناس حولي كلهم نايميني
لولا الولي والشعر وهذيك الالحان=من ضيقتي ميت مع الميتيني
أسلي القلب المحطم بقيفان=ورتاح لابكالي القاف عيني
أخذ مع القيفان سجه ونسيان=عن همي اللي كل ليله يجيني
مره على حبن من الشين ماشان=وأمرار لهل الطيب والصالحيني
وأمرار يجنح بي على ذكر صدقان=وأجر لهذيك الرجال الونيني
أنا على طبعي فلا أجحد ولا إنسان=ولايغيرني بلا يبتليني
منسى ولاأرخص بالاجاويد الاثمان=ولاأشكي إهمومي على المغتنيني
أشكي على اللي منه الانسان ينعان=وأكف عن كل الخلايق يميني
عزيز لاهاين ولانيب منهان=ومقدر اللي فيه نخوه وديني
أجازي الاحسان دايم بالاحسان=وصد عن وجه الخبيث اللعيني
أمشي على الدنيا على كل مازان=وجنب الدرب الردي المشيني
لاشفت رجالن من المال مليان=دعيت إله لنه من المسلميني
قلت الله إيزيده ولاإيطيع شيطان=ويمد من فظله على الهالكيني
وإن شفت إلي صاحي وأنا حيل مرضان=قلت الله إيفكه من الحاسديني
لو كنت من سقمي عن السير عجزان=ماقول ليته فيك ماهوب فيني
مايثور فى قلبي من الحسد بركان=ولاأنغبن من عيشة المترفيني
الحمد للي منه يزداد الايمان=يومه ماخلاني على نيتيني
خلاني المعبود ستار الابدان=على سنع وبحصن منه حصيني
أشوف خلق الله لي إربوع وخوان=من نيتي مانظرلهم نظرتيني
ضني بهم طيب ولو شفت خذلان=سامحت لجل المعتلي خاذليني
مابادل الجحدان نقصن وجحدان=ولاأنجرف للي يسود جبيني
أترك عباد الفرد عايل وغلطان=وسج رجلي سج للعاقليني
ماهوب والله خوف هذا على شان=جنه من المعبود للمحسنيني
صابر على العالم مثل صبر شقران=يومه جمل شال الثقيل المتيني
لو قيل عني من هل الحقد فقران=جاوبت باللي يقهر الحاقديني
قلت الفقر ماعذرب إطوال الايمان=اللي بحزات الشدايد تبيني
الفقر والله فقر عباد الاوثان=واللي يهين النفس لجل العجيني
تلقاه من سلطان فى بيت سلطان=يشحذ وهو بحبال ذله رهيني
ماله مابين الناس هيبه ولاشان=ولاله إبدرب الشرف خطوتيني
وأنا رجل مالي مع الذل مسكان=الذل عني وسط قبره دفيني
خلقني المعبود صقرن بجنحان=على المهونه ماوقع مخلبيني
أكفخ ليامن ضقت من فوق مابان=ويفكني همي عقب ركعتيني
أمد كفي للولي سر وعلان=وتهل عيني للولي دمعتيني
ذلن لرب البيت خلاق الاكوان=ولا لعبدن للاوادم يهيني
مادام إلي قلبن على الناس مالان=إلا لرب البيت دايم يليني
ماني بقايل للعرب حيل جوعان=بالله لو لقمه ياعالم عطيني
بصبر على همي وأناظر بالاعيان=جنوب وإلا شام قبله يميني
وإليا لقيت إبدرب لولو ومرجان=للرجل قلت إلمكسبي سيريني
وإن جيت باللي مارجح منه ميزان=ولا يجيب إمن العشا لقمتيني
ماني على ماقدر الله زعلان=ولا على وظعي مجاذب ونيني
لابد مانوفي غرض كل ديان=هالحين وإلا بعد مده وحيني
كم من فقير إمن الولي عمر أوطان=وهو قبل يمشي بلا نعلتيني
هذا كلام اللي على نسل عدنان=صلى ومد الكف للي يعيني