الجو زان ونقلت الطير ميعاد
للي تحراها عقب ربطت الطير
شفي ولا من قربت نقلته زاد
شفي معاها يرتفع مثل الامبير
ثمآ نقلته عقب ذكرآ بالارصاد
ان الحباري بالمفالي مزابير
ثم رحت اجهز عزبة الشرب والزاد
والبن ويا الهيل لجل المناعير
و ارواق بالسله وبه تسعت اوتاد
واسبير بالسله وبسبيره سبير
من ثم حركت ومعي ربعآ اجواد
سمحين طول الدرب ضحك وتباشير
الين جينا جونا والهدو ساد
صار الهدو سيد جميع التعابير
ثم فرعو ( عراك ) يدرون صياد
العام صاد وهالسنه يبشر بخير
مجيوب تهريبآ من بلاد لبلاد
ماكره بكستان ماهوب سيبير
يلقا علومه لا نشد عنه نشاد
بالذات لامنه نشد له صقاقير
احمر جروديآ نحره ابيض و حاد
اقصير الساقين بالذيل تغبير
والراس كنه من فناجيل بغداد
اللي تقهوابه شماليآ اعصًًير
واليا كفخ طلاب دمآ وهداد
طلاع ذباحآ مايبي زود تاخير
والعين دربيلآ ثلاثي الابعاد
يكشف عن الموقع بأدق التصاوير
واليا طلع للخرب لو جبت عداد
سرعته فوق الفين ماهوب تزوير
يلوي جناحه لوي بستن و رداد
مزورآ له زود ومعشق القير
وان خيشتله يرتفع فوق الاشهاد
عيت تطير وخاطره لازم تطير
الين طارت حسب عراك ما راد
ثم ابتدا حربه بلا اي تفكير
وجه عليها تقل بارق ورعاد
لين ابرقن جنحانها برقت النير
احدن يقول اشوفها علمآ اوكاد
واحدن يقول اخفيتها يالمناعير
من ثم حولها بعد جاه الارشاد
من اجهزت ملاحته جاه تحذير
ثمآ شعطها شعط بارود وازناد
لا تعرف اليمه ولا تظبط السير
عراك جاها جيت الموت حصاد
حرآ جرودي ماخذآ سرعة الجير
ثمآ ضربها ضربه بفن وعناد
لينه تنثر ريشها نثر تفجير
وقف عليها وقفتآ لأبن شداد
ولا كما جساس في قبضت الزير
ثمآ علفته من ثناديه بركاد
يستاهله كله ويفرق عن الغير
كلن يبارك بعد عراك ماصاد
فعله كبير ولوه بعمره صغير
والود عقب الشمس طاحت بمقعاد
عقب التعب كن الجسم جاه تخدير
مير النشاما كسرو جرم و وقاد
واركو عليه امن الدلال المباهير
احدن تكفل شغل دله و براد
ومدبرآ لك دله الكيف تدبير
لا تنشده هو منقص او زايد قناد
من زيين تدبيره نسميه الامير
و احدن يقول شصاد وفلان قصاد
وعلومنا صيد وقصيد ومشاوير
هذي حياة الفود والغير مافاد
لو ان شفي غير فايد مع الغير
والعمر رمشت عين والموت ميعاد
يجيك في لحظه بلا اي تحذير
وسلامتكم