الله يسامحك

[حمد بو ضريس العازمي]

الله يسامحك ياللي منك ذقت الغرابيل=حزني من أسباب هجرك طال والهم طالي
أنته سعيدن خلي البال ماتسهر الليل=وانا عيوني ماترقد منك كل الليالي
طاوعت فيني من الكذبان نقالت القيل=ثم رحت عني مراح إمن السباع الغزالي
خليتني للهموم اللي من العالم إتزيل=وأشعلت فى خافقي من صالي النار صالي
من عقب ماكان حيلي حيل ماعاد بي حيل=حيلي من أسباب فعلك طاح ثم شان حالي
والله ماكنت هاقي منك يانافل الجيل=فى يوم من سبتك يجرى لي اللي جرالي
كنت أحسب إنك ماتسمع من كلام المسافيل=وتقول هذا كلامن منك فيني يقالي
ولابعد كنت هاقي منك قطع المواصيل=كنت أحسب إنك على وصلي ترد الوصالي
لو كنت طالب على ماقيل مني دواليل=عطيتك اللي يسوق إعداي سوق الجمالي
لكن من يوم عن وصلك صنعت العراقيل=والله ماقول بحبالك بوصل حبالي
الوقت دوار والدنيا على العالم إتميل=ميلن يزيل الحجر من نايفات الجبالي
دنيا تذوق سعيد القلب من صافي الويل=وتحده إل مد كفه للرخوم السفالي
كم واحدن من سببها شال من مكلف الشيل=حملن ثقيلن على إظهور البشر مايشالي
لابد من جورها دمعك يبل المناديل=وتذوق منها شرابن مر عقب الزلالي
بتشوف لاضقت منها من يدللك تدليل=يرحل ويترك مصيرك فوق جالن هيالي
الضيق دايم يبينّ طيب كل المشاكيل=ويبينّ اللي من المعروف والطيب خالي
بكره لياجيتني ضايق عظامك مهازيل=بقول غالي ولايغلا عليك أنت غالي
خذ ماتبي بس يمي لاتدز المراسيل=أنا عن الحب الاقشر معك قلبي صحالي
خليت حبك ياراع الناعسات المضاليل=للي لياخنت به يضحك معك مايبالي
خلاص عفتك وعفت اللي مضى معك بالحيل=من يوم ماملت قلبي عنك يالترف مالي
بنساك وأنسى الليال الطيبه والتعاليل=ماني بذاكرك حتى تندفن بالرمالي
لامت ماني بذاخر بالدموع الهماليل=بسقى ترابك بدمعن مثل وبل الخيالي
لكن مادمت عايش مالك إدموعن إتسيل=الوضع الاول تغيرّ ياعريب الخوالي
يبكونك اللي على وصلك وحبك مهابيل=اللي مايدرون وين القبله إمن الشمالي
صحيت وإخذ الكلام اللي يزيدك بهاذيل=أنا سعيدن عقب فرقاك جوى صفالي
لقيت من تذبح العالم بنجلن معاسيل=جديلها واصلن تحت الردوف الثقالي
كريمة أخلاق مايلقى عليها مداخيل=لاناظرتنى بذيك النجل يرتاح بالي
وصالها ذرب ماهو مثل وصل المعاليل=قدام لاموت من قولت تعالي تعالي
تحضر بهرجن يهول صاحي العقل تهويل=من قيس من سبته ياخذ جميع الهبالي
ماهيب مثلك يانسل إمخضبين المصاقيل=يومك تفوّح خفوقي مثل فوح الدلالي
أنته حنيني من أسبابك يهد المناحيل=وهذيك منها يجيني كل يوم إتصالي
على سنع ماتمايل عن طريق التنافيل=وصلن نظيفن ماعمره مال يم الخمالي
أقولها وأنت يالغدار يامبعد الميل=خلك بعيدن ترى مالك بقلبي مجالي
لياك ترجع لاصحتّك الليال المقابيل=على بري ن حفظ عهدك من أول وتالي
ماعاد يبغاك عقب الظلم والغدر والميل=منك تحرر وعنك اليوم داله وسالي
مادمت خلن ماعندك بالهوى غير ترحيل=على الشرف والمعزه عنك زان إرتحالي
إشبع من الكذب وشبع من يواصلك تمثيل=لاتعتدل ياكثير الغش والاحتيالي
ماهوب باقي معك من يجزى الكيل بالكيل=يبقى معك واحدن عن عزة النفس جالي