لا يازين خاف الله في حبك باح مكنوني =وانا اللى يابعد روحي حياتي فيك مشقيها
مدام انك معذبني وقلبي فيك مفتوني =انا مدرى عقب صدك حياتي وين اوديها
احبك يا هوى بالي ولاسمع من يعذلوني =رهنت الروح فى حبك حبيبي لا تقاصيها
ترى سهم الهوى قاتل اخاف الناس يدروني =اذا طالتبي المده جروحي من يداويها
تنام الليل من بدري وانا اللى تسهر اعيوني =تناظر صورتك عيني لانك دايمن فيها
تراك انت العمر كله وغيرك ما يهموني =على بالي حروف اسمك خفوقي دوم يطريها
بعد كل الوفا هذا حرام تخيّب اضنوني =نسيت ايامنا الحلوه وعشرتنا وماضيها
انا ماقول غير الله يلوم اللى يلوموني =قهرني صدك الجاسي سواتك من يسويها