أنا عشت بالدنيا

[حمد بو ضريس العازمي]

أنا عشت بالدنيا مثل عيشة الذيبي=وبموت ماغيرت عادات جداني
لياجوني الاجواد مديت من طيبي=قصيدن يخلصهم من إفلان وفلاني
فقيرن مايقعد يوم دينار فى جيبي=أمد الكرم وأسهر من الجوع جوعاني
لياشفت مريم ظاحكه للاعابيبي=دموعي تحول مثل همال الامزاني
صغيره ماتدري وش علي من عواقيبي=عسى الله يكافيها من إشرور الازماني
لها كلمتن دايم مع الليل تسري بي=لعودن عسى الله يرحمه مات فقراني
تذكرني إبوقت الطفوله بتعذيبي=يوم إني ماحصل غير ترديد الالحاني
أغني وأنام الليل والصبح يبدي بي=على هم مثل الروح لاراح بكاني
عزيزن على قلبي لو إنه قبل شيبي=عطاني ثمانن بيض فى وسط حجاني
ماحصلت غيره كان لله يدني بي=ليامرني غنيت بالله وسلاني
غنايه عسى الله بالمطر يسقي النيبي=ولايحرمك ياضان ربعي ولاضاني
بدو نكرم الظيفان عقب التراحيبي=بهيلن وحيل إسمان وسلوم بدواني
نمد الكرم ونقول ياعالم الغيبي=بخيرن يعم الناس فى كل الاوطاني
ورى البرق نرحل مانشيل المشاعيبي=أمان الله إمخلي هل الجود صدقاني
ماكنا نعرف الحسد والشك والريبي=ولانعرف أبدن غير الاحسان بحساني
على العز عشنا مانحش العراقيبي=ولاإنقول ذاك الرجل شانه تحت شاني
ليامن تلاقينا بروس المراقيبي=شعلنا مثل نيران الاجواد نيراني
نسامر بعظنا بطيّب الهرج والعيبي=مجنب جميع الربع ومجنب إلساني
نسولف ونسري بختلاف المكاسيبي=هذا إمعلمن وهذاك بالعلم فهماني
ماننزل بشي إمحرمن بالسراديبي=ولانعرف الوسكي ولا كل دخاني
يعطر ملابسنا عطور المذاريبي=دخاخين نيرانن وهيلن برسلاني
عيالن تهذبنا على الطيب تهذيبي=من إرجال مافيهم ردي ن ولاداني
تعلمت بوم إني صغيرن مواجيبي=من اللي على مايعز الاجواد رباني
عسى الله يرحم طيب الساس ويثيبي=هذيك الرجال اللي على عز وإيماني
من اللابه اللي ماتخون الاصاحيبي=عوازم لها فى صفحة المجد عنواني
حياة البدو كانت مثل ريحة الطيبي=مافيها ياكود العز والطيب مجاني
مافيها مثل لاجيت للفظل لاتجيبي=ياكود القصيد اللي يبين ماتنخاني
أنا أبغاك يالشاعر بشعرك تسوى بي=مايصعب على خصمن على الصوت عاداني
تمدنت ثم شفتك ياسلم المناديبي=غريبن ماجابك للبشر غير شيطاني
حياة المدينه وظعها شين وصعيبي=ياليت الكريم إبدار الاجداد خلاني
معاصير وإلا من سموم الواهيبي=لي أبرك من اللي غيرت طبع الانساني
صحيح إن فيها ناس مثل المراقيبي=نجومن تعلت بالشرف فوق ماباني
ولاكن سيفي فى صدور المجاريبي=ولايشملك ياللي لمن ضاق مزباني
بهذا الزمن شفت الردى والتعاجيبي=من اللي لهم بالعار والعيب مسكاني
رجالن لقيت إبهم جميع العذاريبي=مافيهم ياكود إلا ماتخدم بلا أثماني
على المصلحه دايم تجر التناحيبي=وتلهث لها لهثن مثل لهث نجماني
ماترتاح لين إتذل عند المعازيبي=ولاإتهيد لين إمن الدنانير تنهاني
لياشفتهم فى مظهرن زين ومهيبي=تقول إنهم بالعز من عصر هاماني
وهم بالشحاته يحسنون الاساليبي=تربو عليها من خوالن وعماني
بوقت الرخى للبن والهيل ماتغيبي=وبالضيق للمحتاج صقهان عمياني
تشيل الحسد والحقد بين المحاديبي=على اللي ماجاهم بالشدايد بنقصاني
عريب النسب عنهم يضد المغاضيبي=ويفتكهم بالمال من كل دياني
وهم بالشدايد عنه دايم مهاريبي=يخلونه الرديان بالهم غرقاني
على كثر مايصوت مايلقى ولا إمجيبي=حزينن على همه نقل ضبم جحداني
عيونه على خده تهل السواكيبي=دموعن من الصدمه ومن ضيق وأحزاني
ماكان إمتوقع لاوقع بالمناشيبي=يحصل بوقت الضيق الاصحاب عدواني
أقوله وأنا اللي ماخذن من تجاريبي=دروسن مايمحيها من القلب نسياني
من أسبابها بالقلب خظرن معاطيبي=جروحن ماتبرى منك ياطب الالماني
ماباالناس واحد سالم إمن القصاصيبي=قلوب البشر تنزف من أصحاب وإخواني
وأنا مثلهم بينت بين الهناديبي=علومن لها عند الاجاويد برهاني
مثل مانصت من يفتلون الاشانيبي=على الطيب كانت كل ماطبت تنصاني
فعلنا وحنا من كرمنا مصاويبي=من اللي تجازي بالردى ذرب الايماني
عساهم فدى لمعقبت طيب الصيبي=هل المذهب اللي ماتغير ولاشاني
رجالن تخلد طيبها بالمكاتيبي=هم اللي لكل الطيب والعز فرساني
على المجد ذربين الطوايف متاصيبي=من الله خلقهم تكرم الضيف والعاني
ماصارو مثل من يشحذون الكتاتيبي=على طيبن مزيف على الكون ماكاني
عسى الله بالزلزال وإمن المشاهيبي=يسلط عليهم لين يفنيهم الفاني
ويبقي هل المعروف بذارت الطيبي=هل الفزعه اللي مابهم عفن وهداني