طال الشقى

[حمد بو ضريس العازمي]

طال الشقى فى خفوقي والغثا طال=والصبر مليت من همه وطوله
أدور اللي يسر الحال والبال=ورجع بحظن على الظيقه ميوله
الدمع دايم على الخدين همال= والنفس من حزنها حيل إمعلوله
صحيح من لامعه مايسعد الحال=يبقى بحالن مع الحزن إمعزوله
يمسي بغربال ثم يصبح بغربال=ويطيح بالدرب لاثقلت حموله
الوقت هذا يذل إرجال ورجال=يصفى لهم لو مافيهم من رجوله
يركي على أهل الوفى شرن وسلال=وأهل الردى برظهم تدرج سيوله
كم شفت نذلن بلا عمن ولاخال=الشكل شكل الثعل والزول زوله
دايم على الناس بالحيلات يحتال=والناس بقلوبهم يرجح قبوله
أغلوه من حيلته مذموم الافعال=وأخذ مابين العرب دور البطوله
وهو ولد حثل من رديان وحثال=عفنن خبيثن ولا يسوى نعوله
عنده من المال مايعمر له أطلال=وعياله إمن القهر منه إمهبوله
عرظهم الفقر والحرمان قتال=والناس مدري على ويش إنتحوله
مايوم شفته دفع دينار وريال=على يتيمن فقد عز الطفوله
بالبخل والجحد إله مخرج ومدخال=والشر كاسيه من عرضه وطوله
غيره بعد شفت بين الناس دجال=نفسه من الخير والطيب إمغسوله
مشاعره ميته من شر الاعمال=وعلومه السود وصلت كم دوله
لاثار حقده فعل فعلن ماينقال=عمولته بالقشر شر العموله
كل يوم عفن السلف مجذوب الانذال=على ضعوف العرب تاطا خيوله
وياه مالن على الرديان منهال=وأهل الحوايج مامد إلهم سيوله
ضلعن يساقي ترابه دوم شلال=يدرج ولا ينقطع برظه نزوله
لاكن ماهو لبنت الريح خيال=ولا هو اللي على الطيب إهتفوله
ولاهو اللي على الانشاب حلال=ولا على فزعتن سجل وصوله
نذلن على الشين والمنقود لازال=عسى الله إلقبره المظلم يزوله
إبليس كل مافعل بقفاي وإقبال=منه إيتعوذ ولا يفعل فعوله
البيت لهل الشرف ماهوب مدهال=والصيت من بيته إلبنت الحموله
متحاقر اللي بلا مالن ولاإعيال=ومعذرب اللي من الجوع إمهزوله
وأفقر فقيرن يدرس مثله أجيال=على الكرم والمسرات العجوله
كم شفت مثله كثير الشين والمال=ثم قلت أنا اللي هل العفه تقوله
عسى الله إيعزنا عن ظل الاذيال=اللي عن الخير والفزعه جفوله
المجد يبقى من أبطالن ليا أبطال=وأهل الردى عنه تبطي ماتطوله
يبقى كريم العرب فى عز وإظلال=من الله اللي قبل من مادعوله
وأنا لياقلت من ضيقاتن إثقال=متى علي الزمن يرسل رسوله
ويزين بالخير من زوال الاهوال=اللي يقلب على خلقه فصوله
لابد مايصير ماقلته بالامثال=خيرن يجيني وهوماحال حوله
ضني بربي كبير أكبر من إجبال=ماغيره اللي يقدم بالسهوله
الباب لاصار محكومن بالاقفال=قدام عبده يبطل له قفوله
يعطيه رزقن كما الامطار هطال=ثم يرفعه فوق ناسن مافزعوله
ويصير عقب الفقر ماعاد ينطال=واللي ماناله قبل بالله ينوله
سبحان من يرفع أزوالن على أزوال=اللي رحم ثم عطا خلقن شكوله
عليه دوم إتكالي والسنع طال=والختم صلو على محمد رسوله