فكرت بالوقت

[حمد بو ضريس العازمي]

فكرت بالوقت وهذيك الرياجيلي=اللي لهم بالوفى والطيب منزالي
قامت هجوسي عن اللي فات تحكيلي=وتبين الفرق بين المر والحالي
قالت خذ اللي يسرك من تماثيلي=يالشاعر اللي معك ماتبور الامثالي
تبا تجيك الدعاوي بالتفاصيلي=ذربات جزلات ماهن عوج وهزالي
الاوله كان بهذيك المشاكيلي=حشمه ورحمه وطيب افعال وخصالي
الجار منهم مايشكي من غرابيلي=إمدلهينه على مايطيّب الفالي
يحمون بيته عن اعيال المسافيلي=لاغاب له مدتن فى كد وأشغالي
والياحضر مايشوف إلا الحلاحيلي=ايقلطونه على كبشن وفنجالي
منهم حريمه ماتطرح بالمحابيلي=إيجون دايم لهن سترن على إضلالي
والضيف مايكرمونه بالمهازيلي=لوكان ماهوب غالي ياخذ الغالي
لاغط يمناه فى مفتورت الحيلي=من خمسه إليا ذراعه دهنها سالي
صديقهم تسكنه بعلا المنازيلي=مايشوف منهم عتابن مر وإخمالي
عليه دايم يجون أصفى من النيلي=ولا تورده غير ابمارد إزلالي
يلقى الهروج المفيده بالتعاليلي=وإن راح ماتحط فيه اللي ماينقالي
تشتب نيرانهم مثل المشاعيلي=اللي لهن بالسما شعلات وإشعالي
فى مجلسن تصتلي فيه المعاميلي=لكرام جيران وإلا إضيوف وأبطالي
منهم مايسمع ياكود إلا التهاليلي=فى كل فرضن ماخلو طاعة الوالي
إموحدين الولي بالصبح والليلي=ولا يطيعون بالله كل دجالي
الشرك منهم يبدد بالدواليلي=والمشرك إيذوقونه لاهب الصالي
لرحامهم ماتقطّع بالمواصيلي=وافين قدامهم فى كل الاحوالي
وإن شافو اللي يذوق الهم والويلي=خلوه بالله يشتت كل غربالي
وضعيّف الحال ماتمده بتظليلي=منهم يعود غني الزاد والمالي
ماتشوفهم لاجرى فوق الثرى سيلي=إلا بخدن يسر الحال والبالي
فيه إم سالم وتغريد البلابيلي=يجلا عن القلب من دنياه ماشالي
عشبه على الذود وإلا بالمطافيلي=إيخلي الراعي الممرور يهتالي
هذا بعض مانقوله بالمصاقيلي=اللي بقى نهجهم درسن للأجيالي
راحو ولاخلو إلا طيب الجيلي=يمشي على افعالهم ويطيب بفعالي
عنهم وقف يلطم العيال ويشيلي=حملن ثقيلن يهد إجمال وجبالي
حفظ لهم نهجهم ثم زاد بالكيلي=طيبن على طيب وإجزالن على إجزالي
والثانيه عن رجال الطيب تحويلي=لرجال خلقه ولاكن ماهم إرجالي
قومن عسى مالهم بالكون تمثيلي=ولالهم حض يطلع بالسما العالي
على الرذيله لهم دايم مداخيلي=وإلهم بضل الخنا والشر مقيالي
لامجلس إيضمهم عن سافل الميلي=ولالهم جمعتن وسط الخلا الخالي
قدام بيبانهم دايم مقابيلي=مذين جيرانهم بصياح وهبالي
ماعمرهم صوتو بالبن والهيلي=ولالكبشن عليه السمن شلالي
ماعندهم غير مكروه المحاصيلي= سياتن إمسجله من شر الاعمالي
لاخلاق لادين لاحفظن وترتيلي=ولا إمسحو دمعت المسكين بريالي
عن دينهم مايضدون المغاليلي=ولايذودون عن عثمان وبلالي
ماطابو إلا بنقل القال والقيلي=والنيه الباطله بقفاي وقبالي
لاشافو إم الكرامه والتنافيلي=بالسوق وإلا بدرب النور تجتالي
عالو عليها عيال إسفيل ورذيلي=فى كلمتن جارحه وإلا بجوالي
منهم تعود جريحه بالهماليلي=تذرف كما اللي بحل الوسم هطالي
قدم العرب والعجم والراس والذيلي=والكافر اللي مايعبد غير تمثالي
هم فشلونا عساهم لنوازيلي=اللي من الله تزيل اللي ماينزالي
حياتهم من بهاذيل إل بهاذيلي=وأفعالهم شفطت لفعال الانذالي
فى كل دربن على خلق الله إتعيلي=مايتركون البشر فى كل مدهالي
إتقول للي يخايلهم فلا إتخيلي=لايجيك منا مايتلف قلب وطحالي
إسلاحهم جاهزن مافيه تعطيلي=ونفوسهم دايمن حشرات وثقالي
على المواتر مطافيقن مهابيلي=اللي يجي قدمهم يصدم وينشالي
إخشومهم مثل شنكار المناقيلي=الكل منهم على الاجواد متعالي
وعيونهم بالعرب مثل الدرابيلي=عنهم تلم العلوم إجداد وسمالي
جلساتهم دوم فى مجرى المناهيلي=على مايتلف من العالم ويغتالي
ماعندهم غير شينات المراسيلي=اللي من الغرب ماترسل على الخالي
صارت على كبودهم مثل الشهاليلي=لين إنها وردتهم لشهب اللالي
قومن ليا قلت تابو قام يرويلي=عنهم صديقن مهولته بالاهوالي
إيقول لشتدّ حبلن بالمحاحيلي=مال الصداقه مع الرديان مثقالي
صديقهم لو يجى فيهم كما إسهيلي=لاطاح فى حفرتن دموه برمالي
مدهالهم دوم فى شر المداهيلي=صالو وجالو مع اللي ماله افظالي
إبليس يرسم لهم درب المناويلي=وهم لها كل يوم إتوصل إحبالي
على الدنيه مشافيقن معاليلي=الكل منهم على ماشان جوالي
سفراتهم دايمن لحفاد أبا الفيلي=ماهي لدعوه وعلم إيفيد جهالي
خمارتن عندهم دايم مساطيلي=كل ماطفو جالهم هوشات وإقتالي
خليتهم يوم شفت النور يضويلي=والخير جاني من اللي يصلح الحالي
من يوم مافقت عن درب السماليلي=والدمع مني على مافات همالي
التوبه اللي خذتني من مراذيلي=فيها لقيت الحياه اللي بلا أمثالي
قامت ليال السعد بالخير تصفيلي=وإمع أطيب الخلق سر القلب زرفالي
إرتحت من يوم جا لدقن تطويلي=وأفلحت من قصر ثوبي عقب ماطالي
من توبتي مافجعت إلا بهاليلي=قومن صلاحي مزلزلها بزلزالي
حمدت من له دموعي دايم إتسيلي=ثمن دعيت لصلاح القوم بالحالي
عسى لهم عن حيات الذل تبديلي=واشوفهم بالمساجد دايم إقبالي
هذا كلامه وأنا كملت تفصيلي=قصيدتن قلتها برجال وحثالي